Kile Gyihova Kpalɛyɛlɛ Ne Anwo Anyezɔlɛ
GYIHOVA le Nyamenle mɔɔ yɛ kpalɛ. (Gyemise 1:17) Yɛnwu ye kpalɛyɛlɛ ne wɔ debie biala mɔɔ yebɔ la anu. Yemaa nwɔlɔra ɛyi anwomanyunlu, yɛɛ yemaa mbaka ngɛnlɛma ɛyi azɛlɛ ye azo.—Edwɛndolɛ 65:12, 13; 147:7, 8; 148:3, 4.
Edwɛndolɛnli ne mɔɔ hɛlɛle Edwɛndolɛ 104 la hilele anyezɔlɛ wɔ mɔɔ Gyihova ɛbɔ la amuala anwo, yemɔti ɔhɛlɛle edwɛne kɛ ɔfa yeaye ye ayɛlɛ. Saa ɛkenga edwɛndolɛ ɛhye a, asoo ɛkile anyezɔlɛ kɛ edwɛndolɛnli ne la? Ɔhanle kɛ: “Mekɛ tendenle mɔɔ mede aze la, mebado edwɛne meamaa [Gyihova]; mede ngoane nu la, mebado ayɛlɛyelɛ edwɛne meamaa me Nyamenle.” (Edwɛndolɛ 104:33) Ɛkulo kɛ ɛyɛ zɔhane ala ɔ?
KPALƐYƐLƐ NWO NEAZO MƆƆ TƐLA BIALA
Gyihova kulo kɛ yɛsukoa ye kpalɛyɛlɛ ne. Eza yemaa yɛnwu deɛmɔti ɔwɔ kɛ yɛyɛ kpalɛ la. Ɔmaanle sunsum ne maanle ɛzoanvolɛ Pɔɔlo hɛlɛle kɛ: “Tendɛ kile bɛdabɛ mɔɔ bɛlɛ ngoane ɛhye anu anwonyia la kɛ bɛmmamemaa bɛ nwo zo, yɛɛ bɛmmafa bɛ nye bɛto ninyɛne mɔɔ pɛ nu se kɛ anwonyia la azo, bɛmaa bɛ nye ɛla Nyamenle mɔɔ maa yɛ debie biala molozo mɔɔ yɛfa yɛdie yɛ nye la anwo zo. Ɔwɔ kɛ bɛyɛ nyele, bɛkɔ zolɛ bɛyɛ nyɛleɛ kpalɛ, bɛfa atiakunlukɛnlɛma nee ɛhulolɛ bɛkyɛ debie. Ye zɛhae ɛnee bɛlɛkuohua bɛ agyadeɛ nloa mɔɔ bayɛ sua bo ɛdolɛ amaa bɛ wɔ kenle bie, amaa bɛ sa aha ngoane ne mɔɔ le nɔhalɛ ngoane ne la.”—1 Temɔte 6:17-19.
Wɔ Pɔɔlo kɛlata mɔɔ tɔ zo nwiɔ mɔɔ ɔhɛlɛle Kɔlentema la anu, ɔhilele adwenle mɔɔ ɔwɔ kɛ yɛnyia wɔ mekɛ mɔɔ yɛlɛkyɛ awie mɔ debie la. Ɔhanle kɛ: “Awie biala ɛva mɔɔ yezuzu nwo wɔ ye ahonle nu la ɛmaa. Ɔmmatwenlehwenle ɔ bo aze anzɛɛ ɔyɛ ye kɛ asɛɛ yemia la ati ɔ, ɔluakɛ Nyamenle kulo sonla mɔɔ te ɔ nyunlu kyɛ debie la.” (2 Kɔlentema 9:7) Saa yɛyɛ nyele a, nwane mɔ a yɛboa bɛ a? Pɔɔlo hanle kɛ saa yɛfa mɔɔ awie mɔ hyia nwo la yɛmaa bɛ a ɛnee yɛlɛboa bɛ, noko eza yɛboa yɛ nwo ɔluakɛ Gyihova bayila yɛ.—2 Kɔlentema 9:11-14.
Akee Pɔɔlo hanle kpalɛyɛlɛ nwo neazo mɔɔ tɛla biala mɔɔ Nyamenle ɛyɛ la anwo edwɛkɛ kɛ: “Bɛmaa yɛyɛ Nyamenle mo wɔ ye nwanwane ahyɛlɛdeɛ ne ati.” (2 Kɔlentema 9:15) Ninyɛne mgbalɛ mɔɔ Gyihova ɛlua Gyisɛse Kelaese anwo zo ɛva ɛmaa yɛ la amuala boka “nwanwane ahyɛlɛdeɛ” ne anwo. Yɛnrɛhola yɛnrɛhile kɛzi ahyɛlɛdeɛ ɛhye sonle bolɛ la anu.
Kɛ ɔkɛyɛ na yɛahile kɛ yɛ nye sɔ mɔɔ Gyihova nee Gyisɛse ɛyɛ nee mɔɔ bɛbayɛ bɛamaa yɛ la ɛ? Adenle ko a le kɛ ɔwɔ kɛ yɛfa yɛ mekɛ, yɛ anwosesebɛ nee yɛ nwonane afoa nu ninyɛne yɛsonle Gyihova na yɛboa awie mɔ yɛmaa bɛsukoa ɔ nwo debie. Saa yɛlɛ dɔɔnwo anzɛɛ ekyi bɔbɔ a, yɛbahola yɛayɛ ɛhye.—1 Edwɛkɛsisilɛ 22:14; 29:3-5; Luku 21:1-4.