Gyisɛse Yele Ɔ Nwo Hilele Fɛlɛkyevoma Ne

Mɔɔ Gyisɛse yele ɔ nwo hilele ɛzoanvolɛ ne mɔ la anzi, Pita yɛle kɛ ɔkahye fɛlɛ wɔ Galeli Nyevile ne anu. Tɔmase, Gyemise, Dwɔn yɛɛ ɛdoavolɛma gyɛne nee ye hɔle. Bɛyɛle gyima nɔe ne amuala noko bɛangye fɛlɛ ko bɔbɔ.

Aleɛ hyenle nwonlomɔ mangyee ne la, bɛnwunle kɛ nrenyia bie gyi nyevile ne anloa. Ɔbizale bɛ kɛ: ‘Bɛhyele fɛlɛ ɔ?’ Bɛhanle kɛ: “Kyɛkyɛ!” Nrenyia ne hanle kɛ: “Bɛdo avonle ne wɔ ɛlɛne ne fema zo.” Mɔɔ bɛdole avonle ne la, bɛhyele fɛlɛ dɔɔnwo mɔɔ ɛnee bɛngola ye twe a. Akee Dwɔn nwunle kɛ Gyisɛse ɔ na ɔhanle kɛ: “Awulae ɔ!” Ɛkɛ ne ala, Pita dɔle azule ne anu na ɔweɛle ɔhɔle aze. Ɛdoavolɛma mɔɔ ɛha la hanle ɛlɛne ne hɔle aze.

Mɔɔ bɛdwule nyevile ne anloa la, bɛnwunle fɛlɛ mɔɔ gua senle zo la yɛɛ paano. Gyisɛse zele bɛ kɛ bɛva bɛ fɛlɛ ne bie bɛraboka nwo. Akee ɔhanle kɛ: “Bɛrɛla bɛrali debie.”

Mɔɔ bɛlile debie bɛwiele la, Gyisɛse bizale Pita kɛ: ‘Ɛkulo me ɛtɛla fɛlɛhyelɛ ɔ?’ Pita hanle kɛ: “Ɛhɛe, Awulae, ɛze kɛ mekulo wɔ edwɛkɛ.” Gyisɛse hanle kɛ: “Maa me mboane mralɛ ne mɔ aleɛ.” Gyisɛse bizale ye bieko kɛ: ‘Pita, ɛkulo me ɔ?’ Pita hanle kɛ: “Awulae, ɛze kɛ mekulo wɔ edwɛkɛ.” Gyisɛse hanle kɛ: “Nea me mboane ngyikyi ne.” Gyisɛse bizale ye mɔɔ tɔ zo nsa la. Pita arɛle bɔle kpole. Ɔhanle kɛ: “Awulae, ɛze debie biala; ɛze kɛ mekulo wɔ edwɛkɛ.” Gyisɛse hanle kɛ: “Maa me mboane ngyikyi ne aleɛ.” Akee ɔhanle ɔhilele Pita kɛ: “Kɔ zo toa me.”