Fa Bodane Sie Ɛ Nye Zo Wɔ Ngakyelɛlilɛ Mekɛ Ne Anu

Gyihova menli anye la kɛ ɛvolɛ biala bɛbabɔ nu bɛayɛ Ngakyelɛlilɛ ne. Wɔ dapɛne mɔɔ li Ngakyelɛlilɛ ne anyunlu nee ɔ nzi la anu, yɛfa nwolɛ adenle titili mɔɔ yɛnyia la yɛye Gyihova ayɛlɛ na yɛyɛ ye mo wɔ ɛkpɔnenlɛ ahyɛlɛdeɛ ne anwo. (Ɛf 1:3, 7) Kɛ neazo la, yɛfa anyelielɛ yɛto ɛsalɛ yɛfɛlɛ menli kɛ bɛrɛla Ngakyelɛlilɛ ne bie. Bie mɔ yɛ ngyehyɛleɛ fa dɔnehwele 30 anzɛɛ 50 yɛ adekpakyelɛ boavolɛ wɔ March nee April siane ne anu. Ɛkulo kɛ ɛtɛlɛ wɔ ɛzonlenlɛ gyima ne anu wɔ Ngakyelɛlilɛ mekɛ ɛhye anu ɔ? Duzu a baboa wɔ yeamaa wɔayɛ zɔ a?

Fane dɔɔnwo ne ala, saa yɛdimoa yɛyɛ ngyehyɛleɛ kpalɛ a, yɛbahola yɛayɛ dɔɔnwo. (Mrɛ 21:5) Ɛnɛ a le mekɛ mɔɔ ɔwɔ kɛ yɛbɔ ɔ bo yɛyɛ ngyehyɛleɛ a, ɔluakɛ ɔnrɛhyɛ na Ngakyelɛlilɛ mekɛ ne adwu. Dwenle ndenle mɔɔ ɛbalua zo wɔadɛlɛ wɔ ɛzonlenlɛ gyima ne anu wɔ Ngakyelɛlilɛ mekɛ ne anu la anwo, na si mɔɔ ɔhyia kɛ ɛyɛ na wɔadwu wɔ bodane ne anwo la anwo kpɔkɛ. Akee sɛlɛ Gyihova kɛ ɔyila wɔ mɔdenlebɔlɛ ne azo.​—1Dw 5:14, 15.

Ndenle boni mɔ azo a ɛbahola wɔalua wɔadɛlɛ wɔ ɛzonlenlɛ gyima ne anu wɔ Ngakyelɛlilɛ mekɛ ne anu a?