MGBAVOLƐ NEE MBƐLƐRA BIZA KƐ
Agɔnwolɛvalɛ Mɔɔ Kola Kɔwie Agyalɛ Nu—Foa 1: Meziezie Me Nwo Kɛ Mefa Awie Agɔnwolɛ Amaa Yɛagya Ɔ?
Wɔ edwɛkɛ ɛhye anu
Duzu a le agɔnwolɛvalɛ mɔɔ kola kɔwie agyalɛ nu la?
Bie mɔ ɛmbu agɔnwolɛvalɛ mɔɔ kola kɔwie agyalɛ nu la kɛ ɔle anyebolo debie. Noko wɔ edwɛkɛ ɛhye anu, “agɔnwolɛvalɛ mɔɔ kola kɔwie agyalɛ nu” la kile menli nwiɔ mɔɔ fa bɛ nwo agɔnwolɛ na bɛnea saa bɛbahola bɛagya la. Ɔti bodane bie ati a nrenyia nee raalɛ fa agɔnwolɛ ɛhye a. Ɔnle mekɛ mɔɔ bɛnyia mekɛ maa bɛ nwo ala.
Mekɛ ɛlɛkɔ la, ɔwɔ kɛ agɔnwolɛvalɛ ne kɔwie agyalɛ nu anzɛɛ bɛpɛ zo. Saa ɛfa agɔnwolɛ zɛhae bie a, ɔwɔ kɛ ɛdie mɔɔ bavi nu ara la biala ɛto nu.
Nɔhalɛ edwɛkɛ: Ɔwɔ kɛ ɛsiezie ɛ nwo kɛ ɛbagya kolaa na wɔabɔ agɔnwolɛvalɛ ɛhye abo.
Saa ɛfa awie agɔnwolɛ amaa bɛagya wɔ mekɛ mɔɔ ɛtɛyɛle wɔ adwenle kɛ ɛgya la a, ɔle kɛ ɛlɛkpondɛ gyima wɔ mekɛ mɔɔ ɛtɛyɛle wɔ adwenle kɛ ɛyɛ gyima la
Wɔziezie ɛ nwo kɛ ɛfa awie agɔnwolɛ amaa bɛagya ɔ?
Agɔnwolɛvalɛ zɛhae kola kɔwie agyalɛ nu ɔti ɔwɔ kɛ ɛsuzu subane mɔɔ ɔbaboa agɔnwolɛvalɛ ne anzɛɛ ɔbazɛkye ye la anwo. Kɛ neazo la, suzu ɛhye mɔ anwo:
Subane mɔɔ ɛda ye ali wɔ wɔ abusua ne anu la. Kɛzi ɛyɛ wɔ awovolɛ nee ɛ mediema wɔ mekɛ mɔɔ wɔva ɛya la bahile kɛzi ɛbayɛ ɛ ye anzɛɛ ɛ hu la.
Baebolo ngyinlazo: “Bɛye ɛkpɔlɛ biala, ɛya, ɛya kpole, ɛdeɛdeanlɛ nee aholoba, yɛɛ debie ɛtane biala bɛgua.”—Ɛfɛsɛsema 4:31.
Biza ɛ nwo kɛ: ‘Asoo me awovolɛ nee me mediema baha kɛ mebu bɛ ɔ? Saa edwɛkɛ bie si a, asoo mekola mesiezie ye anzodwolɛ nu anzɛɛ mefa ɛya na me nee bɛ di butule ɔ?’
Saa ɛngola ɛ nee wɔ awovolɛ ɛndɛnla anzodwolɛ nu a, asoo ɛbahola ɛ nee ɛ hu anzɛɛ ɛ ye adɛnla anzodwolɛ nu ɔ?
Afɔlebɔlɛ. Saa ɛgya a, ɔwɔ kɛ ɛsuzu mɔɔ ɛ hu anzɛɛ ɛ ye kulo la anwo na ɛta ɛfa ninyɛne ɛbɔ afɔle.
Baebolo ngyinlazo: “Awie biala mmakpondɛ ɔ ngome ye boɛyɛlɛ, ɔkpondɛ awie mɔ noko ɛdeɛ.”—1 Kɔlentema 10:24.
Biza ɛ nwo kɛ: ‘Asoo dahuu mɔɔ mekulo la ala a meyɛ ɔ? Asoo menli bu me kɛ mete edwɛkɛ bo ɔ? Ninyɛne boni mɔ a meyɛ mefa mekile kɛ mefa awie mɔ ngyianlɛ medimoa me ɛdeɛ nyunlu a?’
Mɛlɛbɛnwoaze. Kunli anzɛɛ yelɛ kpalɛ die ye nvonleɛ to nu na ɔfi ahonle nu ɔkpa kyɛlɛ.
Baebolo ngyinlazo: “Yɛ muala yɛfo fane dɔɔnwo.”—Gyemise 3:2.
Biza ɛ nwo kɛ: ‘Asoo medie me nvonleɛ meto nu ndɛndɛ anzɛɛ mefa edwɛkɛ meyeye me nloa? Saa bɛtu me folɛ wɔ ninyɛne mɔɔ ɔwɔ kɛ menyia anyuhɔlɛ wɔ nu la anwo a, asoo mefa ɛya ɔ?’
Ezukoasɛm. Awie mɔɔ kola nea ezukoa zo kpalɛ la bahola ali ngyegyelɛ ko mɔɔ wɔ agyalɛ nu la anwo gyima.
Baebolo ngyinlazo: “Bɛ nuhua boni a kpondɛ kɛ ɔsi tawa a ɔnlimoa ɔndɛnla aze ɔnsese ye bolɛ ɔnnea kɛ saa ɔlɛ dɔɔnwo mɔɔ ɔbava yeawie la a?”—Luku 14:28.
Biza ɛ nwo kɛ: ‘Asoo mekola menea ezukoa zo boɛ anzɛɛ me nwo le kakɛ ngome ɔ? Duzu a kile kɛ mekola menea ezukoa zo boɛ a?’
Sunsum nu ninyɛne. Saa ɛle Gyihova Dasevolɛ a, ɔwɔ kɛ ɛyɛ ngyehyɛleɛ ɛsukoa Baebolo ne na ɛkɔ Kilisiene ayia dahuu.
Baebolo ngyinlazo: “Anyelielɛ a le bɛdabɛ mɔɔ bɛze bɛ sunsum nu ngyianlɛ la.”—Mateyu 5:3.
Biza ɛ nwo kɛ: ‘Asoo mebɔ mɔdenle meyɛ ninyɛne mɔɔ bamaa meanyia diedi kpole la ɔ? Asoo sunsum nu ninyɛne mɔɔ meyɛ la anwo hyia me kpalɛ, anzɛɛ memaa ninyɛne gyɛne twehwe me adwenle?’
Nɔhalɛ edwɛkɛ: Ɔwɔ kɛ ɛyɛ kunli anzɛɛ yelɛ kpalɛ ɛmaa awie mɔɔ ɛbagya ye la. Saa ɛbɔ mɔdenle kɛ ɛbayɛ zɔ a, ɛbanyia awie mɔɔ ɔdaye noko ɔbayɛ zɔ la.