Asoo Ɔwɔ Kɛ Mesɛlɛ Saint Ɔ?

Baebolo ne bua kɛ

Kyɛkyɛ. Baebolo ne kile kɛ ɔwɔ kɛ yɛdua Gyisɛse duma nu yɛsɛlɛ Nyamenle ala. Gyisɛse hanle hilele ye ɛdoavolɛma ne kɛ: “Bɛyɛ nzɛlɛlɛ a bɛyɛ ye zɛhae: Yɛ Ze mɔɔ wɔ anwuma: Wɔ duma nwo ɛde.” (Mateyu 6:9) Yeanga yeangile ye ɛdoavolɛma ne kɛ bɛzɛlɛ saint, anwumabɔvolɛma anzɛɛ awie biala kyesɛ Nyamenle ala.

Gyisɛse hanle hilele ye ɛdoavolɛma ne kɛ: “Mame a mele adenle ne, nɔhalɛ ne, nee ngoane ne a; awie biala ɛnrɛhola Selɛ ne ɛkɛ ne kɔ kyesɛ ɔdua me nwo zo.” (Dwɔn 14:6) Gyisɛse ala a Nyamenle ɛmaa ye tumi kɛ ɔbodo ɔmaa yɛ a.​—Hibuluma 7:25.

Saa mesɛlɛ Nyamenle na mesɛlɛ saint noko ɛ?

Nyamenle hanle wɔ ye Mɛla Bulu ne anu kɛ: ‘Medame Gyihova bɛ Nyamenle ne, mele nungule Nyamenle.’ (Adendulɛ 20:5) Adenle boni azo a Nyamenle twe “nungule” a? Bɛhile ngyɛnu ɛhye abo wɔ New World Translation ne anu kɛ, ɔdaye ala a ɔwɔ kɛ bɛsonle ye a. Nyamenle kpondɛ kɛ ɛzonlenlɛ kɔsɔɔti, mɔɔ asɔneyɛlɛ boka nwo la, dwu ye ɛkɛ.​—Ayezaya 48:11.

Saa yɛsɛlɛ awie gyɛne biala, saint nee anwumabɔvolɛma bɔbɔ a, ɔka Nyamenle ɛya. Mɔɔ ɛzoanvolɛ Dwɔn bɔle mɔdenle kɛ ɔsonle anwumabɔvolɛ bie la, ɔzile Dwɔn adenle na ɔhanle kɛ: “Mmayɛ! Medame mele sonvolɛ kɛ ɛdawɔ nee ɛ mediema mɔɔ zɔle nɔhalɛ ne mɔɔ Gyisɛse yele hilele bɛ la anu la. Sonle Nyamenle.”​—Yekile 19:10.