Kɛzi Yɛbali Nɔhalɛ Dahuu Wɔ Mekɛ Mɔɔ Yɛlɛyia Sɔnea La

1-2. Mɔɔ Gyisɛse ɛlɛkilehile wɔ Kapɛnayɛm la, duzu a zile a?

MƆƆ Gyisɛse ɛlɛkilehile ye ɛdoavolɛma ne wɔ Kapɛnayɛm la ɔhanle kɛ: “Saa bɛanli sonla Ra ne nwonane na bɛanno ye mogya a, bɛnrɛnyia ngoane.” Eza ɔhanle ɔzɔle zo kɛ, “Awie biala mɔɔ kɛli me nwonane na ɔkɛnlo me mogya la lɛ dahuu ngoane, na mebadwazo ye wɔ mekɛ mɔɔ li awieleɛ la.” (Dwɔn 6:​53, 54) Mɔɔ ɔhanle ɛhye la ye ɛdoavolɛ ne mɔ bie hanle kɛ, “Edwɛkɛ ɛhye anloa yɛ se; nwane a kɛhola kɛdie a?”—Dwɔn 6:60.

² Bɛdabɛ mɔɔ bɛvale Gyisɛse edwɛkɛ ne anwo ɛya kpole la andoa ye bieko. Asoo kɛmɔ bɛnlɛ ye nu diedi fee la ati a bɛandoa ye bieko ɔ? Kyɛkyɛ! Kakye kɛ kolaa na edwɛkɛ ɛhye azi la, menli ɛhye mɔ bie nee Gyisɛse ɛdoavolɛma ne anye liele mɔɔ Gyisɛse yɛle la anwo kpalɛ na bɛhanle kɛ: “Nɔhalɛ nu, ɛhye a le Ngapezonli ne mɔɔ ɛlɛba ewiade la.” (Dwɔn 6:14) Ɔti ɔda ali kɛ ɛnee ɛdoavolɛma zɔhane lɛ Gyisɛse anu diedi ekyi. Noko mɔɔ bɛyiale bɛ diedi ne anwo sɔnea la, bɛangɔ zo bɛanli nɔhalɛ bɛammaa ye.

3. Duzu a ɛzoanvolɛma ne yɛle wɔ Gyisɛse edwɛkɛ ne anwo a, na duzu ati a bɛyɛle zɔ a? (Eza nea nvoninli ne.)

³ Noko ɛzoanvolɛma ne angɔ. Mekɛ mɔɔ Gyisɛse bizale bɛ saa bɛdabɛ noko bɛkulo kɛ bɛkɔ la, Pita buale ye kɛ: “Awulae, nwane ɛkɛ a yɛkɔ a? Wɔmɔ a ɛlɛ edwɛkɛ mɔɔ maa dahuu ngoane a. Yɛlie yɛli yɛɛ yɛnwu kɛ wɔmɔ a ɛle Nwuanzanwuanzanli ne mɔɔ vi Nyamenle ɛkɛ a.” (Dwɔn 6:​67-69) Yɛ ye nzonlɛ kɛ Pita anga kɛ mɔɔ Gyisɛse hanle kɛ ɔwɔ kɛ bɛdi ɔ nwo nane na bɛno ye mogya la, ɔ nee ɛzoanvolɛma mɔɔ ɛha la dele ye edwɛkɛ zɔhane abo bɔkɔɔ. Bie a bɛande ɔ bo noko bɛbɔle kpɔkɛ kɛ bɛbahɔ zo bɛali nɔhalɛ bɛamaa Gyisɛse. Duzu ati a bɛzile kpɔkɛ zɔhane a? Ɔluakɛ ɛnee bɛdie bɛdi bɔkɔɔ kɛ Gyisɛse a le “Kelaese ne mɔɔ Nyamenle ɛzoa ye la.”—Luku 9:​20, 35.

