Kpuya Mɔɔ Vi Kengavolɛma Ɛkɛ
Mrɛlɛbulɛ 30:18, 19 kɛlɛvolɛ ne hanle kɛ “nrenyia adenle wɔ mekɛ mɔɔ ɔ nee bɛlɛra lua la” le debie mɔɔ ye “adwenle ɛndwu nwo a.” Duzu a ɛnee ɔlɛkile a?
Menli dɔɔnwo nee mbɔlɔba bie mɔ bɔbɔ ɛnwie mɔɔ edwɛkɛ ɛhye abo kile la abo te. Wɔ Ewiade Fofolɛ Ngilebɛbo ne anu, ɔkenga kɛ: “Ninyɛne nsa bie wɔ ɛkɛ mɔɔ me adwenle ɛndwu nwo a [anzɛɛ, “mɔɔ yɛ me nwanwane kpalɛ,” ɔbdw.], yɛɛ ninyɛne nna a mende ɔ bo a: Kɔleɛ adenle wɔ anwuma, ɛwɔlɛ adenle wɔ bodane zo, meli adenle wɔ nyevile zo, yɛɛ nrenyia adenle wɔ mekɛ mɔɔ ɔ nee bɛlɛra lua la.”—Mrɛ. 30:18, 19.
Dɛba ne, yɛdele edwɛkɛ “nrenyia adenle wɔ mekɛ mɔɔ ɔ nee bɛlɛra lua la” abo kɛ ɔfale debie ɛtane nwo. Duzu ati ɔ? Ngyehyɛnu mɔɔ limoa la bie mɔ hanle ninyɛne mɔɔ ɛnle kpalɛ mɔɔ bɛnga kɛ “yeyɛ boɛ” ɛlɛ la anwo edwɛkɛ. (Mrɛ. 30:15, 16) Yɛɛ ngyɛnu 20 ne ka “raalɛ mɔɔ sɛkye agyalɛ” mɔɔ ka kɛ ɔtɛyɛle ɛtane biala la anwo edwɛkɛ. Ɔti yɛnyianle adwenle kɛ, kɛ mɔɔ bɛnnwu kɔleɛ adenle wɔ anwuma, ɛwɔlɛ adenle wɔ bodane zo anzɛɛ meli mɔɔ lua nyevile zo la abo zo la, zɔhane ala a nrenyia kola yɛ debie mɔɔ ɔmmaa awie biala ɛnnwu ɔ nzi a. Adwenle zɔhane mɔɔ yɛnyianle la ati, ɔmaanle yɛdele edwɛkɛ, “nrenyia adenle wɔ mekɛ mɔɔ ɔ nee bɛlɛra lua la” abo kɛ ɔfale debie ɛtane nwo—kɛ ɔfale kɛzi kpavolɛ bie dua mɛlɛbɛla adenle zo ɔdi bɛlɛra mɔɔ ɛnze nwolɛ bie la adwenle mɔɔ ɔnnwu kpavolɛ ne anzi la anwo.
Noko adwenle kpalɛ bie ati yɛbahola yɛalie yɛali kɛ ngyɛnu ɛhye ɛlɛka debie kpalɛ nwo edwɛkɛ. Ɛnee kɛlɛvolɛ ne ɛlɛka kɛzi ninyɛne ɛhye mɔ yɛ ye nwanwane la anwo edwɛkɛ.
Tete Hibulu ngɛlɛlera ne noko kile kɛ ngyɛnu ɛhye fale debie kpalɛ nwo. Theological Lexicon of the Old Testament buluku ne kile kɛ Hibulu edwɛkɛkpɔkɛ mɔɔ bɛhile ɔ bo “me adwenle ɛndwu nwo” wɔ Mrɛlɛbulɛ 30:18 la “kile edwɛkɛ bie mɔɔ yɛ awie azibɛnwo, ɔdwenle nwo a ɔnde ɔ bo na bɔbɔ ɔyɛ ye nwanwane la.”
Abɔlɔba Crawford H. Toy mɔɔ wɔ Harvard University wɔ United States la noko hanle kɛ Baebolo nu edwɛkɛ ɛhye ɛnvale debie ɛtane nwo. Ɔhanle kɛ: “Ɛnee kɛlɛvolɛ ne ɛlɛka kɛzi ninyɛne zɔhane mɔ yɛ ye azibɛnwo la anwo edwɛkɛ.”
Ɔti ndelebɛbo wɔ nu kɛ yɛbaha kɛ edwɛkɛ mɔɔ wɔ Mrɛlɛbulɛ 30:18, 19 la fale ninyɛne mɔɔ yɛ nwanwane, mɔɔ yɛ adwenle ɛndwu nwo bɔbɔ la anwo. Kɛ mɔɔ ɛnee ɔde wɔ Baebolo kɛlɛvolɛ ne afoa nu la, kɛzi kɔleɛ tu dua anwuma, kɛzi ɛwɔlɛ mɔɔ ɔnlɛ ɔ gyakɛ kola fa awolɛ zo, kɛzi meli ɛlomboɛ kola dua nyevile nye nee kɛzi kpavolɛ bie nee bɛlɛra bie kulo bɛ nwo too bɛbɔ nu bɛtɛnla anyelielɛ nu la yɛ yɛ azibɛnwo.