MGBAVOLƐ NEE MBƐLƐRA BIZA KƐ
Duzu a ɔwɔ kɛ menwu ye wɔ texting nwo a?
:-) Saa ɛfa text message ɛdi gyima nrɛlɛbɛ nu a, ɔbahola yeayɛ adenle kpalɛ mɔɔ ɛdua zo ɛ nee ɛ gɔnwo mɔ di adwelie a.
:-( Saa wanva wɔanli gyima nrɛlɛbɛ nu a, ɔbahola yeazɛkye ɛ nee ɛ gɔnwo mɔ avinli nee wɔ duma.
Edwɛkɛ ɛhye baha mɔɔ ɔhyia kɛ ɛnwu ye wɔ ɛhye mɔ anwo la
Edwɛkɛ bieko mɔɔ wɔ nu:
Awie mɔɔ ɔwɔ kɛ ɛkɛlɛ ye message
Mgbavolɛ nee mbɛlɛra dɔɔnwo suzu kɛ text message le adenle titili mɔɔ bɛdua zo bɛdi adwelie a. Text message maa ɛkola ɛ nee awie biala mɔɔ ɛlɛ ye nɔma la di adwelie, kyesɛ wɔ awovolɛ ɛnlie ɛndo nu.
“Me papa ɛngulo kɛ me nee me diema raalɛ ne nee mrenyia badendɛ wɔ yɛ moba fonu ne mɔ azo. Saa yɛkpondɛ kɛ yɛ nee mrenyia tendɛ a, kyesɛ yɛfa fonu ne mɔɔ gyi yɛ asalo ɛkɛ ne la wɔ mekɛ mɔɔ awie mɔ wɔ ɛkɛ la.”—Lenore.
Mɔɔ ɔwɔ kɛ ɛnwu ye la: Saa ɛfa wɔ nɔma ɛmaa awie biala mɔɔ ɛbanwu ye la a, edwɛkɛ bahola ado wɔ.
“Saa wɔannea boɛ wɔ menli mɔɔ ɛfa wɔ nɔma ɛmaa bɛ la anwo a, bɛbahola bɛava message anzɛɛ nvoninli mɔɔ ɛngulo la bɛanwa wɔ.”—Scott.
“Saa ɛta ɛfa text message ɛnwa awie mɔɔ ɛ nee ye awodeɛ ɛnle ko la a, ɔnrɛhyɛ ɛbanyia ɔ nwo ɛhulolɛ.”—Steven.
Baebolo ne ka kɛ: “Sonla mɔɔ anye gyi ɔ ti anwo la nwu munzule na ɔtwe ɔ nwo ɔfea.” (Mrɛlɛbulɛ 22:3) Saa ɛmaa ɛ nye da ɛkɛ a, ɛbahoati ngyegyelɛ dɔɔnwo.
Edwɛkɛ mɔɔ zile: “Menvale kakula kpavolɛ bie agɔnwolɛ, na ɛnee yɛdua text message zo yɛdi adwelie mekɛ dɔɔnwo. Menzuzule kɛ yɛle agɔnwolɛ kpalɛ ala. Meannwu ye kɛ nvonleɛ wɔ nwolɛ kɔkpula kɛ ɔhanle ɔhilele me kɛ yenyia me nwo ɛhulolɛ la. Akee menwunle ye kɛ, anrɛɛ ɔnle kɛ me nee ye tu na mefa text message dɔɔnwo menwa ye kɛ mɔɔ menyɛle la.”—Melinda.
Suzu nwolɛ nea: Ɛnea a kɛzi edwɛkɛ mɔɔ kpavolɛ ne hanle la baha ɔ nee Melinda agɔnwolɛvalɛ ne ɛ?
Wɔ adenle fofolɛ zo! Duzu a anrɛɛ ɔwɔ kɛ Melinda yɛ amaa ɔ nee kakula kpavolɛ ne ayɛ agɔnwolɛ ala ɛ?
Edwɛkɛ mɔɔ ɔwɔ kɛ ɛkɛlɛ
Kɛmɔ ɔnyɛ se kɛ ɛbava text message wɔanwa awie, yɛɛ kɛmɔ saa ɛnyia bie a ɔmaa ɛ nye die la ati, ɔmaa ɛ rɛle fi kɛ bie a menli bade mɔɔ wɔhɛlɛ la abo wɔ adenle fofolɛ zo.
Mɔɔ ɔwɔ kɛ ɛnwu ye la: Awie bahola ade edwɛkɛ mɔɔ wɔ message nu la abo wɔ adenle fofolɛ zo.
“Ɛnrɛhola ɛnrɛnwu kɛzi ahenle mɔɔ hɛlɛle edwɛkɛ ne la te nganeɛ la nee ɔ ne, yɛɛ bie a ɛnrɛde sɛkɛlɛneɛ ngyikyi bie mɔ mɔɔ ɔvale ɔlile gyima wɔ message ne anu la abo. Ɔkola ɔfa ngyegyelɛ ɔba.”—Briana.
“Meze ngakula mraalɛ bie mɔɔ bɛ duma ɛzɛkye na menli bu bɛ kɛ bɛfa bɛ nwo bɛtwilihwili mrenyia ɔlua text message mɔɔ bɛva bɛnwa ngakula mrenyia bie mɔ la ati.”—Laura.
