Avonle Mɔɔ Ɛnee Bɛfa Bɛkye Fɛlɛ Wɔ Tete Ne La

Bie a menli mɔɔ kenga Baebolo ne la bahakye kɛ ɛnee Gyisɛse ɛdoavolɛma bie mɔ le fɛlɛkyevoma. (Maake 1:​16-20) Ɛnee bɛfa avonle bɛkye fɛlɛ wɔ Galeli Nyevile ne anu.

Saa bɛlɛyɛ avonle a, bɛfa nyɛma bɛbobɔ ye agbɔkɛ bɛnwo too bɛmaa ɔyɛ kɛ ndenda mɔɔ adokule dɔɔnwo wɔ nu la. Saa avonle ne adokule ne le ngyikyi a, ɔbahye fɛlɛ ngyikyi yɛɛ saa ɔle mgbole noko a, ɔbahye fɛlɛ mgbole. Saa avonle ne le asawu, kile kɛ ɔle ekyi a, bɛfa sumi anzɛɛ awolɛ bɛkyekye ɔ nloa amaa yeahola yeanloma. Yɛɛ saa avonle ne le kpole a, yemɔ ɔ nloa ne le nwiɔ. Ɔti ɔdaye noko bɛfa sumi anzɛɛ awolɛ bɛkyekye ɔ nloa ne ko amaa yeanloma na akee bɛava boya (avela) bɛakyekye ɔ nloa ɛhendeɛ ne amaa yemɔ atulu zolɛ.

Ɛnee avonle mɔɔ bɛfa bɛkye fɛlɛ la bolɛ yɛ se kpalɛ. Saa awolɛ mgbole wɔ nyevile ne abo anzɛɛ bɛkye fɛlɛ dɔɔnwo a, ɔkola ɔsɛkye avonle ne. (Luku 5:6) Baebolo ne ka Gyemise nee Dwɔn mɔɔ ɛnee “bɛlɛyɛ bɛ avonle boɛ” la anwo edwɛkɛ. Ɔbayɛ kɛ ɛnee bɛlɛfa agbuyiaba (agbuyia) nee nyɛma a bɛayɛ a. (Mat. 4:21) Bie a bɛkɔkye fɛlɛ bɛba biala a, bɛyɛ avonle ne boɛ. Luku noko hanle fɛlɛkyevoma mɔɔ ɛnee ‘bɛlɛwowo bɛ avonle nu’ bɛayeye ewula mɔɔ wɔ nu la anwo edwɛkɛ. (Luku 5:2) Saa bɛwowo nu bɛwie a, bɛrɛlɛ nuhua bɛmaa ɔwe. Bie a bɛyɛ ye zɔ amaa avonle ne anzɛkye.—Yiz. 47:10.

Gyisɛse vɛlɛle menli mɔɔ ɛnee bɛkye fɛlɛ la na ɔhanle ɔhilele bɛ kɛ, “mebamaa bɛahye menli kɛ bɛkye fɛlɛ la.”