Kpuya Mɔɔ Vi Kengavolɛma Ɛkɛ
Mekɛ boni a edwɛkɛhanlɛ gyima mɔɔ yɛlɛyɛ ye ɛnɛ la bahɔ ye awieleɛ a?
Gyisɛse hanle kɛ: “Bɛbabɔ Belemgbunlililɛ ne anwo edwɛkpa ɛhye nolo wɔ azɛlɛ ye azo amuala bɛava bɛali maanle maanle ne amuala daselɛ, kolaa na awieleɛ ne ara.” (Mat. 24:14) Giliki edwɛkɛkpɔkɛ mɔɔ bɛhile ɔ bo “awieleɛ” wɔ ngyɛnu ɛhye nee ngyehyɛnu 6 nee 13 ne anu la a le teʹlos. Ɔkile Seetan ewiade ne mɔɔ bara awieleɛ bɔkɔɔ wɔ Amagɛdɔn la. (Yek. 16:14, 16) Ɛhye ati, yɛbahɔ zo yɛabɔ edwɛkpa ne nolo yɛahɔkpula mekɛ mɔɔ asɛɛ Amagɛdɔn ne ɛbɔ ɔ bo la. Ɛhye le ndelebɛbo fofolɛ mɔɔ yɛnyia wɔ edwɛkɛ ɛhye anwo a.
Dɛba ne, yɛdele ɔ bo kɛ saa anwongyelelɛ kpole ne bɔ ɔ bo na bɛsɛkye Babelɔn Kpole ne a, yɛbagyakyi edwɛkpa ne nolobɔlɛ. (Yek. 17:3, 5, 15, 16) Ɛnee yɛdie yɛdi kɛ ɛhye a bayɛ sɛkɛlɛneɛ adenle zo “Gyihova ɛlolɛ mekɛ ne” awieleɛ a. (Aye. 61:2) Eza yɛnyianle adwenle kɛ menli mɔɔ banyia bɛ ti wɔ anwongyelelɛ kpole ne anu la a le bɛdabɛ mɔɔ bɛlimoale bɛlale ye ali kɛ bɛdi nɔhalɛ bɛmaa Gyihova kolaa na anwongyelelɛ kpole ne abɔ ɔ bo la. Yɛvale bɛ yɛtotole Dwuuma mɔɔ nyianle bɛ ti wɔ Gyɛlusalɛm ɛzɛkyelɛ ne anu wɔ ɛvolɛ 607 K.Y.M. la anwo. Ɛnee bɛlimoa bɛyɛ menli ɛhye mɔ nzonlɛ wɔ bɛ nwoma azo kɛ bɛbanyia ngoane ɔluakɛ bɛzonlenle Gyihova yɛɛ ɛnee bɛkyi amumuyɛyɛlɛ. (Yiz. 5:11; 9:4) Noko zɔhane ndotonwo ne nee Gyisɛse edwɛkɛ mɔɔ wɔ Mateyu 24:14, mɔɔ kile kɛ bie a awie mɔ banyia nwolɛ adenle adie edwɛkpa ne kɔkpula kɛ asɛɛ awieleɛ bɔkɔɔ ne ɛra wɔ Amagɛdɔn la ɛngɔ.
