Asoo Gyihova Alasevolɛ Tendɛ Tia Vaccine Ɛwɔlɛ Ɔ?
Kyɛkyɛ. Gyihova Alasevolɛ ɛndendɛ ɛntia vaccine anzɛɛ agbuyia mɔɔ bɛwɔ bɛfa bɛbɔ bɛ nwo bane wɔ ewule bie anwo la. Yɛbu vaccine ɛwɔlɛ kɛ ɔle Kilisienenli biala ati anwo kpɔkɛzilɛ. Gyihova Alasevolɛ dɔɔnwo kpa kɛ bɛbawɔ vaccine.
Yɛkpondɛ ayileyɛlɛ kpalɛ yɛɛ yɛ nye die anyuhɔlɛ mɔɔ bɛnyia ye wɔ ayileyɛlɛ nu amaa ewule ɛzulolɛ bie angu menli dɔɔnwo la anwo. Yɛ nye sɔ mɔdenle kpalɛ mɔɔ dɔketama nee nɛɛsema bɔ la kpole, titili wɔ mekɛ mɔɔ ewule bie mɔɔ anu yɛ se kɛra la.
Gyihova Alasevolɛ tie mɔɔ dɔketama nee menli mɔɔ ze kpɔkɛdelɛ nwo edwɛkɛ ka la. Kɛ neazo la, ɔvi mekɛ mɔɔ COVID-19 ewulenzane ne rale la, Gyihova Alasevolɛ ɛhɔ zo ɛva ngakyelɛ ɛmaa wɔ wɛbsaete ɛhye azo wɔ aneɛ dɔɔnwo anu kɛ bɛdie banebɔlɛ nwo ngyehyɛleɛ mɔɔ bɛlɛka nwolɛ edwɛkɛ la. Ɛhye mɔ bie a le deɛmɔti ɔhyia kɛ menli maa adenle da bɛ nee awie mɔ avinli na bɛdi mɛla mɔɔ bɛva bɛmaa wɔ ayia nwo la azo la, awie mɔɔ bɛmaa ɔtwe ɔ nwo ɔfi menli nu, bɛ sa anwo ɛwowolɛ nee nose mask ɛwulalɛ yɛɛ adehilelɛ biala mɔɔ arane mgbanyima ɛva ɛmaa mɔɔ ɔwɔ kɛ menli di zo la.—Wulomuma 13:1, 2.
Gyihova Alasevolɛ ɛva ɛvolɛ dɔɔnwo ɛzi ngyinlazo ɛhye mɔ azo wɔ bɛ mbuluku nu kɛ:
Kpɔkɛdelɛ nwo edwɛkɛ le awie biala ati anwo kpɔkɛzilɛ.—Galeehyeama 6:5.
“[Magazine ɛhye] ɛngile kɛ ayile anzɛɛ ayileyɛlɛ bie le kpalɛ tɛla bie yɛɛ ɔnva ayileyɛlɛ nwo folɛdulɛ ɔmmaa. Ye bodane a le kɛ ɔmaa kengavolɛ ne anwu ayile anzɛɛ ayileyɛlɛ bie anwo nɔhalɛ edwɛkɛ ne na ɔdaye mumua ne yeazi nwolɛ kpɔkɛ.”—Awake!, February 8, 1987.
“Kɛ ɛ nee ɛ mra bawɔ vaccine bie anzɛɛ bɛnrɛwɔ la le ɛ ti anwo kpɔkɛzilɛ.”—Awake!, August 22, 1965.
Yɛkpondɛ ayileyɛlɛ bo zo ɔluakɛ yɛbu ngoane kɛ ɔsonle bolɛ kpalɛ.—Gyima ne 17:28.
“Saa Gyihova Alasevolɛ ɛnde kpɔkɛ a bɛkɔ dɔketama mɔɔ bahola alua ndenle ngakyile zo ayɛ bɛ ayile la ɛkɛ. Bɛkulo ngoane yɛɛ bɛkulo kɛ bɛbɔ mɔdenle bɛyɛ debie biala mɔɔ ɛntia Ngɛlɛlera na ɔbamaa bɛadɛnla aze bɛahyɛ la.”—The Watchtower, July 1, 1975.
“Gyihova Alasevolɛ anye die nwo kɛ bɛbayɛ bɛ nwo ayile. Bɛkulo kɛ bɛnyia kpɔkɛdelɛ kpalɛ na bɛtɛnla aze bɛkyɛ. Nɔhalɛ nu, Gyihova Alasevolɛ bie mɔ le dɔketama kɛ mɔɔ ɛvoya mɔɔ limoa la anu Kilisienenli Luku ɛnee de la. . . . Gyihova Alasevolɛ anye sɔ mɔdenle nee gyima ɛsesebɛ mɔɔ menli mɔɔ yɛ gyima wɔ asopiti yɛ la kpalɛ. Eza bɛ nye sɔ kɛzi menli ɛhye mɔ boa bɛ maa bɛ nwo tɔ bɛ la kpalɛ.”—The Watchtower, February 1, 2011.