Gyihova Boale Yɛ Ɔmaanle ‘Yɛnyinle Wɔ Ɛleka Mɔɔ Bɛluale Yɛ La’

Adiema Kassholm nee ɔ ye hɔle Geleade sukulu ne mɔɔ bɛyɛle wɔ 1979 la bie, na wɔ ɛvolɛ dɔɔnwo anu, “bɛluale” bɛ anzɛɛ bɛmaanle bɛhɔyɛle gyima wɔ Iran, Mauritius, Myanmar, Tanzania, Uganda yɛɛ Zaire. Mɔɔ bɛwɔ Geleade la yɛɛ bɛdele kɛ bɛ kilehilevolɛ ko, Jack Redford ɛlɛtu bɛ folɛ mɔɔ boale bɛ wɔ mekɛ mɔɔ “bɛluale bɛ,” “bɛdudule bɛ” na “bɛluale bɛ bieko” fane dɔɔnwo la. Maa bɛhilehile nuhua.

Mats, dimoa ka kɛzi ɛnwunle nɔhalɛ ne la anwo edwɛkɛ kile yɛ.

Mats: Wɔ Ewiade Konle II la anu, ɛnee me papa de Poland na ɔnwunle nabalaba nyɛleɛ mɔɔ kɔ zo wɔ Kateleke Asɔne ne anu la. Noko ɛnee ɔta ɔka kɛ, “Nɔhalɛ ne wɔ ɛleka bie!” Nzinlii, menwunle kɛ mɔɔ ɔhanle la le nɔhalɛ. Mendɔle mbuluku dɛba dɔɔnwo kɛ mekenga. Ko a le buluku buluwu bie mɔɔ bɛfɛlɛ ye, The Truth That Leads to Eternal Life la. Me nye liele edwɛkɛtile ne anwo, na mɔɔ me sa hanle buluku ne la, nɔe ne, mengengale ɔ muala menwiele. Aleɛ kahye la, ɛnee menwu kɛ menwu nɔhalɛ ne!

Ɔvi April 1972 mɔɔ ba la, mengengale Gyihova Alasevolɛ ne mɔ mbuluku dɔɔnwo na menyianle me kpuya ngakyile mɔɔ melɛ wɔ Baebolo ne anu la anwo mualɛ. Mendele nganeɛ kɛ gualilɛnli ne mɔɔ wɔ Gyisɛse ndonwo ne anu mɔɔ ɔnwunle avikpa ko mɔɔ ye bolɛ yɛ se la, ɔdɔnenle debie biala mɔɔ ɔlɛ la na ɔhɔdɔle la. “Mendɔnenle” ngyehyɛleɛ mɔɔ menyɛle kɛ mebahɔ yunivɛsiti na meayɛ dɔketa la amaa meahola meadɔ “avikpa” mɔɔ le nɔhalɛ ne mɔɔ menwu ye la. (Mat. 13:​45, 46) Bɛzɔnenle me wɔ December 10, 1972.

Wɔ ɛvolɛ ko anu, me awovolɛ nee me diema nrenyia kakula ne noko nwunle nɔhalɛ ne na bɛzɔnenle bɛ. Wɔ July 1973, membɔle dahuu ɛzonlenlɛ gyima ne abo. Ɛnee dahuu adekpakyelɛma mɔɔ bɔ mɔdenle kpalɛ wɔ yɛ asafo ne anu la anu ko a le adiema raalɛ Ann-Catrin mɔɔ ɔ nwo yɛ fɛ na yenyi sunsum nu la. Yɛ nye liele yɛ nwo na yɛgyale wɔ 1975, na yɛdɛnlanle Strömsund, sua bie mɔɔ wɔ azɛlɛsinli bie mɔɔ bɛtie edwɛkɛ ne kpalɛ mɔɔ wɔ Sweden la azo ɛvolɛ nna.