4. Sɔnea boni mɔ a yɛbahola yɛayia a?

⁴ Ninyɛne dɔɔnwo bahola azɔ nɔhalɛ mɔɔ yɛdi yɛamaa Gyihova la anlea. Ninyɛne ɛhye mɔ bie ɛne: Saa bɛyɛ nzenzaleɛ wɔ kɛzi yɛte Baebolo ngyɛnu bie abo la anu anzɛɛ bɛkakyi adenle mɔɔ yɛdua zo yɛyɛ ɛdoavolɛyɛlɛ gyima ne la a. Bieko, saa yɛnde deɛmɔti Gyihova maanle adenle maanle yɛhɔle amaneɛnwunlɛ bie anu la abo a. Eza saa yɛ diema diedinli bie mɔɔ ɔle yɛ gɔnwo la yɛ debie maa ɔgyegye yɛ anzɛɛ awie mɔɔ yɛbu ye kpalɛ la nee yɛ anli ye boɛ a.

5. Duzu ati a ɔwɔ kɛ yɛ diedi ne gyinla adiabo kpalɛ zo a? Maa neazo. (Kɔlɔsaema 1:23)

⁵ Duzu ati a ɔhyia kɛ yɛ diedi ne gyinla adiabo kpalɛ zo a? Dwenle neazo ɛhye anwo. Yɛbahola yɛava yɛ diedi ne yɛatoto sua mɔɔ bɛsi ye wɔ ɛleka mɔɔ azɛlɛ ta kpusu wɔ ɛkɛ la anwo. Ɔwɔ kɛ bɛwula sua ɛhye abo kpalɛ amaa saa azɛlɛ kpusu a yeambubu. Zɔhane ala a yɛ diedi ne noko hyia adiabo kpalɛ amaa yɛahola yɛagyinla yɛ diedi nwo sɔnea mɔɔ bɛha nwolɛ edwɛkɛ wɔ ɛdendɛkpunli mɔɔ li ɛhye anyunlu anu la anloa a. Saa yɛkɔ zo yɛwula yɛ diedi ne abo kpalɛ a, ɔbamaa yɛahɔ zo yɛagyinla kpundii, yɛali nɔhalɛ yɛamaa Gyihova wɔ mekɛ mɔɔ yɛbayia sɔnea la.—1 Kɔl. 15:58; kenga Kɔlɔsaema 1:23.

6. Duzu a boale ɛzoanvolɛma ne ɔmaanle bɛhɔle zo bɛlile nɔhalɛ bɛmaanle Gyisɛse a?

⁶ Duzu a boale ɛzoanvolɛma ne ɔmaanle bɛhɔle zo bɛlile nɔhalɛ bɛmaanle Gyisɛse wɔ mekɛ mɔɔ menli gyɛne dɔɔnwo andoa ye la ɛ? Ɛzoanvolɛma ne liele lile bɔkɔɔ kɛ ɔwɔ kɛ bɛsonle Gyihova ɔluakɛ ɔdaye a ɔbɔle ninyɛne kɔsɔɔti a. Gyisɛse noko le Nyamenle ara mɔɔ lɛ “edwɛkɛ mɔɔ maa dahuu ngoane a.” Eza Gyihova boa Gyisɛse wɔ debie biala mɔɔ ɔyɛ la anu. Kɛ anrɛɛ yɛbava yɛ adwenle yɛazie ngyegyelɛ ngakyile mɔɔ yɛbahola yɛayia la azo la, bɛmaa yɛzuzu nɔhalɛ edwɛkɛ nsa bie mɔɔ bɛbamaa yɛ diedi nu amia ɔnva nwo ngyegyelɛ mɔɔ yɛbayia la anwo. Bɛmɛ a le: (1) Gyihova a bɔle ninyɛne kɔsɔɔti a. (2) Gyihova a maanle bɛhɛlɛle Baebolo ne a. (3) Gyihova ɛlɛboa ye menli ne ɛnɛ. Saa yɛdie nɔhalɛ edwɛkɛ nsa ɛhye mɔ yɛdi bɔkɔɔ na yɛyia yɛ diedi ne anwo sɔnea a, ɔbaboa yɛ yeamaa yɛahɔ zo yɛali nɔhalɛ.

