Duzu Ati A Ɔwɔ Kɛ Yɛyɛ Asɔne Wɔ Gyisɛse Duma Nu Ɛ?

Baebolo ne bua kɛ

Ɔwɔ kɛ yɛyɛ asɔne wɔ Gyisɛse duma nu ɔluakɛ ɛhye ala a le adenle mɔɔ Nyamenle die to nu kɛ yɛlua zo yɛbikye Ye a. Gyisɛse hanle kɛ: “Mame a mele adenle ne, nɔhalɛ ne, nee ngoane ne a; awie biala ɛnrɛhola Selɛ ne ɛkɛ ne kɔ kyesɛ ɔdua me nwo zo.” (Dwɔn 14:6) Eza Gyisɛse zele ye ɛzoanvolɛ nɔhavoma ne kɛ: “Meka nɔhalɛ ne meahile bɛ: Debie biala mɔɔ bɛkɛbiza Selɛ ne wɔ me duma nu la, ɔkɛva ɔkɛmaa bɛ.”​—Dwɔn 16:23.

Deɛmɔti ɔwɔ kɛ yɛyɛ asɔne wɔ Gyisɛse duma nu la

• Yɛdi Gyisɛse nee ye Papa, Gyihova Nyamenle eni.​—Felepaema 2:9-11.

• Yɛkile kɛ yɛ nye sɔ Gyisɛse ewule ne mɔɔ Nyamenle balua zo alie yɛ ngoane la.​—Mateyu 20:28; Gyima ne 4:12.

• Yɛkile kɛ yɛdie yɛto nu kɛ Gyisɛse le menli nee Nyamenle avinligyinlavolɛ.​—Hibuluma 7:25.

• Yɛbu gyima mɔɔ Gyisɛse di kɛ Ɛsɔfo Kpanyinli mɔɔ ɔbahola yeaboa yɛ yeamaa yɛanyia Nyamenle anyunlu ɛlolɛ la.​—Hibuluma 4:14-16.