Ann-Catrin: Me papa zukoale nɔhalɛ ne wɔ mekɛ mɔɔ ɛnee ɔka ekyii ɔwie yunivɛsiti wɔ Stockholm la. Mekɛ zɔhane, ɛnee meli siane nsa ala, noko ɛnee ɔlɛkɔ debiezukoalɛ nee daselɛlilɛ a, ɔfa me ɔkɔ. Me mame anye anlie ɛhye anwo na ɔbɔle mɔdenle kɛ ɔmaa Alasevolɛ ne mɔ anwu kɛ bɛle adalɛ. Noko yeangola, ɔti nzinlii bɛzɔnenle ɔdaye noko. Mɔɔ menlile ɛvolɛ 13 la, bɛzɔnenle me, na mɔɔ menlile ɛvolɛ 16 la, membɔle adekpakyelɛ gyima ne abo. Mɔɔ menzonlenle wɔ Umeå, ɛleka mɔɔ ɛnee bɛhyia Belemgbunlililɛ nolobɔlɛma dɔɔnwo la, membanyɛle adekpakyelɛ titili.

Mɔɔ me nee Mats gyale la anzi, yɛ nye liele kɛ yɛboale menli dɔɔnwo yɛmaanle bɛzukoale nɔhalɛ ne la. Bɛ nuhua ko a le Maivor, kakula bɛlɛra bie mɔɔ gyakyile bodane mɔɔ gyi ɔ nye zo wɔ nwɔhoalilɛ nu na nzinlii ɔrayɛle me diema kakula adekpakyelɛnli mɔɔ me nee ye kɔ daselɛlilɛ la. Bɛhɔle Geleade wɔ 1984 na bɛlɛsonle kɛ edwɛkpatɛlɛvolɛma wɔ Ecuador.

Wɔ edwɛkpatɛlɛvolɛ gyima dɔɔnwo mɔɔ bɛyɛ la anu, kɛzi bɛvale folɛdulɛ ne mɔɔ se “bɛnyi wɔ ɛleka mɔɔ bɛbalua bɛ” la bɛli gyima ɛ?

Mats: “Bɛluale yɛ bieko” fane dɔɔnwo wɔ yɛ gyimalilɛ fofolɛ ne anu. Noko debie ko mɔɔ boale yɛ wɔ gyimalilɛ ne mɔɔ bɛhakyile ye fane dɔɔnwo anu la a le kɛ dahuu yɛbɔ mɔdenle kɛ yɛbazukoa Gyisɛse, titili ye mɛlɛbɛnwoaze ne. (Kɔl. 2:​6, 7) Kɛ neazo la, kɛ anrɛɛ yɛbamaa yɛ nye ala kɛ mediema mɔɔ yɛhɔdo bɛ la bayɛ bɛ ninyɛne kɛ mɔɔ yɛdayɛ yɛyɛ ye la, yɛdayɛ mumua ne yɛbɔ mɔdenle kɛ yɛbazukoa kɛzi bɛyɛ bɛ ninyɛne la. Ɛnee yɛkulo kɛ yɛnwu kɛzi bɛdwenle ninyɛne nwo nee kɛzi bɛ amaamuo de la. Mekɛ mɔɔ yɛlɛsukoa Gyisɛse la, ɛnee yɛlɛnwu ye kpalɛ kɛ ‘bɛlua yɛ wɔ azudenle nloa’ amaa yɛanyi wɔ ɛleka biala mɔɔ bɛbava yɛ bɛahɔ la.—Edw. 1:​2, 3.

Ann-Catrin: Saa bɛtu baka bie bɛdua ye bieko na ɔbanyi a, eza ɔhyia ewia. Dahuu Gyihova yɛ kɛ “sɛnzɛne” la maa yɛ. (Edw. 84:11) Ɔmaanle yɛ mediema mrenyia nee mraalɛ mɔɔ bɛboale yɛ a. Kɛ neazo la, ɛyɛvolɛyɛlɛ mɔɔ ɛnee mediema da ye ali wɔ yɛ asafo ekyi ne mɔɔ wɔ Tehran, Iran, anu la maa yɛkakye ɛyɛvolɛlielɛ subane mɔɔ ɛnee menli da ye ali wɔ tete ne mɔɔ bɛhɛlɛ ye wɔ Baebolo ne anu la. Ɛnee yɛ nye die nwo kɛ yɛbadɛnla Iran, noko wɔ July 1980, bɛvale bɛ sa bɛdole Gyihova Alasevolɛ gyima ne azo wɔ ɛkɛ na bɛmaanle yɛ dɔnehwele 48 kɛ yɛvi maanle ne anu. Akee bɛmaanle yɛ gyimalilɛ fofolɛ wɔ Zaire (kɛkala bɛfɛlɛ ye Congo) mɔɔ wɔ Africa la.

