Abɔdeɛ Nwo Nrɛlɛbɛvolɛma Ɛva Doomsday Clock Ne Ɛhɔ Ɔ Nyunlu—Duzu A Baebolo Ne Ka A?

Wɔ January 24, 2023, abɔdeɛ nwo nrɛlɛbɛvolɛma pianle Doomsday Clocka ne maanle ɔbikyele nɔɔzo bulu nee nwiɔ kpalɛ, mɔɔ kile ewiade awieleɛ la.

“‘Doomsday Clock’ ne gyi ɛkɛ ne maa ninyɛne mɔɔ alesama yɛ mɔɔ ɔbahola yeazɛkye ewiade ne la. Wɔ Dwɛkɛ ne, bɛpianle ye bɛmaanle ɔhɔle ɔ nyunlu ɔbikyele nɔɔzo bulu nee nwiɔ ɔlua ninyɛne le kɛ Ukraine konle ne, nukelea konle mɔɔ bɛsulo kɛ ɔbara yɛɛ maanle nu mɔɔ ɛlɛkakyi la ati.”—AFP International Text Wire.
“Abɔdeɛ nwo nrɛlɛbɛvolɛma hanle ye wɔ Dwɛkɛ ne kɛ bɛpia ‘Doomsday Clock’ ne bɛmaa yeha mitini ko nee foa na nɔɔzo bulu nee nwiɔ abɔ—ɛhye a le mekɛ mɔɔ limoa mɔɔ alesama ɛbikye amagɛdɔn kpalɛ a.”—ABC News.
“Abɔdeɛ nwo nrɛlɛbɛvolɛma bie mɔ ɛbɔ kɔkɔ kɛ ninyɛne mɔɔ alesama ɛlɛyɛ la bazɛkye ewiade ne ndɛndɛ adɛla mekɛ biala.”—The Guardian.

Asoo ɔnrɛhyɛ bɛbazɛkye alesama nee azɛlɛ ne? Asoo ɔwɔ kɛ yɛsulo mɔɔ bazi kenle bie la ɔ? Duzu a Baebolo ne ka a?

Mɔɔ bazi kenle bie la

Baebolo ne ka kɛ, “azɛlɛ ne wɔ ɛkɛ ne dahuu” yɛɛ menli “bɛadɛnla zolɛ dahuu.” (Nolobɔvo 1:4; Edwɛne 37:29) Ɔti alesama ɛnrɛzɛkye azɛlɛ ne anzɛɛ ɔnrɛyɛ ɛleka mɔɔ awie biala ɛnrɛdɛnla ɛkɛ a.

Noko, Baebolo ne ka ewiade awieleɛ nwo edwɛkɛ. Kɛ neazo la, ɔka kɛ “ewiade ne . . . ɛlɛpɛ nu.”—1 Dwɔn 2:17.

Amaa wɔanwu ewiade awieleɛ ne anwo edwɛkɛ mɔɔ Baebolo ne ka la, kenga edwɛkɛ “Is the World Coming to an End? What Is the Apocalypse?”
Amaa wɔanwu mɔɔ Baebolo ne ka ye wɔ mekɛ mɔɔ ewiade ne bahɔ ye awieleɛ anwo la, kenga edwɛkɛ “Mekɛ Boni A Ewiade Ne Bara Awieleɛ A?”

Nyia adwenle kpalɛ

Baebolo ne bahola aboa yɛ yeamaa yɛanyia adwenle kpalɛ ɔnva nwo ngyegyelɛ mɔɔ ɛlɛkɔ zo wɔ ewiade ye anu la. Kɛzi?

Baebolo ne tu yɛ folɛ kpalɛ. (2 Timote 3:16, 17) Kɛ neazo la kenga edwɛkɛ, “Kɛzi Ɛbade Wɔ Adwenleadwenle Zo La” amaa wɔanwu kɛzi Baebolo ne bahola aboa wɔ yeamaa wɔanyia adwenle kpalɛ ɔnva nwo ngyegyelɛ mɔɔ wɔ ewiade la.
Baebolo ne maa yɛnyia kenle bie nwo anyelazo kpalɛ. (Wulomuma 15:4) Ɔmaa yɛte mɔɔ ɛlɛkɔ zo nee mɔɔ bahola azi kenle bie la abo na ɛhye maa yɛnyia anwodozo ɔnva nwo mɔɔ ɛlɛsisi wɔ ewiade ne anu la.

Amaa Baebolo ne aboa wɔ kpalɛ la, yɛsɛlɛ wɔ maa yɛ nee wɔ ɛbɔ ɔ bo ɛzukoa Baebolo ne mɔɔ ɛndua ɛhwee a.

a “Doomsday Clock” ne le nvoninli mɔɔ bɔ menli kɔkɔ ɔmaa bɛnwu kɛzi alesama ɛlɛdua ɛlɛtɔlɔneke ninyɛne zo azɛkye ewiade ne la. Ɔle sɛkɛlɛneɛ adenle zo debie mɔɔ kakye yɛ esiane mɔɔ ɔwɔ kɛ yɛdi nwolɛ gyima amaa yɛahola yɛadɛnla azɛlɛ ne azo la.”—Bulletin of the Atomic Scientists.