Eza ndelebɛbo fofolɛ mɔɔ yɛnyia ye wɔ Mateyu 24:14 anwo la kile kɛ ɔwɔ kɛ yɛkakyi ndelebɛbo mɔɔ ɛnee yɛlɛ ye wɔ edwɛkɛ mɔɔ le kɛ ezuawolɛ mɔɔ wɔ Yekile 16:21 anwo la. Neɛnleanu dɔɔnwo mɔɔ yɛyɛ la ɛmaa yɛnwu kɛ ngɛlɛlera nwiɔ ne zɔho bɛ nwo. Adenle boni azo? Kɛzi menli bayɛ bɛ nyɛleɛ wɔ Belemgbunlililɛ edwɛkɛ ne anwo la a maa yɛnwu mualɛ ne a. Ɛzoanvolɛ Pɔɔlo hɛlɛle kɛ, edwɛkɛ ne le edwɛkpa maa “bɛdabɛ mɔɔ bɛlɛdie bɛ ngoane” la, “ɔbɔ evuanlɛ mɔɔ maa ngoane la.” Noko ɔle edwɛkɛ ɛtane, “ɔbɔ nvoanle mɔɔ maa ewule la” ɔmaa Nyamenle agbɔvolɛ. (2 Kɔl. 2:15, 16) Bɛkyi Belemgbunlililɛ ne anwo edwɛkɛ ne ɔluakɛ ɔmaa bɛnwu ye kɛ bɛ ewiade ne mɔɔ bɛwɔ nu la le amumuyɛ, Seetan a di zo a yɛɛ ɔnrɛhyɛ bɛbazɛkye ye.—Dwɔn 7:7; 1 Dwɔn 2:17; 5:19.
Eza yɛ ye nzonlɛ kɛ sɛkɛlɛneɛ adenle zo ezuawolɛ ne bayɛ “kpole.” Ɛhye bahola ahile kɛ, wɔ anwongyelelɛ kpole ne anu, wɔannea a edwɛkɛhanlɛ gyima ne baha menli ne kpole kpalɛ, mɔɔ kile kɛ bɛbamaa bɛanwu Gyihova duma ne kpalɛ bɛadɛla mekɛ biala. (Yiz. 39:7) Wɔ zɔhane mekɛ ne mɔɔ li awieleɛ bɔkɔɔ, mɔɔ ɛnee bɛzɛkye Babelɔn Kpole ne la, asoo edwɛkɛ ne babɔ evuanlɛ amaa bie mɔ na bɛara nwolɛ ɔ? Ɛhye bahola ayɛ zɔ. Bie a bɛbahakye anzɛɛ bɛbanwu kɛ Gyihova Alasevolɛ hanle hilele bɛ wɔ ɛvolɛ dɔɔnwo anu kɛ bɛbazɛkye adalɛ ɛzonlenlɛ.
Ɛhye le kɛ mɔɔ zile wɔ tete Yigyibiti wɔ Ngyegyelɛ Bulu ne anzi la. Mɔɔ Gyihova buale “Yigyibiti nyamenle ne mɔ kɔsɔɔti ndɛne” wiele la, “menli gyɛne dɔɔnwo” mɔɔ bɛnle Yizilayɛma la nee bɛ hɔle. (Ɛzɛ. 12:12, 37, 38) Bie a mɔɔ nyɛvolɛ ɛhye mɔ nwunle kɛ Ngyegyelɛ Bulu ne mɔɔ Mosisi hanle nwolɛ edwɛkɛ la ɛra nu la, yɛɛ ɔmaanle bɛzile kpɔkɛ kɛ bɛbazonle Gyihova a.
Awie biala mɔɔ barazonle Gyihova wɔ mekɛ mɔɔ bɛzɛkye Babelɔn Kpole ne bɛwie la banyia nwolɛ adenle aboa Kelaese amediema ne mɔ mɔɔ ɛnee bɛtɛbɔ azɛlɛ ye azo la. (Mat. 25:34-36, 40) Nɔhalɛ a le kɛ, zɔhane nwolɛ adenle ne mɔɔ menli banyia amaa bɛabua bɛ ndɛne kɛ bɛle mboane la abo bapɛ wɔ mekɛ mɔɔ ɔka ekyii Amagɛdɔn ne bɔ ɔ bo, mekɛ mɔɔ bɛva menli mɔɔ bɛkpokpa bɛ mɔɔ ɛha la bɛhɔ anwuma la.
Ndelebɛbo fofolɛ ɛhye mɔɔ yɛnyia la maa yɛnwu Gyihova ɛlɔlɛ kpole nee ye anwunvɔnezelɛ ne. Amgba, “ɔngulo kɛ bɛsɛkye awie biala, emomu ɔkulo kɛ menli kɔsɔɔti nu bɛ nwo.”—2 Pita 3:9