Asoo Olympics Ne Bahola Aha Menli Abɔ Nu Amgba?—⁠Duzu A Baebolo Ne Ka A?

Menli kɛyɛ mgbe mgbe nnu banlea 2024 Summer Olympics ne mɔɔ nwɔhoalilɛma mɔɔ vi maanle 206 azo ɛhɔ bie la. Thomas Bach, kpanyinli mɔɔ nea International Olympic Committee ne azo la hanle kɛ, “Yɛboka menli mɔɔ ɛlɛdi nwɔhoa mɔɔ ka ewiade ne bɔ nu wɔ anzodwolɛ nu la anwo. Bɛmaa yɛva anzodwolɛ yɛli nwɔhoa ɛhye, ɔluakɛ yɛle menli ko ɔnva nwo ɛleka biala mɔɔ yɛvi la.”

Asoo Olympics ne bamaa bodane ɛhye ara nu? Asoo yɛbahola yɛanyia nɔhalɛ anzodwolɛ nee koyɛlɛ?

Asoo ɔbamaa anzodwolɛ nee koyɛlɛ ara?

Ɛvolɛ ɛhye Olympics ne ɛmaa menli adwenle ɛhɔ ninyɛne gyɛne zo. Nwɔhoalilɛ ne ɛhɔva menli nee maanyɛlɛ nu edwɛkɛ mɔɔ fa mgbakyemgbakyenu ba la ɛra. Ɛhye mɔ bie a le menli fanwodi nwo edwɛkɛ, menli nwo adwenletane, ɛzonlenlɛ nu mgbakyemgbakyenu yɛɛ nyeyenu.

Maanle maanle avinli nwɔhoalilɛ le kɛ Olympics maa menli nye die. Noko nwɔhoalilɛ ɛhye mɔ eza maa yɛnwu menli adwenle nee bɛ nyɛleɛ mɔɔ fa mgbakyemgbakyenu ba na ɔmmaa anzodwolɛ nee koyɛlɛ ɛmba la.

Baebolo ne hanle subane mɔɔ bamaa yeayɛ se kɛ koyɛlɛ badɛnla menli avinli la anwo edwɛkɛ. (2 Timote 3:1-5) Amaa wɔanwu Baebolo ngapezo ɛhye anwo edwɛkɛ dɔɔnwo la, kenga “Did the Bible Predict the Way People Think and Act Today?”

Anzodwolɛ nee koyɛlɛ bara ewiade amuala

Baebolo ne maa yɛnyia anyelazo kɛ anzodwolɛ nee koyɛlɛ bara ewiade amuala. Ɔmaa yɛnwu kɛ menli kɔsɔɔti bayɛ ko wɔ anwuma arane ne mɔɔ bɛfɛlɛ ye “Nyamenle Belemgbunlililɛ ne” la tumililɛ bo.​—Luku 4:43; Mateyu 6:10.

Gyisɛse Kelaese mɔɔ le Belemgbunlililɛ ne azo Belemgbunli la bamaa anzodwolɛ ara ewiade amuala. Baebolo ne ka kɛ:

• ‘Tenlenema bakpazi, na anzodwolɛ ara ɛleka biala.’​—Edwɛne 72:7.

• ‘Ɔbalie ehyianli mɔɔ su kpondɛ moalɛ la. Ɔbalie bɛ yeavi nzisi nee basabasayɛlɛ nu.’​—Edwɛne 72:12, 14.

Ɛnɛ bɔbɔ, Gyisɛse ngilehilelɛ ne mɔ ɛha menli mgbe dɔɔnwo ɛbɔ nu wɔ azɛlɛ 239 azo. Gyihova Alasevolɛ mɔɔ wɔ ewiade amuala la ɛzukoa kɛ bɛbadɛnla anzodwolɛ nu. Amaa wɔanwu nwolɛ edwɛkɛ dɔɔnwo la, kenga Ɛzinzalɛ Arane mɔɔ ɔ ti ne se “Breaking the Cycle of Hatred” la.