Gyisɛse Baye Ɛtanelilɛ Avi Ɛkɛ

Gyisɛse ze kɛzi ɛtanelilɛ nee nzisi maa yɛnwu amaneɛ la. Bɛdole ye ɛzonle, bɛbole ye, bɛluale adenle ɛtane zo bɛlile ye edwɛkɛ, bɛbuale ye ewule fɔlɛ na bɛhunle ye alɔbɔlɛ nu. Ɛnee edwɛkɛ ɛnle ɔ nwo, noko ɔvile ye ahonle nu ɔbɔle afɔle na ɔvale ‘ye ngoane ɔyɛle ɛkpɔnedeɛ ɔliele menli dɔɔnwo.’ (Mateyu 20:28; Dwɔn 15:13) Kɛkala, ɔle Nyamenle Belemgbunlililɛ ne azo Belemgbunli, na ɔnrɛhyɛ ɔbamaa pɛlepɛlelilɛ ahɔ zo wɔ azɛlɛ ye amuala azo na yeaye nzisi nee ɛtanelilɛ yeavi ɛkɛ ne bɔkɔɔ.​—Ayezaya 42:3.

Baebolo ne ka kɛzi ewiade bayɛ wɔ mekɛ mɔɔ Gyisɛse baye ɛtanelilɛ avi ɛkɛ la anwo edwɛkɛ kɛ:

• “Amumuyɛma ɛnle ɛkɛ bieko; ɛbahɔnlea ɛleka mɔɔ ɛnee bɛde la, na ɛnrɛnwu bɛ wɔ ɛkɛ. Noko bɛlɛvoma banyia azɛlɛ ne, na bɛ nye balie kpalɛ wɔ anzodwolɛ dɔɔnwo anu.”​—Edwɛne 37:10, 11.

Kɛ ɔkɛyɛ na yɛahile mɔɔ Gyisɛse ɛyɛ ɛmaa yɛ nee mɔɔ ɔnrɛhyɛ ɔbayɛ yeamaa yɛ la anwo anyezɔlɛ ɛ? Adenle ko mɔɔ ɛbahola wɔalua zo wɔayɛ zɔ la a le kɛ ɛbazukoa “Nyamenle Belemgbunlililɛ ne anwo edwɛkpa ne” mɔɔ Gyisɛse bɔle ye nolo la anwo ninyɛne dɔɔnwo. (Luku 4:43) Kenga edwɛkɛ, “Nyamenle Belemgbunlililɛ Ne A Le Duzu?”