Baebolo ne ka kɛ: “Tenlenenli dwenle na yeabua edwɛkɛ nwo.” (Mrɛlɛbulɛ 15:28) Duzu a ngɛlɛlera ɛhye maa yɛnwu ye a? Kenga wɔ edwɛkɛ ne anu bieko kolaa na wɔava wɔanwa!
Mekɛ mɔɔ ɔwɔ kɛ ɛkɛlɛ la
Fa nrɛlɛbɛ di gyima na nwu mekɛ kpalɛ mɔɔ ɔwɔ kɛ ɛfa message ɛnwa awie mɔ la.
Mɔɔ ɔwɔ kɛ ɛnwu ye la: Saa wɔannea mekɛ mɔɔ ɛfa ɛkɛlɛ message la kpalɛ a, menli babu wɔ kɛ ɛmbu debie na yeamaa ɛ gɔnwo mɔ ahwe bɛ nwo avi ɛ nwo.
“Ɔnyɛ se kɛ ɛ rɛle bavi mekɛ kpalɛ mɔɔ ɔwɔ kɛ ɛfa ɛkɛlɛ text message la. Bie a me nee awie ɛlɛbɔ adawu anzɛɛ yɛlɛdi aleɛ la ɛnee eza melɛkɛlɛ text message.”—Allison.
“Esiane kpole wɔ nu kɛ ɛlɛka kale a ɛbatɛse awie. Saa wɔannea ɛ nyunlu a, kale ne bahola adɔ aze anzɛɛ azi debie.”—Anne.
Baebolo ne ka kɛ: “Debie biala lɛ ye ɛlobɔ, . . . mekɛ mɔɔ bɛyɛ koonwu, yɛɛ mekɛ mɔɔ bɛtendɛ.” (Nolobɔvo ne 3:1, 7) Edwɛkɛ ɛhye fale ɛdendɛlɛ nwo noko eza ɔfale text message nwo!
Text message nwo nzuzulɛ
Awie mɔɔ ɔwɔ kɛ ɛkɛlɛ ye message
;-) Di wɔ awovolɛ adehilelɛ zo.—Kɔlɔsaema 3:20.
;-) Mmafa wɔ fonu nɔma ɛmmaa awie biala mɔɔ ɛkɛyia ye la. Saa ɛfi ɛbulɛ nu ɛka ɛkile awie mɔ kɛ ɛnrɛva ɛ nwo edwɛkɛ nee wɔ fonu nɔma ɛnrɛmaa bɛ a, ɔbamaa wɔanyia subane mɔɔ ɔbaboa wɔ wɔ mekɛ mɔɔ wɔyɛ kpanyinli la.
;-) Nea boɛ kpalɛ na wɔanva text message mɔɔ kile kɛ wɔnyia ahenle anwo ɛhulolɛ la wɔannwa ye. Saa ɛnyia ahenle anwo ɛhulolɛ a, ɛ nwo babubu wɔ na wɔali nyane ala.
“Memaa me awovolɛ ɛnwu kɛ mefa me fonu ne medi gyima kpalɛ, yemɔti bɛdie bɛdi kɛ mebazi kpɔkɛ kpalɛ wɔ menli mɔɔ mefa me nɔma memaa bɛ la anwo.”—Briana.
Edwɛkɛ mɔɔ ɔwɔ kɛ ɛkɛlɛ
;-) Kolaa na wɔabɔ ɔ bo kɛ ɛkɛlɛ wɔ edwɛkɛ ne la, biza ɛ nwo kɛ, ‘Asoo text message a le adenle kpalɛ mɔɔ ɔwɔ kɛ yɛdua zo yɛdi adwelie wɔ mekɛ ɛhye anu ɔ?’ Bie a ɔbayɛ kpalɛ kɛ ɛbavɛlɛ ahenle anzɛɛ ɛbahendɛ na ɛnwu ye a ɛ nee ye adendɛ.
;-) Mmakɛlɛ edwɛkɛ biala mɔɔ saa ɛgyi ahenle anyunlu a ɛnrɛhola ye ka la. Sarah mɔɔ ɛli ɛvolɛ 23 la ka kɛ: “Saa ɛnrɛhola ye ka kile ahenle a, ɛnee mmakɛlɛ ɛnwa ye.”
“Saa awie fa nvoninli mɔɔ ɛnle kpalɛ la nwa wɔ a, ka kile wɔ awovolɛ. Ɔbabɔ ɛ nwo bane na yeamaa wɔ awovolɛ alie wɔ ali.”—Sirvan.
Mekɛ mɔɔ ɔwɔ kɛ ɛkɛlɛ la
;-) Dimoa si mekɛ mɔɔ ɛnrɛva fonu ɛnrɛli gyima la anwo kpɔkɛ. Kakula raalɛ bie mɔɔ bɛfɛlɛ ye Olivia la ka kɛ: “Saa mede ɛkponle nwo melɛdi aleɛ anzɛɛ melɛsukoa debie a, menva me fonu ne mendo me nwo ɛkɛ”. “Yɛkɔ Kilisienema ayia a, menua ye amaa meangɔ nwolɛ.”
;-) Dwenle awie mɔ anwo. (Felepaema 2:4) Saa ɛ nee awie mɔ ɛlɛbɔ adawu a, mmatɛse awie.
“Meli mɛla memaa me nwo kɛ saa me nee me gɔnwo mɔ gua a, menrɛtɛse awie mɔ, kyesɛ edwɛkɛ ne hyia kpalɛ. Eza menva me nɔma memmaa menli mɔɔ menze bɛ kpalɛ la.”—Janelly.