Mekɛ mɔɔ limoa mɔɔ mendele kɛ bɛlɛmaa yɛahɔ Africa la, menzunle. Nwɔlɛ nee anwondolɛ ngakyile mɔɔ mendele nwolɛ edwɛkɛ kɛ ɔwɔ Africa la hanle me ɛzulolɛ. Noko yɛ gɔnwo mɔ kpalɛ kpalɛ nwiɔ bie mɔɔ bɛva ɛvolɛ dɔɔnwo bɛzonle wɔ Africa la hanle hilele yɛ kɛ: “Se bɛtɛdwule ɛkɛ! Bɛmɛ bɛhɔ, na bɛbanwu kɛzi bɛ nye balie la.” Mɔɔ bɛhanle la le nɔhalɛ! Mediema ne mɔ lɛ ɛlɔlɛ yɛɛ bɛ nye die. Nɔhalɛ nu, mɔɔ yɛlile ɛvolɛ nsia wɔ Zaire na bɛvale bɛ sa bɛdole yɛ gyima ne azo la ati ɔwɔ kɛ yɛfi ɛkɛ la, menzelele ɔluakɛ mekakye kɛ menyɛle asɔne kɛ, Gyihova “Mesɛlɛ wɔ, maa yɛdɛnla Africa.”

Nyilalɛ boni mɔ a bɛnyianle a?

Mats: Edwɛkpatɛlɛvolɛma dɔɔnwo mɔɔ bɛvi ɛleka ngakyile la ɛrayɛ yɛ gɔnwo mɔ. Eza wɔ ɛleka bie mɔ, ɛnee yɛyɛ Baebolo ɛzukoalɛ dɔɔnwo, ɔdwu mekɛ ne bie bɔbɔ a 20, na ɛnee ɛhye maa yɛ nye die kpole kpalɛ! Bieko, me rɛle ɛnrɛvi ɛlɔlɛ nee ɛyɛvolɛyɛlɛ subane mɔɔ mediema mɔɔ wɔ Africa la da ye ali la ɛlɛ. Saa yɛkɔkpɔla asafo ne mɔ mɔɔ wɔ Tanzania la na yɛfa yɛ sua ne, mɔɔ yemɔ a le yɛ kale ne mɔɔ yɛlɛ la, yɛsie mediema ne mɔ sua ne anwo ɛkɛ a, bɛda ɛyɛvolɛyɛlɛ ali bɛkile yɛ ‘bɛmaa ɔbo zolɛ.’ (2 Kɔl. 8:3) Debie ko mɔɔ ɛnee le titili maa yɛ la a le mɔɔ yɛfɛlɛ ye adawubɔlɛ mekɛ la. Ɛnee yemɔ a le mekɛ mɔɔ ɔdwu nɔsolɛ biala a, me nee Ann-Catrin tɛnla aze na yɛbɔ mɔɔ hɔle zo wɔ alehyenlɛ ne anu la anwo adawu na yɛyɛ Gyihova mo kɛ ɔlɛboa yɛ la.

Ann-Catrin: Wɔ me afoa nu, mediema mɔɔ vi ewiade ye anu ɛleka ngakyile mɔɔ yɛ nee bɛ dɛnlanle la a maa me nye die kpalɛ a. Yɛzukoale aneɛ fofolɛ—bie a le Farsi, French, Luganda yɛɛ Swahili—eza yɛzukoale amaamuo dɔɔnwo anwo debie. Yɛboale yɛmaanle bɛtetele mediema fofolɛ, yɛnyianle agɔnwolɛma fofolɛ yɛɛ yɛ nee bɛ bɔle nu yɛle gyima wɔ “koyɛlɛ” nu.—Zɛf. 3:9.

Eza yɛnwunle Gyihova abɔdeɛ ngakyile mɔɔ yɛ nwanwane la. Mekɛ biala mɔɔ yɛbalie gyimalilɛ bie yɛado nu wɔ Gyihova ɛzonlenlɛ nu la, ɔmaa yɛte nganeɛ kɛ Gyihova nee yɛ lua na ɔlɛkile yɛ adenle. Yemaa yɛnyia anwubielɛ ngakyile mɔɔ saa ɔhale yɛ ngomekye a anrɛɛ yɛnrɛnyia ye ɛlɛ la.