GYIHOVA A BƆLE NINYƐNE A

7. Duzu a Yekile 4:11 maa yɛkakye a, noko saa yɛyia yɛ diedi ne anwo sɔnea a, duzu a bahola azi a?

⁷ Kenga Yekile 4:11. Edwɛkɛ ɛhye kakye yɛ kɛ Gyihova a bɔle ninyɛne kɔsɔɔti a. Nɔhalɛ edwɛkɛ ɛhye maa ɔda ali kɛ ɔfɛta kɛ yɛsonle ye. Eza saa yɛdwenle ye tumi bedevinli ne anwo a, ɔmaa yɛnyia anwodozo kɛ ɔkola ɔdie yɛ ɔfi yɛ ngyegyelɛ kɔsɔɔti anu. Noko akee, Seetan ɛmaa adalɛ mɔɔ kile kɛ Nyamenle ɛnle ɛkɛ la ɛyi ewiade. Abɔdeɛ nwo nrɛlɛbɛvolɛma bie mɔ bɔbɔ ka kɛ tɛ Nyamenle a bɔle ninyɛne mɔɔ ngoane wɔ nu la a. Saa yɛanlie yɛanli bɔkɔɔ kɛ Gyihova a bɔle ninyɛne yɛɛ ɔkulo yɛ a, bie a yɛ adwenle nu babɔ ɔ bo ayɛ yɛ kesee kɛ ɔnle ɛkɛ yɛɛ ɔnrɛhola ɔnrɛboa yɛ wɔ mekɛ mɔɔ yɛlɛyia yɛ diedi nwo sɔnea la.—Hib. 11:6.

8-9. Saa wɔ adwenle nu bɔ ɔ bo yɛ wɔ kesee kɛ tɛ Gyihova a le Bɔvolɛ ne a, duzu a ɔwɔ kɛ ɛyɛ a? (Eza nea nvoninli ne.)

⁸ Saa wɔ adwenle nu bɔ ɔ bo yɛ wɔ kesee kɛ tɛ Gyihova a le Bɔvolɛ ne a, yɛ nwolɛ debie ndɛndɛ. Yɛ neɛnleanu wɔ yɛ mbuluku ne mɔ anu na ɛbanwu daselɛ dɔɔnwo mɔɔ kile kɛ Gyihova a bɔle ninyɛne kɔsɔɔti a. Ɛbahola wɔanyia edwɛkɛ dɔɔnwo mɔɔ kile kɛ Nyamenle a bɔle ewiade la wɔ Was Life Created? nee The Origin of Life—Five Questions Worth Asking brohyua ne mɔ anu na ɛhye bamaa wɔ diedi ne anu amia kpalɛ. Eza ɛbanwu daselɛ dɔɔnwo mɔɔ kile kɛ Nyamenle a bɔle ewiade la wɔ edwɛkɛ mɔɔ ba toɔdoa zo mɔɔ se, “Asoo Awie A Yɛle A?” la wɔ jw.org. Adiema bɛlɛra bie mɔɔ bɛfɛlɛ ye Jessica mɔɔ wɔ United States la hanle kɛ: “Mɔɔ mengengale Origin of Life brohyua ne menwiele la, menliele menlile kɛ Bɔvolɛ bie mɔɔ ze nrɛlɛbɛ la a bɔle ewiade ne a. Ɛnee meze ɛhye dɛba, noko mɔɔ menzuzule daselɛ mɔɔ wɔ brohyua ne anu anwo la, akee menliele menlile bɔkɔɔ.” Eza Is There a Creator Who Cares About You? buluku ne mɔɔ menli dɔɔnwo ɛgenga la ɛboa bɛ kpalɛ. Bie a wɔgenga buluku ɛhye ɛlɛ, noko ɛbahola wɔagenga ye bieko.

⁹ Wɔ ɛ ti anwo debiezukoalɛ bieko anu, ɛbahola wɔazukoa daselɛ mɔɔ kile kɛ Nyamenle wɔ ɛkɛ la anwo debie. Neɛnleanu mɔɔ ɛbayɛ la bamaa wɔanyia diedi kpole kɛ Gyihova wɔ ɛkɛ na eza wɔazukoa ye subane ne anwo debie. (Wlo. 1:20) Bieko, ɛbahola wɔava mɔɔ wɔzukoa la wɔaboa menli mɔɔ bɛ adwenle nu yɛ bɛ kesee kɛ Nyamenle ɛnle ɛkɛ la. Edwɛkɛ ne a le kɛ: Gyihova ɛmaa yɛnyia daselɛ dɔɔnwo mɔɔ kile kɛ ɔ le yɛ Bɔvolɛ la.

