Gyisɛse ‘Zukoale Tieyɛ’

Gyisɛse tie Gyihova dahuu. (Dwɔn 8:29) Ɔti duzu ati a Baebolo ne ka kɛ: “Ɔzukoale tieyɛ ɔvile amaneɛ mɔɔ ɔnwunle ye la anu” a?—Hib. 5:8.

Mɔɔ Gyisɛse wɔ azɛlɛ ye azo la, ɔyiale tɛnlabelɛ ngakyile mɔɔ ɛnee bie ɛnle anwuma la. Kɛ neazo la, awovolɛ mɔɔ ɛnee bɛkulo Gyihova noko bɛnli munli la a tetele ye a. (Luku 2:51) Ɛzonlenlɛ nu mgbanyima mɔɔ ɛnlɛ subane kpalɛ nee arane nu mgbanyima atisesebɛma hilele ye ateetee. (Mat. 26:59; Maake 15:15) Eza “ɔbɛlɛle ɔ nwo aze na ɔyɛle tieyɛ ɔhɔle ewule nu,” ɔwule alɔbɔlɛ ewule.—Fel. 2:8.

Tɛnlabelɛ ɛhye mɔ mɔɔ Gyisɛse hɔle nu la maanle ɔzukoale kɛzi bɛyɛ tieyɛ la wɔ adenle fofolɛ zo, yeanzukoa ɛhye wɔ mekɛ mɔɔ ɔwɔ anwuma la. Ɔti ɔbahola yeayɛ Belemgbunli nee Ɛsɔfo Kpanyinli mɔɔ fɛta bɔkɔɔ, awie mɔɔ bade yɛ nyanelilɛ bo la. (Hib. 4:15; 5:9) Mɔɔ Gyisɛse zukoale tieyɛ vile amaneɛ mɔɔ ɔnwunle la anu la, ɔmaanle ɔrayɛle awie mɔɔ sonle bolɛ kpalɛ maa Gyihova a. Saa yɛdayɛ noko yɛyɛ tieyɛ wɔ mekɛ mɔɔ yɛbahɔ tɛnlabelɛ mɔɔ anu yɛ se la anu a, ɔbamaa yɛayɛ menli mɔɔ sonle bolɛ maa Gyihova na yɛahola yɛayɛ gyimalilɛ biala mɔɔ ɔbava yeamaa yɛ la.—Gye. 1:4.