Kilehile Menli Mɔɔ Bɛnze Kenga La
1. Ngyegyelɛ boni a yɛkola yɛyia wɔ daselɛlilɛ nu a?
1 Saa yɛkɔ daselɛlilɛ a, yɛta yɛyia menli mɔɔ bɛnze kenga kpalɛ mɔɔ ɔwɔ kɛ yɛkilehile bɛ nɔhalɛ ne la. Duzu a yɛbayɛ a?
2. Adenle boni azo, yɛɛ kɛmɔti a yɛdi menli mɔɔ bɛnze kenga la eni ɛ?
2 Di Bɛ Eni: Mɔɔ wɔ sonla ahonle nu la a anwo hyia Gyihova a, na tɛ ye ewiade nwomazukoalɛ ɔ. (1 Sam. 16:7; Mrɛ. 21:2) Ɛhye ati, yɛmbu menli mɔɔ bɛnze kenga kpalɛ la kɛ bɛ nwo ɛngyia. Saa yɛdi bɛ eni na yɛsi abotane a, ɔda ali kɛ menli ɛhye balie ado nu kɛ yɛboa bɛ. (1 Pita 3:15) Ɛhye kile kɛ ɔnle kɛ yɛyɛ ye kyengye kɛ ahenle ɛgenga tɛkese anzɛɛ ɛdendɛkpunli bie. Mekɛ mɔɔ awie ɛlɛsukoa Baebolo ne anu nɔhalɛ ne mɔɔ sonle bolɛ ahɔ ɔ nyunlu la, ɔ nye babolo kɛ ɔkɛnwu debie kenga amaa yeava anyelielɛ yeagenga Nyamenle Edwɛkɛ ne na ‘yeadwenledwenle nwolɛ alehyenlɛ nee aledwolɛ.’—Edw. 1:2, 3.
3. Ndenle boni a yɛbahola yɛalua zo yɛahilehile menli mɔɔ bɛnze kenga kpalɛ la ɛ?
3 Dua Ndenle Ngakyile zo Yɛ Baebolo Ɛzukoalɛ: Nvoninli boa maa yɛkilehile menli kpalɛ na ɔmaa bɛkakye mɔɔ bɛkɛzukoa la. Ɛbahola wɔabiza sukoavo ne wɔamaa yeaha nvoninli mɔɔ wɔ buluku mɔɔ bɛlɛsukoa la anu la anwo edwɛkɛ. Akee biza ye kpuyia fɔɔnwo bie mɔ mɔɔ baboa yeamaa yeade mɔɔ nvoninli ne kile la abo. Fa ngɛlɛlera ne mɔɔ ɛbava wɔahilehile nvoninli ne anu ninyɛne bie la di gyima. Ɛbahola noko wɔava nvoninli ne wɔazuzu ɛzukoalɛdeɛ ne anwo bieko. Mmamaa bɛsukoa ninyɛne dɔɔnwo wɔ mekɛ ko anu. Twe adwenle kɔ edwɛkɛtile ne nee ɛzukoalɛdeɛ ne anu edwɛkɛtitile ne mɔ azo, na koati kɛ ɛkɛva edwɛkɛ gyɛne ɛkɛboka nwo. Kenga ngɛlɛlera ne fi Baebolo ne anu, na biza ye kpuyia mɔɔ bamaa wɔanwu kɛ sukoavo ne te mɔɔ bɛzukoa la abo la. Ɛhye ba amaa yeanyia ɛhulolɛ kɛ ɔkɛnwu debie kenga amaa ɔdaye yeahola yeakpondɛ Baebolo ne anu nɔhalɛ dɔɔnwo.
4. Kɛzi yɛbahola yɛaboa yɛ sukoavo ne yɛamaa yeanwu kenga ɛ?
4 Moalɛ Mɔɔ Maa Bɛkola Kenga: Menli mɔɔ bɛnze debie kenga kpalɛ anzɛɛ bɛannyia adenle bɛanzukoa debie ɛgengalɛ kpalɛ la kola te edwɛkɛ bo na bɛfa bɛsie bɛmaa ɔkyɛ. Yɛbahola yɛaboa menli zɛhae yɛamaa bɛadie ɛgengalɛ. Saa bɛlɛkenga debie na sukoavo ne nea ye ɛdeɛ ne anu di kengavolɛ ne anzi na bɔbɔ ɔbobɔ edwɛkɛ agbɔkɛ ne mɔ bie a, ɔbaboa ye yeamaa yeanwu debie kenga. Ɔbahola noko yeanyia nvasoɛ yeavi brohyua ne mɔɔ se Apply Yourself to Reading and Writing ne la azo. Wɔ ɛleka ne bie mɔ, mgbanyima ne mɔ bahola ayɛ debie ɛgengalɛ nwo ngyehyɛleɛ wɔ asafo ne anu. Nzuzulɛ kpalɛ ɛhye mɔ bamaa yɛahola yɛaboa menli mɔɔ bɛnze kenga kpalɛ la yɛamaa bɛade Nyamenle Edwɛkɛ ne mɔɔ maa nrɛlɛbɛ na ɔkola ɔmaa bɛnyia ngoanelielɛ la abo.—2 Tem. 3:15.