DEBIE MƆƆ ƐBAHOLA WƆAZUKOA LA
Mɔɔ Ɛyɛ A Ɔbamaa Wɔahakye Ngɛlɛlera Bie La
Ɔyɛ a ɔyɛ se ɔmaa wɔ kɛ ɛbahakye Baebolo ngyɛnu bie mɔɔ ɛ nye die nwo la ɔ? Bie a ɔka edwɛkɛ bie mɔɔ kyekye ɛ rɛle, anzɛɛ ɔboa wɔ ɔmaa ɛye adwenle ɛtane ɛfi ɛ ti anu anzɛɛ ɛkulo kɛ ɛka nwolɛ edwɛkɛ ɛkile awie. (Edw. 119:11, 111) Nea nzuzulɛ bie mɔ mɔɔ ɔbahola yeaboa wɔ yeamaa wɔahakye ngɛlɛlera ne mɔ anu edwɛkɛ la.
Kenga ye wɔ JW Library® ne azo. Saa ɛlɛkenga Baebolo ne wɔ JW Library na ɛnwu ngɛlɛlera biala mɔɔ ɛkulo kɛ ɛkakye na ɛfa ɛdi gyima nzinlii la a, yɛ ye nzonlɛ na kɛlɛ nwolɛ, “Ngɛlɛlera Mɔɔ Me Nye Die Nwo.”
Kɛlɛ na fa beta ɛleka mɔɔ ɛbanwu ye la. Kɛlɛ ngyɛnu ne mɔɔ ɛkulo kɛ ɛkakye la wɔ kɛlata zo na fa beta ɛleka mɔɔ ɛbada wɔanwu ye la. Menli bie mɔ fa beta bɛ neɛnlea nyunlu; bie mɔ noko fa beta bɛ felegye anlenkɛ ne anwo. Yɛɛ bie mɔ noko pɛ edwɛkɛ ne nvoninli na bɛfa bɛto bɛ kɔmpita anzɛɛ bɛ fonu ne anyunlu.
Yɛ kaade ekyi na kɛlɛ ye zo. Kɛlɛ Baebolo ngyɛnu ne wɔ kaade ne foa ko na kɛlɛ nuhua edwɛkɛ ne wɔ ye foa ko. Akee nea ɛleka mɔɔ wɔhɛlɛ ngyɛnu ne la na bɔ mɔdenle kɛ ɛbahakye nuhua edwɛkɛ ne, anzɛɛ nea ɛleka mɔɔ wɔhɛlɛ nuhua edwɛkɛ ne la na bɔ mɔdenle kɛ ɛbahakye Baebolo ngyɛnu ne.