Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu—Kɛlata Kpalɛ Ɛhɛlɛlɛ

DEƐMƆTI ƆHYIA LA: Ngɛlata 14 mɔɔ ɛzoanvolɛ Pɔɔlo hɛlɛle vale maanle ɔ mediema Kilisienema anwosesebɛ la anu ko a le 1 Kɔlentema buluku ne. Saa awie ɛlɛkɛlɛ kɛlata a, ɔnyia mekɛ ɔdwenledwenle edwɛkɛ agbɔkɛ mɔɔ ɔbava yeali gyima la anwo kpalɛ, na ahenle mɔɔ ɔbava yeamaa ye la noko kola kenga ye fane dɔɔnwo. Kɛlata ɛhɛlɛlɛ le adenle kpalɛ mɔɔ yɛdua zo yɛdi yɛ mbusuafoɔ nee yɛ gɔnwo mɔ daselɛ a. Eza ɔle adenle kpalɛ mɔɔ yɛdua zo yɛdi menli mɔɔ yɛnnwu bɛ yɛ nee bɛ ɛndendɛ la daselɛ. Kɛ neazo la, bie a ɛnee awie ɛhile edwɛkpa ne anwo anyelielɛ noko ɔyɛ se kɛ ɛbado ye wɔ sua nu. Ɔnla aze kɛ yɛ sa baha menli bie mɔ wɔ yɛ azɛlɛsinli nu ɔluakɛ bɛde azua mɔɔ bɛlie nwolɛ bane la anu anzɛɛ bɛde moa kpalɛ la ati. Ninyɛne boni mɔ a ɔwɔ kɛ yɛyɛ bɛ nzonlɛ, titili saa yɛkɛlɛ kɛlata yɛamaa awie mɔɔ yɛnze ye a?

KƐZI BƐYƐ YE LA:

• 

  Kɛlɛ edwɛkɛ mɔɔ saa anrɛɛ ɛ nee ahenle ɛlɛtendɛ a ɛbaha la. Da ɛ nwo ali wɔ kɛlata ne mɔlebɛbo, na maa ɔnwu deɛmɔti ɛlɛkɛlɛ ye la. Ɛbahola wɔabiza ye kpuya wɔamaa yeadwenle nwolɛ na akee wɔahwe ye adwenle wɔahɔ yɛ wɛbsaete ne azo. Akee ka sua nu Baebolo ɛzukoalɛ nwo ngyehyɛleɛ ne anwo edwɛkɛ kile ye anzɛɛ twe ye adwenle kɔ mbuluku mɔɔ yɛfa yɛkilehile la anu ko edwɛkɛtile ne mɔ azo. Ɛbahola wɔava ninyɛne le kɛ ngitanwolilɛ kaade, ɛsalɛdolɛ nee trate wɔavea ɛnvulopu ne anu

• Maa ɔyɛ sikalɛ. Ɔnle kɛ wɔ kɛlata ne anu edwɛkɛ yɛ tendenle somaa, tɛ ye zɔ a, ye ɛgengalɛ bayɛ ye ɛvɛlɛ.​—Nea kɛlata ɛhɛlɛlɛ nwo neazo ne

• Kenga nu kpalɛ amaa wɔanwu nvonleɛ biala mɔɔ wɔ nu la. Nea kɛ ɔyɛ anyelielɛ na ɔda agɔnwolɛvalɛ ali. Fa stamp dodo mɔɔ ɔhyia la beta zo