Nebula: IAC/RGO/David Malin Images; fɛlɛ nee kale: Mercedes-Benz USA; alopile: Kristen Bartlett/University of Florida

GYIHOVA A MAANLE BƐHƐLƐLE BAEBOLO NE A

10. Duzu ati a Baebolo ne anwo hyia yɛ a? (2 Timote 3:​16, 17)

¹⁰ Kenga 2 Timote 3:​16, 17. Edwɛkɛ mɔɔ Gyihova lɛ maa alesama la a wɔ Baebolo ne anu a. Ɔbua ɛbɛlabɔlɛ nu kpuya mɔɔ hyia la yɛɛ ɔmaa yɛnwu Gyihova bodane nee mɔɔ ɔkulo kɛ yɛyɛ la. Yɛdie yɛdi kɛ Gyihova a le Baebolo ne kɛlɛvolɛ a, ɛhye ati ɔle buluku mɔɔ anwo hyia kpalɛ wɔ yɛ ɛbɛlabɔlɛ nu a. Yɛkulo kɛ yɛte ye edwɛkɛ ne abo kpalɛ na yɛyɛ biala mɔɔ yɛbahola la yɛfa yɛbɔ yɛ ɛbɛla kpalɛ.

11. Duzu a maa ɛdie ɛdi kɛ Nyamenle a maanle bɛhɛlɛle Baebolo ne a?

¹¹ Duzu ati a yɛdie yɛdi kɛ Nyamenle a maanle bɛhɛlɛle Baebolo ne a? Ninyɛne dɔɔnwo a maa yɛkola yɛdie yɛdi a. Kɛ neazo la, edwɛkɛ mɔɔ Baebolo ne ka kɛ ɔsisile wɔ tete ne la le nɔhalɛ. (Luku 3:​1, 2) Eza edwɛkɛ biala mɔɔ ɔka wɔ abɔdeɛ nwo la le nɔhalɛ. (Dwobu 26:7) Mɔdenle biala mɔɔ Seetan noko ɛbɔ kɛ ɔsɛkye Baebolo ne la ɛnyɛ boɛ emomu bɛyɛ ye wɔ aneɛ dɔɔnwo anu bɛdɛla buluku gyɛne biala. Mrenyia kɛyɛ 40 a vale ɛvolɛ mɔɔ bo 1,600 la hɛlɛle Baebolo ne a noko bɛ edwɛkɛ ne amuala yia. Nuhua edwɛkɛ ne ɛmkpa nwo na yeboa menli mgbe dɔɔnwo wɔ bɛ ɛbɛlabɔlɛ nu. (Mrɛ. 13:20; 15:21; Mat. 7:12) Nuhua ngapezo dɔɔnwo mɔɔ ɛra nuhua la maa yɛkola yɛfa yɛ nwo yɛ to zo. (Dwɔh. 23:14) Amgba Nyamenle a maanle bɛhɛlɛle Baebolo ne a!

12. Saa yɛ adwenle nu bɔ ɔ bo yɛ yɛ kesee kɛ tɛ Nyamenle a maanle bɛhɛlɛle Baebolo ne a, duzu a ɔwɔ kɛ yɛyɛ a?

¹² Saa yɛ adwenle nu bɔ ɔ bo yɛ yɛ kesee kɛ tɛ Nyamenle a maanle bɛhɛlɛle Baebolo ne a, duzu a ɔwɔ kɛ yɛyɛ a? Ɔwɔ kɛ yɛyɛ nwolɛ asɔne na yɛyɛ neɛnleanu. Tie mɔɔ adiema kpavolɛ bie mɔɔ bɛfɛlɛ ye Jordan mɔɔ bɛtetele ye wɔ asafo ne anu la hanle la, ɔse: “Tɛ edwɛkɛ biala mɔɔ bɛka bɛkile me la a medie medi a. Medame mumua ne medwenle edwɛkɛ ne anwo menea kɛ ɔle nɔhalɛ na mealie meali. Nɔhalɛ nu, ɔdwu mekɛ ne bie a me adwenle nu yɛ me kesee. Saa ɔba ye zɔ a, mebɔ mɔdenle meyɛ neɛnleanu wɔ yɛ mbuluku ne mɔ anu amaa meanyia me kpuya ne mɔ anwo mualɛ na me adwenle nu anyɛ me kesee bieko.” Saa yɛkɔ zo yɛmia anwodozo mɔɔ yɛlɛ kɛ Gyihova a maanle bɛhɛlɛle Baebolo ne la anu a, ɔbamaa yɛ diedi ne anu amia kpole kpalɛ.—1 Kɔl. 3:​12, 13.

