MOALƐ MAA ABUSUA | AWOVOLƐYƐLƐ
Deɛmɔti Ɛgengalɛ Nwo Hyia Maa Ngakula La—Foa 1: Ɛbagenga Buluku Anzɛɛ Ɛbanlea Vidio?
Saa ɛ mra ɛlɛdie bɛ menle a, duzu a bɛbayɛ a: bɛbanlea vidio anzɛɛ bɛbagenga debie? Ɛhye mɔ anu boni a ɔnrɛyɛ se kɛ bɛbava a: smatfonu anzɛɛ buluku?
Wɔ ɛvolɛ dɔɔnwo mɔɔ ɛze ɛhɔ la, menli anye ɛnlie ɛgengalɛ nwo ɔlua TV zo gyimalilɛ yɛɛ akee nzinlii ninyɛne ngakyile mɔɔ bɛnea wɔ yintanɛte ne azo la ati. Jane Healy hɛlɛle wɔ ye 1990 buluku ne mɔɔ se Endangered Minds la anu kɛ, “Ɔnrɛhyɛ, bie a menli bagyakyi debie ɛgengalɛ.
Wɔ mekɛ zɔhane, bie a ɛbade nganeɛ kɛ menli ɛnrɛgyakyi ɛgengalɛ ɛlɛ. Noko akee, wɔ ɛvolɛ dɔɔnwo anzi, nwomama bie mɔ mɔɔ wɔ ɛleka mɔɔ bɛfa yintanɛte bɛdi gyima kpalɛ la ɛnwu ye kɛ, ngakula ɛngulo ɛgengalɛ kpalɛ kɛ dɛba ne.
Wɔ edwɛkɛ ɛhye anu
Duzu ati a ɛgengalɛ nwo hyia maa ngakula a?
Ɛgengalɛ maa yɛpɛ ninyɛne nwo nvoninli. Kɛ neazo la, saa ɛlɛkenga buluku bie a, bie a ɛbabiza ɛ nwo kɛ: kɛzi ɛnee menli mɔɔ wɔ nu la tendɛ ɛ? Kɛzi ɛnee bɛde ɛ? Duzu a ɛnee ɛbɔ bɛ nwo ɛyia a? Ɔnva nwo kɛ kɛlɛvolɛ ne baha ninyɛne bie mɔ la, ɔwɔ kɛ kengavolɛ ne noko fa ye adwenle bu ninyɛne bie mɔ.
Ninli bie mɔɔ bɛfɛlɛ ye Laura la ka kɛ, “Saa ɛnea vidio a, ɛnee ɛlɛnea debie mɔɔ awie ɛpɛ nwolɛ nvoninli dɛba la. Ɛhye bahola ayɛ anyelielɛ, noko saa ɛkenga debie a, ɔmaa ɛpɛ debie mɔɔ awie ɛhɛlɛ la anwo nvoninli.”
Ɛgengalɛ maa ngakula nyia subane mgbalɛ. Saa ngakula kenga debie a, ɔmaa bɛkola bɛdwenle ngyegyelɛ bie anwo na bɛdi nwolɛ gyima. Bieko, saa ngakula ɛlɛkenga debie a, ɔwɔ kɛ bɛfa bɛ adwenle bɛkɔ zo. Saa bɛyɛ zɔ a, ɔmaa bɛnyia subane le kɛ abotane, bɛnwozohomonlɛ nee anwunvɔnezelɛ.
Anwunvɔnezelɛ? Ɛhɛe! Nwomama bie mɔ die di kɛ, saa ngakula tɔ bɛ rɛle aze kenga debie a, ɔboa bɛ ɔmaa bɛte menli mɔɔ bɛlɛkenga bɛ nwo edwɛkɛ la nganeɛdelɛ bo. Na yemɔ maa ngakula kola da anwunvɔnezelɛ ali kile menli alehyenlɛ biala.
Ɛgengalɛ maa bɛdwenle ninyɛne nwo bɛkɔ moa. Menli mɔɔ kulo ɛgengalɛ la tɔ bɛ rɛle aze kenga debie na saa nwolɛ hyia bɔbɔ a bɛsia bɛkenga ye bieko amaa bɛade ɔ bo kpalɛ. Ɛhye boa bɛ maa bɛkakye edwɛkɛ ne na bɛnyia zolɛ nvasoɛ.—1 Timote 4:15.
