Asoo World Cup Ne Bahola Aha Menli Abɔ Nu Amgba?​—Duzu A Baebolo Ne Ka A?

Bɛ nye la kɛ menli kɛyɛ mgbe mgbe nnu banlea FIFA World Cup ne mɔɔ bɛbɔle ɔ bo wɔ November 20 kɔdwu December 18, 2022 la bie. Menli dɔɔnwo suzu kɛ nwɔhoalilɛ zɛhae mɔ kola ka menli bɔ nu ɛdeɛ, noko eza ɔkola ɔyɛ dɔɔnwo.

• “Nwɔhoalilɛ bahola ahakyi ewiade ne. Ɔmaa menli anwosesebɛ. Ɔka menli ɔbɔ nu wɔ adenle titili zo.”​—Nelson Mandela, South Africa maanle kpanyinli dɛba.

• “Bɔlo ɛbɔlɛ . . . ka menli bɔ nu ɔmaa bɛnyia anyelazo ko, bɛ nye die, bɛfa bɛ adwenle bɛsie debie ko azo, na bɛkulo bɛ nwo ɔnva nwo ɛleka mɔɔ awie biala vi la.”​—Gianni Infantino, FIFA kpanyinli.a

Asoo World Cup ne anzɛɛ nwɔhoalilɛ gyɛne biala bahola amaa bɛadwu bodane ɛhye mɔ anwo ɔ? Asoo anyelazo wɔ ɛkɛ ne kɛ alesama bahola anyia anzodwolɛ na bɛayɛ ko ɔ?

Asoo amgba ɔka menli ɔbɔ nu?

Ɛvolɛ ɛhye World Cup ne ɛmaa menli ɛde nganeɛ kɛ ɔnvale bɔlo ɛbɔlɛ angomekye anwo, ɔluakɛ yemaa bɛ adwenle ɛhɔ maanyɛlɛ, sonla fanwodi, menli nu nyeyenu yɛɛ pɛlepɛlelilɛ mɔɔ ɔnle ɛkɛ ne la azo kpalɛ na bɛlɛka nwolɛ edwɛkɛ dɔɔnwo.

Wɔ ɛhye mɔ amuala anzi bɔbɔ, menli dɔɔnwo anye die World Cup ne anwo na bɛnea. Noko akee, ɛhye ɛnrɛhola ɛnrɛha menli ɛnrɛbɔ nu bɔkɔɔ kɛ mɔɔ bɛkulo kɛ ɔyɛ la. Emomu ɔmaa menli da subane nee nyɛleɛ mɔɔ Baebolo ne hanle kɛ menli bala ye ali “wɔ mekɛ mɔɔ li awieleɛ la anu” la ali.​—2 Timote 3:1-5.

Anyelazo wɔ ɛkɛ ne kɛ menli kɔsɔɔti bayɛ ko

Baebolo ne maa yɛnyia anyelazo kɛ menli kɔsɔɔti mɔɔ wɔ ewiade la babɔ nu ayɛ ko. Yebɔ ɛwɔkɛ kɛ menli kɔsɔɔti badɛnla anzodwolɛ nu wɔ anwuma arane ne mɔɔ bɛfɛlɛ ye “Nyamenle Belemgbunlililɛ” la abo.​—Luku 4:43; Mateyu 6:10.

Gyisɛse Kelaese mɔɔ ɔle Belemgbunlililɛ ne azo Belemgbunli la bamaa anzodwolɛ ara ewiade amuala. Baebolo ne ka kɛ:

• ‘Tenlenema bakpazi, na anzodwolɛ ara ɛleka biala.’​—Edwɛne 72:7.

• ‘Ɔbalie ehyianli mɔɔ su kpondɛ moalɛ la yeavi nzisi nee basabasayɛlɛ nu.’​—Edwɛne 72:12, 14.

Ɛnɛ bɔbɔ, Gyisɛse ngilehilelɛ ne ɛha menli mgbe dɔɔnwo mɔɔ wɔ maanle kɛyɛ 239 azo la ɛbɔ nu. Mɔɔ bɛzukoa la ɛmaa bɛye awie mɔ anwo ɛkpɔlɛ biala bɛvi bɛ nu. Saa ɛkulo kɛ ɛnwu ɛhye anwo edwɛkɛ dɔɔnwo a, kenga edwɛkɛ mɔɔ se, “Breaking the Cycle of Hatred” la.