Ngyegyelɛ boni mɔ a bɛyiale a, na kɛzi bɛlile nwolɛ gyima ɛ?

Mats: Yɛ nwo dole yɛ fane dɔɔnwo, na ɛnee ɔyɛ a ebunlu kye yɛ. Ɛnee ɔdwu mekɛ ne bie a ɔwɔ kɛ bɛyɛ Ann-Catrin apelehyɛne mɔɔ yɛ nye ɛnla. Ɛnee eza yɛdwenle yɛ awovolɛ mɔɔ bɛlɛyɛ mgbanyinli la anwo; ɔti yɛyɛ yɛ mediema mɔɔ bɛgyinlanle yɛ gyakɛ anu bɛnleanle bɛ la mo somaa. Bɛvale abotane, anyelielɛ nee ɛlɔlɛ bɛyɛle gyima ɛhye wɔ nɔhalɛlilɛ nu. (1 Tim. 5:4) Yɛyɛle biala mɔɔ yɛbahola la yɛboale bɛ wɔ ɛleka mɔɔ yɛwɔ la, noko yɛ kunlu anu a anrɛɛ yɛwɔ bɛ nwo ɛkɛ na yɛahola yɛaboa bɛ kpalɛ.

Ann-Catrin: Wɔ 1983 mɔɔ ɛnee yɛwɔ Zaire la, ɔdwule mekɛ bie la ɛnee me kunlu tu yɛɛ mefe. Dɔketa ne hanle hilele Mats kɛ, “Fa ye kɔ ye sua zo ɛnɛ kenle ko ye ala!” Aleɛ hyenle la, yɛvole alopile bie mɔɔ yemɔ ninyɛne ala a ɔfa mɔɔ ɛnee ɔlɛkɔ Sweden la.

Mats: Yɛ adwenle yɛle yɛ kɛ yɛ edwɛkpatɛlɛvolɛ gyima ne ɛra ye awieleɛ, yemɔti yɛzunle kpalɛ. Dɔketa ne adwenle yɛle ye kɛ Ann-Catrin ɛnrɛde kpɔkɛ ɛdeɛ, noko ɔdele kpɔkɛ. Ɛvolɛ ko anzi, yɛziale yɛhɔle Zaire, mekɛ ɛhye ɛdeɛ yɛhɔle Swahili asafo ekyi bie mɔɔ wɔ Lubumbashi la anu.

Ann-Catrin: Mɔɔ yɛwɔ Lubumbashi la, menrenzɛle, noko ɔzɛkyele. Ɛnee ɔnle yɛ adwenle nu kɛ yɛkulo kɛ yɛwo ngakula ɛdeɛ, noko ɛnee ɔnla aze ɔmmaa me kɛ mebagyinla yɛ ra ne mɔɔ wule la ewule ne anloa. Wɔ zɔhane mekɛ ne mɔɔ ɛnee yɛlɛdi nyane la anu, Gyihova maanle yɛ ahyɛlɛdeɛ bie mɔɔ ɛnee yɛ nye ɛnla. Mekɛ ɛhye anu a yɛholale yɛyɛle Baebolo ɛzukoalɛ dɔɔnwo kpalɛ a. Yeandwu ɛvolɛ ko bɔbɔ, nolobɔlɛma mɔɔ bɛle 35 la rayɛle 70, yɛɛ menli 40 ne mɔɔ ɛnee yɛkɔ debiezukoalɛ la rayɛle 220. Ɛnee yɛnlɛ alagye fee wɔ ɛzonlenlɛ gyima ne anu, na kɛzi Gyihova yilale yɛ la kyekyele me rɛle. Yɛta yɛbɔ yɛ ra ne mɔɔ wule la anwo adawu. Yɛ nye la kɛzi Gyihova bayɛ yɛ ahonle ne mɔ ayile bɔkɔɔ la ade ɛsesebɛ.

