Asoo Arane Bie Bahola Ali Tumi Wɔ Azɛlɛ Ye Azo Dahuu Ɔ?​—⁠Duzu A Baebolo Ne Ka A?

Arane mɔɔ bɛwɔ ewiade amuala la yia ngyegyelɛ. Wɔ maanle mɔɔ ɔzɔho kɛ bɛdi boɛ bɔbɔ la anu, anyiemgba edwɛkɛ, ɛradolɛ nwo ngyegyelɛ, maanyɛlɛ nu mgbakyemgbakyenu yɛɛ atuadelɛ kɔ zo wɔ ɛkɛ.

Baebolo ne ka kɛ arane kokye wɔ ɛkɛ mɔɔ ɔbali tumi dahuu a. Bie a wɔde arane zɔhane anwo edwɛkɛ ɛlɛ. Yemɔ a Gyisɛse Kelaese hanle nwolɛ edwɛkɛ wɔ ye asɔneyɛlɛ nwo neazo ne anu la.

• “Yemɔti bɛyɛ asɔne a, bɛyɛ ye zɛhae: ‘Yɛ Ze mɔɔ wɔ anwuma, wɔ duma nwo ɛde. Wɔ Belemgbunlililɛ ɛrɛla. Wɔ ɛhulolɛdeɛ ɛyɛ ɛkɛ wɔ azɛlɛ ye azo kɛ anwuma la.’”​—Mateyu 6:9, 10.

Duzu a Baebolo ne ka ye wɔ Belemgbunlililɛ ɛhye anwo a?

Belemgbunlililɛ ne le arane mɔɔ bali tumi dahuu

Belemgbunlililɛ ne bali tumi avi anwuma.

• Gyisɛse vɛlɛle zɔhane arane ne “anwuma Belemgbunlililɛ.” (Mateyu 4:17; 5:3, 10, 19, 20) Ɛhye ati, ɔhanle kɛ: “Me Belemgbunlililɛ ɛnvi ewiade ɛhye anu.”​—Dwɔn 18:36.

Belemgbunlililɛ ne baye alesama arane ngakyile ne mɔ avi ɛkɛ.

• Baebolo ne ka kɛ: ‘Belemgbunlililɛ ne babubu arelemgbunlililɛ ɛhye mɔ amuala [sonla arane ngakyile] na yeabɔ bɛ bo zo, na ɔ ngomekye a ɔbagyinla ɛkɛ ne dahuu a.’​—Daneɛle 2:44.

Bɛnrɛzɛkye Belemgbunlililɛ ne mɔɔ Gyisɛse Kelaese a le zolɛ Belemgbunli la ɛlɛ.

• Baebolo ne ka kɛ: “Ye tumililɛ ne le dahuu tumililɛ mɔɔ ɛnrɛpɛ nu ɛlɛ a yɛɛ bɛnrɛzɛkye ye belemgbunlililɛ ne.”​—Daneɛle 7:13, 14.

Belemgbunlililɛ ne bamaa anzodwolɛ nee banebɔlɛ ara azɛlɛ ye azo.

• Baebolo ne ka kɛ: “Awie biala badɛnla anzodwolɛ nu wɔ ye vanye nee ye feege baka bo, yɛɛ awie biala ɛnrɛha bɛ ɛzulolɛ.”​—Maeka 4:4, Good News Translation.

Sukoa Belemgbunlililɛ ne anwo ninyɛne dɔɔnwo

Mɔɔ Gyisɛse wɔ azɛlɛ ye azo la, ɔvale ye mekɛ dɔɔnwo “ɔbɔle Belemgbunlililɛ ne anwo edwɛkpa ne nolo.” (Mateyu 9:35) Eza ɔhanle ɔdole ɛkɛ ne kɛ:

• “Bɛbabɔ Belemgbunlililɛ ne anwo edwɛkpa ɛhye nolo wɔ azɛlɛ ye azo amuala bɛava bɛali maanle maanle ne amuala daselɛ, kolaa na awieleɛ ne ara.”​—Mateyu 24:14.

Ɛnɛ, bɛlɛbɔ Belemgbunlililɛ ne anwo edwɛkpa ne nolo wɔ azɛlɛ mɔɔ bo 240 la azo. Yɛsɛlɛ wɔ sukoa arane ɛhye nee kɛzi ye tumililɛ ne baboa wɔ la anwo ninyɛne dɔɔnwo.

Yɛsɛlɛ wɔ nea vidio ɛhye Duzu A Le Nyamenle Belemgbunlililɛ Ne?