Kɛzi Ɛbade Wɔ Adwenleadwenle Zo La
Saa ɛdwenledwenle dɔɔnwo a ɔbahola yeaha wɔ kpɔkɛdelɛ nee kɛzi ɛte nganeɛ la. Ɔbahola yeava ngyegyelɛ kpole mɔɔ tɛla debie mɔɔ ɛlɛdwenle nwo bɔbɔ la yeara.
Nzuzulɛ mɔɔ bade wɔ adwenleadwenle zo la
Mmatie amaneɛbɔlɛ ɛtane dɔɔnwo. Ɔngyia kɛ ɛnwu esiane biala mɔɔ bazi la anwo edwɛkɛ kɔsɔɔti. Saa ɛtie ninyɛndane nwo amaneɛbɔlɛ dɔɔnwo a ɔbamaa ɛzulolɛ aha wɔ.
Baebolo ngyinlazo: “Sunsum mɔɔ ɛbubu la maa sonla anwosesebɛ wie.”—Mrɛlɛbulɛ 17:22.
“Ɔnyɛ se kɛ ɔbayɛ wɔ subane kɛ dahuu ɛbadie amaneɛbɔlɛ fofolɛ mɔɔ ɛra la, noko ɔnle subane kpalɛ. Saa meandie amaneɛbɔlɛ ɛtane dɔɔnwo a ɔmaa me adwenleadwenle zo te kpalɛ.”—John.
Dwenle ɛhye anwo: Fane dodo nyɛ a ɔwɔ kɛ ɛkpondɛ amaneɛbɔlɛ bie anwo edwɛkɛ fofolɛ a?
Di wɔ ngyehyɛleɛ zo. Bɔ mɔdenle dwazo, di aleɛ, yɛ sua nu gyima na da kɛ mɔɔ wɔ ngyehyɛleɛ ne de la. Saa ɛyɛ ngyehyɛleɛ a ɔbamaa wɔanyia debie wɔayɛ ye dahuu na ɛhye bade wɔ adwenleadwenle zo.
Baebolo ngyinlazo: “Sonla mɔɔ bɔ mɔdenle yɛ gyima la ngyehyɛleɛ bawie boɛ.”—Mrɛlɛbulɛ 21:5.
“Mɔɔ COVID-19 ewulenzane ne bɔle ɔ bo la, mengyakyile ngyehyɛleɛ mɔɔ ɛnee melɛ la azo ɛlilɛ bɔkɔɔ na menzɛkyele mekɛ dɔɔnwo wɔ anyelielɛ ninyɛne nwo. Ɛnee mekulo kɛ mefa me mekɛ medi gyima kpalɛ ɔti menyɛle ninyɛne mɔɔ mebayɛ ye alehyenlɛ biala la anwo ngyehyɛleɛ.”—Joseph.
Dwenle ɛhye anwo: Ɛlɛ ngyehyɛleɛ mɔɔ ɛdi zo mɔɔ maa ɛnwu kɛ ɛvale wɔ mekɛ ɛlile gyima kpalɛ wɔ alehyenlɛ ne anu la ɔ?
Fa wɔ adwenle sie ninyɛne mgbalɛ zo. Saa ɛfa wɔ adwenle ɛsie ninyɛne mɔɔ anrɛɛ ɔwɔ kɛ ɛyɛ anzɛɛ mɔɔ bahola azi la azo a ɔbamaa wɔ adwenleadwenle ayɛ kpole. Emomu, dwenle ninyɛne nwiɔ anzɛɛ nsa mɔɔ ɛbahola wɔahile nwolɛ anyezɔlɛ la anwo.
Baebolo ngyinlazo: ‘Kile anyezɔlɛ.’—Kɔlɔsaema 3:15.
“Baebolo ne mɔɔ mekenga la ɛmmaa menva me adwenle menzie ninyɛndane zo emomu ɔmaa mefa me adwenle mesie ninyɛne mgbalɛ zo. Bie a ɛnrɛlie ɛhye ɛnrɛli noko ɔyɛ gyima kpalɛ!”—Lisa.
Dwenle ɛhye anwo: Ɛbɔ mɔdenle ɛfa wɔ adwenle ɛsie ninyɛne mgbalɛ mɔɔ ɛlɛkɔ zo wɔ wɔ ɛbɛlabɔlɛ nu la azo na ɛye mɔɔ ɛnle kpalɛ la ɛfi wɔ adwenle nu ɔ?
Dwenle awie mɔ anwo. Saa adwenleadwenle tɔ ɛ nwo a ɔnyɛ se kɛ ɛbahwe ɛ nwo wɔavi menli nwo noko kɛ anrɛɛ ɛbahwe ɛ nwo la dwenle mɔɔ ɛbahola wɔayɛ wɔaboa menli mɔɔ hyia moalɛ la anwo.
Baebolo ngyinlazo: ‘Mmadwenle ɛ ngomekye wɔ boɛyɛlɛ nwo, emomu dwenle awie mɔ noko ɛdeɛ nwo.’—Felepaema 2:4.
“Meboa awie mɔ a ɔmaa me nye die. Melɛmaa bɛ nye alie yɛɛ mekɛ ko ne ala melɛte me adwenleadwenle zo. Nɔhalɛ nu, menlɛ alagye mɔɔ mefa medwenledwenle a.”—Maria.
Dwenle ɛhye anwo: Nwane mɔ a ɛze ye kɛ bɛhyia moalɛ titili bie a, na duzu a ɛbahola wɔayɛ wɔboa bɛ a?
Nea wɔ kpɔkɛdelɛ zo boɛ. Kpundikpundi wɔ agbɔkɛ nu na die ɛ menle kpalɛ. Di aleɛ mɔɔ maa anwosesebɛ la. Saa ɛnea wɔ kpɔkɛdelɛ zo kpalɛ a ɔbamaa ɛ nye alie na yeaboa yeamaa wɔade wɔ adwenleadwenle zo.
Baebolo ngyinlazo: ‘Agbɔkɛ nu ɛkpundilɛ zo lɛ nvasoɛ.’—1 Timote 4:8.
“Me nee me ra nrenyia ne ɛngola ɛmkpundikpundi yɛ agbɔkɛ nu wɔ alienwo kpalɛ, ɔti yɛyɛ bie wɔ sua nu dahuu. Ɛhye maa yɛ nye die yɛɛ yɛ avinli ɛyɛ kpalɛ bɔbɔ.”—Catherine.
Dwenle ɛhye anwo: Asoo ɔwɔ kɛ ɛyɛ nzenzaleɛ wɔ wɔ aleɛlilɛ nee kɛzi ɛkpundikpundi wɔ agbɔkɛ nu la anu amaa wɔanyia kpɔkɛdelɛ kpalɛ ɔ?
Saa ɛye nzuzulɛ ɛhye mɔ mɔɔ boa maa bɛte adwenleadwenle zo la ɛsie ahane a, menli dɔɔnwo ɛnyia kenle bie nwo ɛwɔkɛ mɔɔ wɔ Baebolo ne anu mɔɔ bɛlɛsukoa la azo nvasoɛ. Nea edwɛkɛ “Duzu A Nyamenle Belemgbunlililɛ Ne Bayɛ A?”