Nyia Ngɛlɛlera Gyɛne Ne Mɔ Azo Nvasoɛ

Wɔ Ngɛlɛlera Nwuanzanwuanza—Ewiade Fofolɛ Ngilebɛbo ne anu, saa ɛnea ngyɛnu bie anwo a, ɛbanwu kɛ bɛhwe adwenle bɛhɔ ngɛlɛlera gyɛne mɔɔ fale ngyɛnu ne ala anwo la azo. Ɛhye maa ɔda ali kɛ, Baebolo ne afoa ngakyile foa edwɛkɛ bie mɔɔ wɔ Baebolo ne ɛleka gyɛne la azo. Amaa wɔanwu ngɛlɛlera gyɛne ne mɔ la, nea kɛ ɛbanwu ngɛlɛlerakpɔkɛ bie mɔɔ bɛyɛ ye ekyi bie bɛbeta edwɛkɛkpɔkɛ bie anwo la. Saa ɛlɛkenga Baebolo ne mɔɔ bɛpelente la bie a, ɛbanwu ngɛlɛlerakpɔkɛ ko ne ala bie wɔ mukelɛ ne avinli anzɛɛ ye foa ko nee ngɛlɛlera gyɛne mɔɔ fale edwɛkɛ ne anwo la wɔ nwolɛ. Saa ɛlɛkenga Baebolo ne wɔ jw.org anzɛɛ JW Library^® a, tinli ngɛlɛlerakpɔkɛ ne azo na ɔbabuke ngɛlɛlera gyɛne mɔɔ bɛhwe adwenle bɛhɔ zo la.

Ngɛlɛlera gyɛne ne mɔ fale ninyɛne ɛhye mɔ bie anwo:

Edwɛkɛ mɔɔ nee ye le ko: Ɛhye maa yɛnwu ngɛlɛlera gyɛne mɔɔ ka edwɛkɛ ko ne ala la. Kɛ neazo la, nea 2 Samoɛle 24:1 nee 1 Edwɛkɛsisilɛ 21:1.

Edwɛkɛ mɔɔ bɛhwe adwenle bɛhɔ zo: Ɛhye maa yɛnwu Baebolo ne ɛleka mɔɔ edwɛkɛ zɔhane limoale vindele la. Kɛ neazo la, nea Mateyu 4:4 nee Ditilɔnomi 8:3.

Ngapezo mɔɔ ɛra nu: Ɔmaa yɛnwu kɛzi ngapezo bie rale nu la. Kɛ neazo la, nea Mateyu 21:5 nee Zɛkalaya 9:9.