Mats: Kenle ko bie, Ann-Catrin anwo bɔle ɔ bo kɛ ɔyɛ ye bɛtɛɛ. Mekɛ ko ne ala, bɛnwunle kɛ menyia kansa wɔ me anyalɛ ne anu ɔti ɔwɔ kɛ bɛyɛ me apelehyɛne. Kɛkala ɛdeɛ, me nwo le kpalɛ yɛɛ Ann-Catrin ɛlɛyɛ biala mɔɔ ɔbahola la wɔ Gyihova ɛzonlenlɛ nu.

Yɛranwu ye kɛ tɛ yɛ ngomekye a yɛgyi ngyegyelɛ nloa a. Mɔɔ bɛhuhunle menli dɔɔnwo wɔ Rwanda wɔ 1994 la anzi, yɛhɔkpɔlɔkpɔlale yɛ gɔnwo mɔ dɔɔnwo wɔ tutanema azokoɛleɛ ne mɔ. Mɔɔ yɛnwunle bɛ diedi, bɛ kpundiigyinlanlɛ nee bɛ ɛyɛvolɛyɛlɛ subane kɛnlɛma ne la, ɔmaanle yɛnwunle kɛ Gyihova lɛ tumi boa ye menli wɔ sɔnea biala anu.—Edw. 55:22.

Ann-Catrin: Yɛyiale ngyegyelɛ bieko wɔ mekɛ mɔɔ yɛhɔle Uganda ɔfese ne mɔɔ bɛyilale zo wɔ 2007 la bie la. Mɔɔ bɛkpɔnenle gyimalilɛ ne la, yɛ nee edwɛkpatɛlɛvolɛma nee Bɛtɛlema mɔɔ yɛ muala yɛbayɛ kɛyɛ 25 la vale kale kɛ yɛkɔ Nairobi, Kenya. Kolaa na yɛadwu Kenya bɔda ne azo la, kale bie mɔɔ vi yɛ nyunlu ɛlɛba la ravale yɛ adenle ɛdeɛ ne anu arɛlevilɛ nu na ɔzile yɛ kale ɛdeɛ ne anu. Delava ne nee yɛ gɔnwo mɔ nnu wule ɛkɛ ne ala; nzinlii, adiema raalɛ ko noko wule wɔ asopiti. Nea kɛzi yɛ nye la ye ɛsesebɛ kɛ yɛbanwu yɛ gɔnwo mɔ bieko a!—Dwobu 14:​13-15.

Nzinlii, me nganlɛ ne mɔ hɔle. Noko me nee Mats boka menli mɔɔ esiane ne mɔɔ zile la anwo adwenleadwenle tɛgyegye yɛ la anwo. Wɔ me afoa nu, ɔdwu nɔɔzo a yɛɛ zɔhane adwenleadwenle ne ba a, na ɔyɛ me kɛ asɛɛ me ahonle ɛlɛmia me la. Saa ɔba ye zɔhane a, ɔyɛ ɛzulolɛ kpalɛ. Noko asɔne mɔɔ yɛvile yɛ ahonle nu yɛyɛle nee ngɛlɛlera bie mɔ mɔɔ yɛ nye die nwo mɔɔ kyekye yɛ rɛle la boale yɛ maanle yɛgyinlanle ɔ nloa. Eza yɛhɔle dɔketama mɔɔ ze zɔhane adwenleadwenle ne anwo gyima la ɛkɛ na bɛdabɛ noko bɛboale yɛ kpalɛ. Kɛkala ɛdeɛ, ninyɛne nu le kpalɛ tɛla dɛba ne, na yɛsɛlɛ Gyihova dahuu kɛ ɔkyekye menli mɔɔ bɛlɛyia yɛ ngyegyelɛ ne bie la arɛle.

Mekɛ mɔɔ bɛlɛkilehile kɛzi bɛholale bɛgyinlanle tɛnlabelɛ mɔɔ anu yɛ se la anloa la, bɛhanle kɛ Gyihova zɔle bɛ kɛ “kolonvia amolɛ.” Duzu a ɛnee bɛlɛkile a?

