Duzu A Baebolo Ne Ka Ye Wɔ Ewulenzane Nwo A?
Baebolo ne bua kɛ
Baebolo ne hanle dole ɛkɛ ne kɛ, ewule ngakyile (mɔɔ bie a le ewulenzane la) bara wɔ awieleɛ mekɛ ne anu. (Luku 21:11) Ewulenzane zɛhae mɔ ɛngile kɛ Nyamenle ɛlɛdi yɛ nzenralɛ anzɛɛ ɔlɛtwe yɛ nzo. Ɔnrɛhyɛ, Nyamenle balua ye Belemgbunlililɛ ne azo aye anwodolɛ kɔsɔɔti mɔɔ ewulenzane boka nwo la avi ɛkɛ.
Asoo Baebolo ne hanle ewulenzane nwo edwɛkɛ dole ɛkɛ?
Baebolo ne anga kɛ ewulenzane fɔɔnwo le kɛ COVID-19, AIDS anzɛɛ Spanish flu bara. Noko ɔhanle kɛ “ewulenzane” bara. (Luku 21:11; Yekile 6:8) Ninyɛne ɛhye mɔ le sɛkɛlɛneɛ mɔɔ kile kɛ yɛwɔ “mekɛ mɔɔ li awieleɛ la anu” anzɛɛ “mekɛ ɛhye ɛlɛkɔ awieleɛ.”—2 Timote 3:1; Mateyu 24:3.
Asoo Nyamenle ɛva anwodolɛ ɛhwe menli nzo ɛlɛ?
Baebolo ne ka mekɛ bie mɔ mɔɔ Nyamenle vale anwodolɛ hwenle menli nzo la anwo edwɛkɛ. Kɛ neazo la, ɔmaanle kokobɛ guale menli bie mɔ. (Nɔmbɛse 12:1-16; 2 Arelemgbunli 5:20-27; 2 Edwɛkɛsisilɛ 26:16-21) Noko ewule ɛhye mɔ ansalo anga menli gyɛne mɔɔ bɛnze nwolɛ bie la. Emomu, Nyamenle vale hwenle menli mɔɔ dele ɔ nwo atua la anzo.
Asoo Nyamenle ɛlɛfa ewulenzane mɔɔ ɛra ɛnɛ la ahwe yɛ nzo?
Kyɛkyɛ. Menli bie mɔ ka kɛ Nyamenle ɛlɛfa ewulenzane nee ewule ngakyile ahwe menli nzo ɛnɛ. Noko, Baebolo ne ɛnga ye zɔ. Duzu ati ɔ?
Ɔluakɛ Nyamenle tete azonvolɛ bie mɔ anwo dole bɛ kpole yɛɛ ɛnɛ noko ye azonvolɛ bie mɔ anwo to bɛ kpole. Kɛ neazo la, ɛnee nɔhavonli Timote ‘anwo ta toto ye.’ (1 Timote 5:23) Noko Baebolo ne ɛnga kɛ ɛnee Nyamenle anye ɛnlie bɛ nwo bieko la ati a bɛ nwo dole bɛ a. Zɔhane ala a ɛnɛ noko, Nyamenle azonvolɛ mɔɔ di nɔhalɛ la bie mɔ anwo to bɛ anzɛɛ bɛnyia ewule a. Fane dɔɔnwo ne ala, bie a esiane mɔɔ zile la a maanle menli ɛhye mɔ hɔle tɛnlabelɛ zɔhane anu a.—Nolobɔvo 9:11.
Bieko, Baebolo ne maa yɛnwu kɛ, mekɛ mɔɔ Nyamenle bava ahwe amumuyɛma anzo la ɛtɛdwule. Emomu, yɛde “ngoanelielɛ kenle ne” anu—mekɛ mɔɔ Nyamenle ɛlɛto ɛsalɛ avɛlɛ alesama kɔsɔɔti kɛ bɛbikye ye amaa bɛanyia ngoane la. (2 Kɔlentema 6:2) Adenle ko mɔɔ ɔlɛdua zo yeayɛ ɛhye la a le “Belemgbunlililɛ ne anwo edwɛkpa” ne mɔɔ bɛlɛbɔ ye nolo wɔ ewiade amuala la.—Mateyu 24:14.
Asoo ewulenzane bara awieleɛ?
Ɛhɛe. Baebolo ne ka kɛ, ɔnrɛhyɛ awie biala anwo ɛnrɛdo ye. Saa Nyamenle Belemgbunlililɛ ne ba a, ɔbaye anwodolɛ biala yeavi ɛkɛ. (Ayezaya 33:24; 35:5, 6) Ɔbaye amaneɛnwunlɛ, nyane nee ewule yeavi ɛkɛ. (Yekile 21:4) Na ɔbadwazo mowuamra na yeamaa bɛanyia kpɔkɛdelɛ kpalɛ wɔ azɛlɛ ye azo mɔɔ debie biala ɛngyegye bɛ a.—Edwɛne 37:29; Gyima ne 24:15.
Baebolo tɛkese mɔɔ fale anwodolɛ nwo la
Mateyu 4:23: ‘Gyisɛse hɔkpɔsale Galeli amuala, ɔhilehilele wɔ bɛ nyianu azua ne mɔ anu na ɔbɔle Belemgbunlililɛ ne anwo edwɛkpa ne nolo na ɔyɛle menli mɔɔ anwodolɛ nee ewule ngakyile wɔ bɛ nwo la ayile.’
Ɛhye kile kɛ: Nwanwane gyima ekyi mɔɔ Gyisɛse yɛle la maa yɛnwu mɔɔ ɔnrɛhyɛ Nyamenle Belemgbunlililɛ ne bayɛ amaa alesama kɔsɔɔti la.
Luku 21:11: “Ewulenzane bara.”
Ɛhye kile kɛ: Ewule ngakyile mɔɔ ɛra la boka sɛkɛlɛneɛ mɔɔ kile kɛ yɛwɔ awieleɛ mekɛ nu la anwo.
Yekile 6:8: ‘Nea! ɛkpɔnwɔ nzonle bie, na ahenle mɔɔ de zo la duma a le Ewule. Na Nla li ɔ nzi ɛkɛ ne ala. Na bɛmaanle bɛ tumi kɛ bɛva ewulenzane bɛhu bɛ.’
Ɛhye kile kɛ: Mgbɔnwɔkavoma nna ne anwo ngapezo mɔɔ wɔ Yekile buluku ne anu la maa yɛnwu kɛ ewulenzane bara yɛ mekɛ ye azo.