Fa Baebolo Ne Di Gyima Kpalɛ
1. Duzu ati a Baebolo ne boa kpalɛ ɛ?
1 Saa yɛfa Nyamenle Edwɛkɛ ne mɔɔ vi sunsum nu la yɛdi gyima kpalɛ a, ɔboa ɔmaa yɛkilehile nɔhalɛ ne anu wienyi na yɛkpa adalɛ ngilehilelɛ nee mɛla mɔɔ menli ɛhyehyɛ la anwo ɛdanlɛ.—2 Tem. 2:15; 1 Pita 3:15.
2. Duzu a baboa yeamaa yɛanwu ngɛlɛlera ne mɔ ndɛndɛ a?
2 Sukoa Ye Kpalɛ: Kɛmɔ ɔde wɔ adwinli biala anwo la, yɛta yɛfa Baebolo ne yɛdi gyima kpalɛ a yɛɛ yɛbanwu nu a. Saa ɛkenga Baebolo ne amuala a, ɔbamaa wɔanwu edwɛkɛtile mɔɔ gyi zo la. Ɛhye noko baboa wɔ yeamaa wɔahakye ngɛlɛlera ne mɔ na wɔanwu bɛ ndɛndɛ. Mekɛ mɔɔ ɛlɛnwu Ngɛlɛlera ne mɔ dɔɔnwo la, ɛbava mɔdenlebɔlɛ nee diedi kpole wɔadendɛ wɔ mekɛ mɔɔ ɛlɛdi awie mɔ daselɛ mgbemgbɛnenu nee mekɛ mɔɔ ɛkɛhɔ daselɛlilɛ la.—1 Tɛs. 1:5.
3, 4. (a) Ndenle mɔɔ yɛbahola yɛalua zo yɛanwu Baebolo ne anu kpalɛ la bie mɔ a le boni? (b) Asoo wɔlua ndenle bie azo wɔnwu Ngɛlɛlera ne anu kpalɛ?
3 Saa ɛkɔ debiezukoalɛ a, maa ɔyɛ wɔ subane kɛ ɛbabuke Baebolo ne wɔali bɛ nzi. Ɛlɛyɛ ɛ ti anwo debiezukoalɛ nee mekɛ mɔɔ ɛlɛsiezie ɛ nwo wɔamaa debiezukoalɛ la, kenga Ngɛlɛlera ne mɔɔ wɔ nu la na dwenledwenle kɛzi ɛbava wɔali gyima la anwo. Menli dɔɔnwo ɛnwu kɛ saa bɛkenga Baebolo tɛkese bie bɛfi Baebolo mumua ne anu na bɛangenga ye wɔ kɔmputa anzɛɛ kɛlata gyɛne bie azo a, ɔboa ɔmaa bɛnwu ye ndɛ na bɛfa bɛdi gyima wɔ daselɛlilɛ nu.—Dwɔn 14:26.
4 Mbusua bie mɔ ɛye mekɛ ɛzie ɛkɛ mɔɔ bɛfa bɛkakyehakye Baebolo tɛkese a. Bie a bɛfa kɛlata mɔɔ bɛhɛlɛ ngɛlɛlera bie wɔ ye foa ko na nuhua edwɛkɛ ne noko wɔ ye foa ko la a bɛdi gyima a. Bɛbizebiza bɛ nwo bɛnea kɛ bɛkɛnwu ɛleka mɔɔ ngɛlɛlera bie wɔ la. Saa yɛsukoa edwɛkɛ mɔɔ yɛbaha wɔ daselɛlilɛ nu nee kɛzi bɛfa Baebolo ne bɛbua kpuyia la a, ɔmaa yɛkola yɛfa yɛdi gyima kpalɛ.
5. Duzu ati a yɛkulo kɛ yɛfa Baebolo ne yɛdi gyima kpalɛ ɛ?
5 Nvasoɛ ɛnle buluku biala azo kɛ Baebolo ne la. Edwɛkɛ mɔɔ kola maa menli nwu nrɛlɛbɛ na bɛnyia “ngoanelielɛ la” a wɔ nu a. (2 Tem. 3:15) Kɛmɔ menli dɔɔnwo mɔɔ wɔ yɛ azɛlɛsinli ne anu la ɛnze ninyɛne mɔɔ sonle bolɛ mɔɔ wɔ Baebolo ne anu la ati, ɔwɔ kɛ yɛbɔ mɔdenle yɛfa Baebolo ne yɛdi gyima kpalɛ yɛmaa bɛnwu mɔɔ wɔ nu la.—Mrɛ. 2:1-5.