Mats: Zɔhane edwɛkɛ ne vi Swahili ɛrɛlɛ ɛhye anu, “Tumebebwa kama mayai mabichi,” anzɛɛ “Bɛzɔle yɛ kɛ kolonvia amolɛ.” Kɛ mɔɔ awie sɔ kolonvia amolɛ nu boɛ amaa yeambobɔ la, Gyihova noko ɛzɔ yɛ nu bɛtɛbɛtɛ wɔ yɛ gyimalilɛ ne mɔ amuala anu. Eza dahuu yɛ sa ka mɔɔ yɛhyia nwo la, bie bɔbɔ a ɔbo mɔɔ yɛhyia la azo. Kɛzi Neazo Eku ne te yɛ edwɛkɛ bo la le adenle ko mɔɔ yɛlua zo yɛnwu Gyihova ɛlɔlɛ nee kɛzi ɔboa yɛ la.

Ann-Catrin: Mekulo kɛ meka kɛzi Gyihova boale yɛ la anu ko anwo edwɛkɛ. Kenle ko bie, awie bie mɔɔ wɔ Sweden la vɛlɛle me wɔ fonu zo na ɔhanle ɔhilele me kɛ me papa wɔ asopiti na ɔnla boɛ fee. Ɛnee bo zo mɔɔ ebunlu ne mɔɔ hyele Mats la ɛlɛkɔ a. Ɛnee yɛnlɛ ezukoa mɔɔ yɛbava yɛava alopile yɛahɔ Sweden a, ɔti yɛzile kpɔkɛ kɛ yɛbadɔne yɛ kale ne. Akee menli nwiɔ bieko vɛlɛle yɛ; ko vi agyalɛma bie mɔɔ bɛdele yɛ edwɛkɛ ne na ɛnee bɛkulo kɛ bɛtua sonla ko alopile kakɛ ne la ɛkɛ. Ko noko vi adiema raalɛ kpanyinli bie mɔɔ yeziezie ezukoa wɔ ɛlɛka bie mɔɔ ɛnee yehɛlɛ nwolɛ “Mebava meamaa awie mɔɔ hyia moalɛ la” ɛkɛ. Yeandwu bie, Gyihova maanle yɛnyianle ezukoa mɔɔ yɛbava yɛavo alopile yɛahɔ la!—Hib. 13:6.

Duzu a bɛzukoa wɔ ɛvolɛ mɔɔ bo 50 mɔɔ bɛva bɛyɛ dahuu ɛzonlenlɛ gyima ne la anu a?

Ann-Catrin: Meranwu ye kɛ ‘saa yɛsie yɛ nwo dii na yɛnyia anwodozo a’ yɛbanyia anwosesebɛ. Saa yɛfa yɛ nwo yɛto Gyihova anwo zo a, wɔ adenle bie azo, ɔfa yɛ konle ne ɔyɛ ye konle. (Aye. 30:15; 2 Ek. 20:​15, 17) Kɛmɔ yɛyɛ biala mɔɔ yɛbahola la yɛsonle Gyihova wɔ yɛ gyimalilɛ ko biala anu la ati, yɛnyia nyilalɛ dɔɔnwo yɛdɛla nyilalɛ mɔɔ anrɛɛ debie gyɛne bamaa yɛanyia la.

Mats: Debie titili mɔɔ mezukoa la a le kɛ ɔwɔ kɛ mefa me nwo meto Gyihova anwo zo wɔ tɛnlabelɛ biala anu na menea kɛzi ɔbali me edwɛkɛ yeamaa me la. (Edw. 37:5) Dahuu ɔboa yɛ kɛ mɔɔ yebɔ ɛwɔkɛ la. Gyihova tɛboa yɛ wɔ gyimalilɛ fofolɛ mɔɔ yɛlɛyɛ ye kɛkala wɔ Myanmar Bɛtɛle ɛke la anu.

Yɛ nye la kɛ mgbavolɛ nee mbɛlɛra mɔɔ bɛkulo kɛ bɛtɛlɛ bɛ ɛzonlenlɛ gyima ne anu la noko banyia ɛlɔlɛ kpundii ne mɔɔ Gyihova ɛla ye ali ɛhile yɛ la bie. Yɛlɛ diedi kɛ saa bɛmaa Gyihova boa bɛ ɔmaa bɛnyi bɔkɔɔ wɔ ɛleka mɔɔ bɛbalua bɛ la a, bɛbanyia bie.