‘Gyima Ne Le Kpole’

ƐNEE ɔle ayia titili wɔ Gyɛlusalɛm. Ɛnee Belemgbunli Devidi ɛvɛlɛ ye mgbanyima, safohyenle mgbanyima nee maanle ne anu katakyiema kɔsɔɔti. Bɛ nye liele nolobɔlɛ titili ne mɔɔ hɔle zo la anwo. Gyihova ɛkpa Devidi ara Sɔlɔmɔn kɛ ɔzi sua kpole bie mɔɔ bɛbazonle nɔhalɛ Nyamenle ne wɔ nu la. Devidi mɔɔ ɛnee yeyɛ kpanyinli la vale sua ne anwo ngɛlata mɔɔ bɛluale sunsum ne azo bɛvale bɛmaanle ye la ɔmaanle Sɔlɔmɔn. Ɔhanle kɛ: ‘Gyima ne mɔɔ gyi ɔ nyunlu la le kpole. Ɔluakɛ ɛzonlenlɛ sua ne mɔɔ bɛbazi la ɛnle sonla ɛdeɛ. Ɔle Gyihova Nyamenle ne ɛzonlenlɛ sua.’​—1 Ek. 28:1, 2, 6, 11, 12; 29:1.

Akee Devidi bizale kɛ: ‘Nwane a ɔdaye noko ɛnɛ kenle ye ɔkɛyeye ye ahonle nu ɔkɛva debie ɔkɛmaa Gyihova a?’ (1 Ek. 29:5) Saa ɛnee ɛwɔ ɛkɛ a, anrɛɛ duzu a ɛbayɛ a? Anrɛɛ debie baha wɔ yeamaa wɔaboa gyima kpole ne ɔ? Yizilayɛma yɛle debie. Menli ne ‘yeyele bɛ ahonle nu vale ninyɛne maanle Gyihova na bɛ nye liele kɛ bɛhola bɛyeye ninyɛne dɔɔnwo zɛhae a.’​—1 Ek. 29:9.

Ɛvolɛ dɔɔnwo anzi, Gyihova vale debie mɔɔ sonle bolɛ tɛla ɛzonlenlɛ sua ne la ziele ɛkɛ. Ɔvale sunsum nu ɛzonlenlɛ sua kpole ne mɔɔ le ngyehyɛleɛ mɔɔ Nyamenle ɛyɛ mɔɔ maa alesama dua Gyisɛse afɔlebɔlɛ ne azo bɛsonle ye la ɔziele ɛkɛ. (Hib. 9:11, 12) Kɛzi Gyihova ɛlɛboa menli yeamaa bɛava ye agɔnwolɛ ɛnɛ ɛ? Ɔlua yɛ ɛdoavolɛyɛlɛ gyima ne azo. (Mat. 28:19, 20) Ɔlua gyima ɛhye azo, ɛvolɛ biala yɛyɛ Baebolo ɛzukoalɛ mgbe dɔɔnwo, bɛsɔne ɛdoavolɛma apenle apenle, yɛɛ bɛte asafo dɔɔnwo.

Ɛhye ati ɔwɔ kɛ yɛpelente Baebolo nwo mbuluku dɔɔnwo, yɛsisi Belemgbunlililɛ Asalo na yɛnea zo boɛ, na yɛnyia ɛleka mɔɔ yɛbayɛ maangyebakyi nee maanzinli nyianu la dɔɔnwo. Ɛnlie ɛndo nu kɛ edwɛkpa ne mɔɔ yɛbɔ ye nolo la le gyima kpole mɔɔ nvasoɛ wɔ zo ɔ?​—Mat. 24:14.

Nyamenle nee menli nwo ɛlɔlɛ nee Belemgbunlililɛ nolobɔlɛ gyima ne mɔɔ ɔhyia ndɛndɛ la maa Nyamenle menli ne ‘yeye bɛ ahonle nu fa ahyɛlɛdeɛ maa Gyihova’ ɔlua ndoboa mɔɔ bɛye la azo. Yɛ nye die kɛ yɛbava yɛ anwonyia yɛali Gyihova eni amaa bɛava bɛali gyima wɔ nrɛlɛbɛ nee nɔhalɛlilɛ nu bɛaboa gyima kpole mɔɔ tɛla biala wɔ alesama tetedwɛkɛ nu la.​—Mrɛ. 3:9.