Nane Mɔɔ Wɔ Ɛbɔ Nu La Azo Ɛde Ɛya Ko Ngyɛnu 73 Wɔ Ɛvolɛ 50 Anu​—⁠Duzu A Baebolo Ne Ka A?

Wɔ October 9, 2024, World Wildlife Fund ne vale kɛzi ninyɛne mɔɔ menli ɛlɛyɛ ɛha nane mɔɔ bɛwɔ ɛbɔ nu la anwo amaneɛbɔlɛ mɔɔ gyegye la dole gua. Ɔhanle kɛ wɔ “kɛyɛ ɛvolɛ 50 mɔɔ ɛze ɛhɔ la (1970-2020), nane mɔɔ bɛwɔ ɛbɔ nu la azo ɛde ɛya ko ngyɛnu 73.” Eza ɔbɔle kɔkɔ kɛ: “Yɛbahola yɛaha kɛ saa ninyɛne kɔ zo zɛhae a, ɔkadwu ɛvolɛ nnu mɔɔ la yɛ nyunlu la abɔdeɛ mɔɔ ngoane wɔ bɛ nu la ɛnrɛhola ɛnrɛdɛnla azɛlɛ ye azo a.”

Amaneɛbɔlɛ zɛhae gyegye menli dɔɔnwo. Yɛ nye die yɛ azɛlɛ kɛnlɛma ye anwo na yɛngulo kɛ nane mɔɔ wɔ zo la bawu. Yɛ nye die nane nwo ɔluakɛ Nyamenle kulo kɛ yɛnea bɛ boɛ.​—Gyɛnɛsese 1:27, 28; Mrɛlɛbulɛ 12:10.

Ɔti bie a ɛbabiza kɛ, ‘Asoo yɛbahola yɛabɔ nane ne mɔ anwo bane na yɛanlea bɛ boɛ ɔ? Duzu a Baebolo ne ka a?’

Anyelazo wɔ ɛkɛ

Ɔnva nwo mɔdenle biala mɔɔ yɛbabɔ la, Nyamenle a bahola abɔ nane ne mɔ anwo bane kpalɛ a na tɛ yɛdayɛ ɔ. Baebolo ne ɛha ɛdo ɛkɛ ne wɔ Yekile 11:18 kɛ Nyamenle ‘bazɛkye bɛdabɛ mɔɔ bɛlɛsɛkye azɛlɛ ne la.’ Ngyɛnu ɛhye maa yɛnwu ninyɛne nwiɔ:

1. 1. Nyamenle ɛnrɛmaa menli ɛnrɛzɛkye azɛlɛ ne bɔkɔɔ.

2. 2. Ɔnrɛhyɛ biala ɔbayɛ nwolɛ debie. Duzu ati ɔ? Ɔluakɛ ɛnɛ yɛnwu kɛ menli ɛlɛbɔ mɔdenle ahu nane mɔɔ wɔ azɛlɛ ye azo la adɛla mekɛ biala wɔ alesama tetedwɛkɛ nu.

Duzu a Nyamenle bayɛ ava ali ngyegyelɛ ne anwo gyima a? Ɔbamaa ye anwuma arane ne, anzɛɛ Belemgbunlililɛ ne ali tumi wɔ azɛlɛ ne kɔsɔɔti azo. (Mateyu 6:10) Arane zɔhane batete alesama mɔɔ yɛ tieyɛ la yeamaa banlea nane mɔɔ wɔ azɛlɛ ye azo la boɛ na bɛabɔ bɛ nwo bane kpalɛ.​—Ayezaya 11:9.