GYIHOVA ƐLƐBOA YE MENLI NE ƐNƐ

13. Saa yɛ adwenle nu bɔ ɔ bo yɛ yɛ kesee kɛ Gyihova Alasevolɛ ɛnle menli mɔɔ Nyamenle ɛlɛboa bɛ ɛnɛ a, duzu a ɔwɔ kɛ yɛyɛ a?

¹³ Saa yɛ adwenle nu bɔ ɔ bo yɛ yɛ kesee kɛ Gyihova Alasevolɛ ɛnle menli mɔɔ Nyamenle ɛlɛboa bɛ ɛnɛ a, ɔwɔ kɛ yɛyɛ nwolɛ debie ndɛndɛ. Amaa yɛ adwenle nu angɔ zo anyɛ yɛ kesee la, yɛbahola yɛabiza yɛ nwo kpuya ɛhye mɔ: ‘Nwane mɔ a ɛlɛbɔ mɔdenle kɛ bɛbava Baebolo ngyinlazo bɛabɔ bɛ ɛbɛla a? Nwane mɔ a bu Baebolo ne kɛ ɔwɔ kɛ ɔkile bɛ adenle wɔ tɛnlabelɛ biala anu a?’ (2 Tim. 4:​3, 4) ‘Nwane mɔ a ɛlɛyɛ Gyihova ɛhulolɛdeɛ ɛnɛ a?’—Mat. 7:​20, 21.

14. Kɛzi Gyihova ɛlɛdua ye Alasevolɛ anwo zo amaa edwɛkɛ mɔɔ wɔ Mateyu 24:14 la ara nu ɛ?

¹⁴ Saa yɛkulo kɛ yɛnwu menli mɔɔ ɛlɛyɛ Nyamenle ɛhulolɛdeɛ ɛnɛ la a, yɛbahola yɛabiza yɛ nwo kɛ, ‘Nwane mɔ a ɛlɛyɛ daselɛlilɛ gyima ne mɔɔ Gyisɛse hanle kɛ bɛbayɛ wɔ awieleɛ mekɛ ne anu la ɛ?’ (Mat. 24:14) Ɔda ali wienyi kɛ Gyihova ɛlɛdua ye Alasevolɛ anwo zo a ayɛ daselɛlilɛ gyima ɛhye a. Yɛ ngomekye ala a yɛlɛbɔ Nyamenle Belemgbunlililɛ ne anwo edwɛkpa ne nolo wɔ maanle mɔɔ bo 240 la azo a. Gyisɛse ɛhile yɛ adenle yemaa yɛva ɛvolɛ mɔɔ bo 100 la yɛyɛ gyima ɛhye. Nɔhalɛ nu, daselɛlilɛ nee ngilehilelɛ gyima ne le gyima mɔɔ nwolɛ ɛhyia yɛ dahuu a.—Mat. 28:​19, 20.

15. Duzu a Gyihova Alasevolɛ yɛ ye ɛnɛ fa te Nyamenle duma ne anwo a? (Mateyu 6:9; Ayezaya 43:10)

¹⁵ Kenga Mateyu 6:9 nee Ayezaya 43:10. Nyamenle duma Gyihova ne a menli dɔɔnwo fa nwu yɛ a, na ɔyɛ yɛ fɛ kɛ bɛfɛlɛ yɛ Gyihova Alasevolɛ la. Ɛnɛ, menli dɔɔnwo mɔɔ wɔ ewiade la ɛnze kɛ Nyamenle duma a le Gyihova. Noko yɛbɔ mɔdenle yɛhile Baebolo ne abo na yɛmaanle Nyamenle duma ne vindele ɛleka mɔɔ ɔfɛta kɛ ɔfinde la. Saa ɛnea Baebolo ne mɔɔ yɛhile ɔ bo, Ngɛlɛlera Nwuanzanwuanza—Ewiade Fofolɛ Ngilebɛbo ne anu a, ɛbanwu kɛ Nyamenle duma ne finde fane mɔɔ bo 7,000 la wɔ nu.

