KPUYA MƆƆ VI KENGAVOLƐMA ƐKƐ

Ngyekyeleɛ nwiɔ boni mɔ a ɛzoanvolɛ Pɔɔlo hanle nwolɛ edwɛkɛ wɔ Galeehyeama 4:24 a?

Mɔɔ ɛzoanvolɛ Pɔɔlo hanle abusuabɔlɛ mɔɔ wɔ Ebileham nee Sɛla yɛɛ Heega avinli la anwo edwɛkɛ wiele la, eza ɔhanle kɛ: “Bɛvale ninyɛne ɛhye mɔ bɛgyinlanle ɛkɛ bɛmaanle debie; ɔluakɛ mraalɛ ɛhye mɔ gyi ɛkɛ ne maa ngyekyeleɛ nwiɔ.” (Gal. 4:​22-24) Dɛba ne, yɛdele ɔ bo kɛ ngyekyeleɛ nwiɔ ne a le Mɛla ngyekyeleɛ ne nee ngyekyeleɛ fofolɛ ne. Noko akee, ngɛlɛlera ɛhye mɔɔ yɛzuzu nwo bieko la ɛmaa yɛnwu kɛ ɔhyia kɛ yɛyɛ nzenzaleɛ bie. Ɔbayɛ kɛ Ebileham ngyekyeleɛ ne a ɛnee Pɔɔlo ɛlɛka nwolɛ edwɛkɛ a, na tɛ ngyekyeleɛ fofolɛ ne ɔ. Deɛmɔti ɔhanle ye zɔ la bie mɔ ɛne.a

Pɔɔlo vale Heega mɔɔ le akɛlɛ la totole Saenae Boka ne anwo. (Gal. 4:25) Ɔti ɛnee Heega gyi ɛkɛ maa Mɛla ngyekyeleɛ ne mɔɔ bɛyɛle ye wɔ Saenae Boka ne abo wɔ ɛvolɛ 1513 K.Y.M la. (Ɛzɛ. 19:​5, 6) Ɛnee sonla dasanli biala mɔɔ ɛnli munli la ɛnrɛhola ɛnrɛli Mɛla ne azo pɛpɛɛpɛ, ɔti ɔhakyele Dwuuma ne kɛ bɛle ngɛkɛlɛ bɛmaa ɛtane. Ɛnee ngyekyeleɛ ɛhye bahola aboa Yizilayɛma yeamaa bɛanwu Mɛzaya ne, sonla dasanli kokye mɔɔ bahola ali Mɛla ne azo pɛpɛɛpɛ la. Mɔɔ Mɛzaya ne vale ye ngoane mɔɔ di munli la bɔle afɔle la, ɔmaanle alesama mɔɔ ɛnli munli la nyianle nwolɛ adenle kɛ bɛbahola bɛalie bɛ bɛavi ɛtane nee ewule nu. (Gal. 3:​19, 24, 25) Mɔɔ Gyisɛse maanle Nyamenle bodane ne rale nu la anzi, ɛnee akee yɛngyia Mɛla ne anwo bieko.—Wlo. 10:4.

Pɔɔlo hanle kɛ Heega le ngakyile fi Sɛla, “dehelɛ raalɛ ne” mɔɔ ‘luale ɛwɔkɛ zo a wole’ la anwo. (Gal. 4:23) Ɛwɔkɛ zɔhane a le Ebileham ngyekyeleɛ ne. (Gal. 3:29; 4:​28, 30) Bɛha nwolɛ edwɛkɛ sikalɛ wɔ Gyɛnɛsese 22:18. Gyihova hanle kɛ: “Ɔlua ɛ ra ne [Ebileham ara ne] anwo zo, azɛlɛ ne azo maanle maanle kɔsɔɔti banyia nyilalɛ, ɔluakɛ wɔdie me ne.”

Zɔhane ngyekyeleɛ ne mɔɔ Gyihova nee Ebileham yɛle la maanle bɛnwunle ɛwɔkɛ mɔɔ Gyihova bɔle wɔ Yidɛn tola ne anu la anwo edwɛkɛ dɔɔnwo. (Gyn. 3:15) Yɛnwu ye wɔ edwɛkɛ ne anu kɛ “ralɛ” ne mɔɔ bɛhanle ɔ nwo edwɛkɛ la bavi Ebileham anu a ara a. Pɔɔlo hilehilele nu kɛ, “ralɛ” ɛhye gyi ɛkɛ titili maa Gyisɛse Kelaese. Noko akee, menli 144,000 ne mɔɔ bɛkpokpa bɛ mɔɔ “bɛle Kelaese ɛdeɛ,” na bɛ nee Gyisɛse bali tumi wɔ ye Belemgbunlililɛ ne anu la noko boka sɛkɛlɛneɛ adenle zo ralɛ ɛhye anwo. (Gal. 3:​16, 29; Yek. 14:​1-3) Ɔlua ɛwɔkɛ mɔɔ Nyamenle bɔle Ebileham la ati, menli mɔɔ bɛdie Gyisɛse bɛto nu na bɛtie ye la banyia nyilalɛ dɔɔnwo.

Noko duzu ati a Pɔɔlo vale ndonwo zɔhane lile gyima a? Ɛnee ɔlɛkile kɛ saa Dwuuma mɔɔ wɔ ɛkɛ ne wɔ ye mekɛ zo la kɔ zo di Mosisi Mɛla ne azo a, bɛbahɔ zo bɛayɛ ngɛkɛlɛ kɛ Heega la. Noko akee saa bɛdie Ebileham ara titili ne, mɔɔ yemɔ a le Gyisɛse Kelaese la bɛto nu a, bɛbayɛ alehelɛ kɛ Sɛla la. Bɛbalie bɛ bɔkɔɔ bɛavi ɛtane nee ewule tumi bo. (Dwɔn 8:​32-34) Saa bɛanlie Gyisɛse bɛando nu a, ɔkile kɛ bɛande ɔ bo kɛ Mɛla ngyekyeleɛ ne ɛlɛkile bɛ adenle ahɔ Kelaese ɛkɛ.

Galeehyeama mɔɔ ɛnee Pɔɔlo ɛlɛkɛlɛ edwɛkɛ ɛhye ahɔmaa bɛ la anu dɔɔnwo ɛnle Dwuuma, ɔti bɛanli Mɛla ne azo ɛlɛ. Noko ɛnee Dwuuma bie mɔ gyi zo kyengye kɛ ɔwɔ kɛ bɛdabɛ mɔɔ bɛnle Dwuuma la di Mɛla ne azo na bɛmaa bɛpɛ bɛ mrenyia zo. Pɔɔlo hilehilele nu kɛ nrɛlɛbɛ ɛnle nu kɛ menli ɛhye mɔ bali Mɛla ne mɔɔ maa bɛyɛ “ngɛkɛlɛ” la azo, ɔluakɛ Kelaese ati bɛnyia “fanwodi” dɛba.—Gal. 5:​1, 10-14.