Selɛ bie mɔɔ bɛfɛlɛ ye Joseph la hanle kɛ: “Saa ɛlɛkenga debie a, ɔnyɛ se kɛ ɛbadwenledwenle edwɛkɛ agbɔkɛ bie mɔ anwo, wɔava wɔatoto mɔɔ ɛze ye la anwo na wɔanwu ɛzukoalɛdeɛ mɔɔ wɔ nu la. Tɛ mekɛ ne amuala a vidio maa yɛdwenle ninyɛne nwo yɛkɔ moa a.”
Nɔhalɛ edwɛkɛ: Ɔwɔ nu kɛ nvasoɛ wɔ vidio nee ninyɛne gyɛne mɔɔ bɛnwu bɛ la azo ɛdeɛ, noko ɛ mra ne mɔ baminli ninyɛne dɔɔnwo saa bɛnnyia mekɛ bɛgenga debie a.
Kɛ ɔkɛyɛ na wɔamaa ngakula anye alie ɛgengalɛ nwo la
Bɔ ɔ bo ndɛ. Chloe, ninli bie mɔɔ lɛ ngakula mrenyia nwiɔ la hanle kɛ: “Mɔɔ melɛnrenzɛ bɛ la yɛɛ yɛbɔle ɔ bo kɛ yɛkenga debie yɛahile bɛ a yɛɛ yɛdoale zo wɔ bɛ awolɛ nzi. Ɔyɛ yɛ fɛ kɛ yɛangyakyi ye ɛyɛlɛ la. Nzinlii, bɛ nye raliele nwo kɛ bɛbagenga debie dahuu.”
Baebolo ngyinlazo: “Sumunli wɔ ngakula nu, ɛze ngɛlɛlera nwuanzanwuanza ne.”—2 Timote 3:15.
Maa wɔ sua nu ɛyɛ ɛleka mɔɔ maa ngakula nye die ɛgengalɛ nwo a. Amaa ɛ mra anye alie ɛgengalɛ nwo la, bɔ mɔdenle nyia mbuluku mɔɔ bɛbagenga la wɔ sua nu. Tamara, ninli mɔɔ lɛ ngakula nna la ka kɛ “Kpondɛ mbuluku mɔɔ ɛ ra ne anye balie ye ɛgengalɛ nwo na fa gua ɛleka mɔɔ bikye ye ɛkpa ne la.”
Baebolo ngyinlazo: “Tete kakula wɔ adenle mɔɔ ɔwɔ kɛ ɔfa zo la anu; saa ɔyɛ kpanyinli bɔbɔ a ɔnrɛvi zolɛ.”—Mrɛlɛbulɛ 22:6.
Te mekɛ mɔɔ bɛfa bɛkɔ yintanɛte ne azo la azo. Selɛ bie mɔɔ bɛfɛlɛ ye Daniel la suzu kɛ, ɔbayɛ kpalɛ kɛ bɛbanyia nɔsolɛ ko mɔɔ awie biala ɛnrɛva ye ɛlɛtɔlɔneke ninyɛne ɛnrɛli gyima a. Ɔhanle kɛ: “Saa nɔsolɛ ko bɔbɔ yɛɛ yɛbanyia wɔ dapɛne ne anu a, yɛnua TV ne, na yɛfa nwolɛ adenle ne yɛkenga debie.”
Baebolo ngyinlazo: ‘Bɛnwu ninyɛne mɔɔ hyia kpalɛ la.’—Felepaema 1:10.
Yɛ neazo. Karina, ninli bie mɔɔ lɛ ngakula mraalɛ nwiɔ la ka kɛ: “Saa ɛlɛkenga debie wɔahile ɛ mra a, maa ɔyɛ anyelielɛ. Saa ɛ nye die ɛgengalɛ nwo a, bie a ɛ mra ne mɔ noko bazukoa.”
Baebolo ngyinlazo: ‘Maa ɛ nye ɛbolo bagua nu ɛgengalɛ nwo.’—1 Timote 4:13.
Tɛ ngakula kɔsɔɔti a anye balie ɛgengalɛ nwo a. Noko akee, wɔ anwosesebɛmaanlɛ ne bahola aboa ɛ mra ne mɔ, bie a ɛnee yemɔ a bɛhyia nwo a. David, selɛ bie mɔɔ lɛ ngakula mraalɛ nwiɔ la yɛ mɔɔ tɛla zɔ la. Ɔka kɛ: “Mekenga mbuluku mɔɔ me mra mraalɛ ne mɔ kenga la bie na yemɔ maa menwu ninyɛne mɔɔ bɛ nye die nwo la na yɛbɔ nwolɛ adawu. Ɛnee yɛle ekpunli ekyi mɔɔ yɛkenga debie yɛbɔ nu. Ɛnee ɔyɛ anyelielɛ kpalɛ!”