16. Duzu ati a yɛkola yɛka kɛ Gyihova Alasevolɛ ɛlɛdi mɛla mɔɔ wɔ Dwɔn 13:​34, 35 la azo a? (Eza nea nvoninli ne.)

¹⁶ Kenga Dwɔn 13:​34, 35. Ɛnɛ, ɛkpɔlɛ nee mgbakyemgbakyenu ɛbu zo wɔ ewiade ye anu, noko Gyihova Alasevolɛ kulo bɛ nwo yɛɛ koyɛlɛ wɔ bɛ avinli. Ɛhye yɛ nwanwane ɔluakɛ yɛvi ewiade ɛleka ngakyile, asolo yɛ amaamuo yɛɛ kɛzi bɛtetele yɛ la, noko yɛde anzodwolɛ nu yɛɛ yɛkulo yɛ nwo ngoko. Wɔmɔ nea o, asoo wɔdu adenle wɔhɔ sua gyɛne zo na wɔhɔ debiezukoalɛ wɔ asafo mɔɔ wɔ ɛkɛ la anu ɛlɛ ɔ? Saa wɔyɛ zɔ ɛlɛ a, ɔkile kɛ wɔnwu ɛlɔlɛ nee koyɛlɛ mɔɔ wɔ yɛ mediema avinli la. Yemɔ maa ɔda ali wienyi kɛ amgba Gyihova ɛlɛdua ye Alasevolɛ ne mɔ anwo zo ayɛ ye ɛhulolɛdeɛ ɛnɛ. Saa yɛkakye ɛhye dahuu a, ɔbaboa yɛ yeamaa yɛahɔ zo yɛali nɔhalɛ yɛamaa Gyihova wɔ mekɛ mɔɔ yɛlɛyia diedi nwo sɔnea biala la.

MMAFI GYIHOVA ANWO ƐLƐ

17-18. Ngyegyelɛ boni mɔ a yɛbahola yɛayia a, noko anwodozo boni a yɛbahola yɛanyia a?

¹⁷ Yɛde mekɛ mɔɔ li awieleɛ mɔɔ ninyɛne nu yɛ se la anu, ɔti yɛ muala yɛyia ngyegyelɛ. (2 Tim. 3:​1, 13) Noko bie a eza yɛbayia tɛnlabelɛ gyɛne mɔɔ anu yɛ se la. Kɛ neazo la, Gyihova ahyehyɛdeɛ ne bahola asisi kpɔkɛ bie mɔɔ yɛnde ɔ bo kpalɛ la. Anzɛɛ bie a yɛ diema diedinli bie babua yɛ ndɛne anzɛɛ bayɛ debie mɔɔ gyegye yɛ la. Eza ɔbahola yeara ye kɛ yɛnrɛnyia yɛ ngyegyelɛ bie anwo sɔbelɛ ndɛndɛ anzɛɛ yɛnrɛde deɛmɔti yɛlɛnwu amaneɛ bie la abo.

¹⁸ Tɛnlabelɛ ɛhye mɔ bamaa yɛali nyane ɛdeɛ, noko saa yɛdie yɛdi bɔkɔɔ kɛ Gyihova a bɔle ninyɛne, ɔdaye a ɔmaanle bɛhɛlɛle Baebolo ne yɛɛ Gyihova Alasevolɛ a le ye menli a, ɔbamaa yɛali nɔhalɛ yɛamaa ye dahuu. Na kɛ mɔɔ Pita hanle hilele Gyisɛse la, yɛdayɛ noko yɛbahola yɛaha yɛahile Gyihova kɛ: “Awulae, nwane ɛkɛ a yɛkɔ a? Wɔmɔ a ɛlɛ edwɛkɛ mɔɔ maa dahuu ngoane a.”