Yɛsukoa Nyamenle Anwo Debie Yɛfi Ye Ngapezoma Ne Ɛkɛ
Wɔ tete ne, Nyamenle luale ngapezoma ne anwo zo vale edwɛkɛ mɔɔ anwo hyia la maanle alesama. Asoo edwɛkɛ ɛhye mɔ bahola amaa yɛanwu kɛzi yɛbanyia Nyamenle nyilalɛ la ɔ? Ɛhɛe. Yɛnlea mɔɔ yɛbahola yɛazukoa yɛavi ngapezoma nɔhavoma nsa ɛkɛ ne la.
EBILEHAM
Nyamenle ɛnnea sonla nyunlu na ɔkulo kɛ ɔyila awie biala.
Nyamenle bɔle ngapezonli Ebileham ɛwɔkɛ kɛ, “ɔlua ɛdawɔ ti mbusua kɔsɔɔti mɔɔ wɔ azɛlɛ ye azo la banyia nyilalɛ.”—Gyɛnɛsese 12:3.
Duzu a yɛsukoa a? Nyamenle kulo yɛ kpalɛ na ɔkulo kɛ ɔyila mbusua kɔsɔɔti—mrenyia, mraalɛ yɛɛ ngakula mɔɔ bayɛ tieyɛ amaa ye la.
MOSISI
Nyamenle se anwunvɔne na ɔyila bɛdabɛ mɔɔ bɛbɔ mɔdenle kɛ bɛbanwu ye la.
Tumivolɛ Bedevinli ne maanle ngapezonli Mosisi tumi ɔmaanle ɔyɛle nwanwane ninyɛne mgbole. Noko Mosisi yɛle asɔne kɛ: “Maa menwu wɔ ndenle ne mɔ amaa meanwu wɔ na meahɔ zo meanyia ɛ nyunlu ɛlolɛ.” (Ɛzɛdɔso 33:13) Nyamenle anye liele mɔɔ Mosisi bizale la anwo na ɔmaanle ɔnwunle Ye ndenle nee ye subane ne mɔ na ɔdele ɔ bo. Kɛ neazo la, Mosisi nwunle ye kɛ Bɔvolɛ ne lɛ “anwunvɔnezelɛ nee ahunluyelɛyelalɛ” subane.—Ɛzɛdɔso 34:6, 7.
Duzu a yɛsukoa a? Nyamenle kulo kɛ ɔyila mrenyia, mraalɛ yɛɛ ngakula mɔɔ bɔ mɔdenle kɛ bɛbanwu ye kpalɛ la amuala. Yemaa yɛnwu adenle mɔɔ yɛbalua zo yɛazonle ye la wɔ Ngɛlɛlera Nwuanzanwuanza ne anu yɛɛ yeziezie ɔ nwo kɛ ɔbayila yɛ.
GYISƐSE
Gyisɛse vile anwunvɔnezelɛ nu yɛle ewule ngakyile ayile
Yɛbahola yɛanyia Nyamenle nyilalɛ dahuu saa yɛsukoa Gyisɛse, mɔɔ ɔyɛle nee mɔɔ ɔhilehilele la anwo debie a.
Yɛbahola yɛazukoa Gyisɛse anwo ninyɛne dɔɔnwo wɔ Nyamenle Edwɛkɛ ne anu. Nyamenle maanle Gyisɛse tumi maanle ɔyɛle nwanwane ninyɛne mgbole dɔɔnwo le kɛ anyezinlirama, anzondilirama nee abuburama mɔɔ ɔyɛle bɛ ayile la. Ɔdwazole menli mɔɔ bɛwu la bɔbɔ. Gyisɛse maanle yɛnwunle nyilalɛ mɔɔ Gyihova bava amaa alesama kenle bie la. Ɔmaanle yɛnwunle kɛzi yɛ nuhua ko biala bahola anyia nyilalɛ ɛhye mɔ la: “Ɛhye a le dahuu ngoane a, kɛ bɛkɛnwu wɔ, nɔhalɛ Nyamenle kokye ne, nee mɔɔ ɛzoanle ye la, Gyisɛse Kelaese.”—Dwɔn 17:3.
Ɛnee Gyisɛse lɛ anwunvɔnezelɛ nee atiakunlukɛnlɛma subane. Mrenyia nee mraalɛ, yɛɛ ngakula nee mgbanyinli muala liele ye ɛsalɛdolɛ ne azo: “Bɛzukoa me, ɔluakɛ mele bɛtɛɛ yɛɛ mebɛlɛ me nwo aze wɔ ahonle nu, na bɛ nwo kɛdɔ bɛ.” (Mateyu 11:29) Gyisɛse anyɛ kɛ ye mekɛ zo amra mɔɔ ɛnee bɛkile mraalɛ ateetee la, emomu ɔ nee mraalɛ lile ye wɔ atiakunlukɛnlɛma nu, enililɛ nee ɛbulɛ adenle zo.
Duzu a yɛsukoa a? Gyisɛse lale ɛlɔlɛ kpole ali hilele menli na ɔhilele yɛ kɛzi ɔwɔ kɛ yɛ nee menli di la.
GYISƐSE ƐNLE NYAMENLE
Ngɛlɛlera ne maa yɛnwu ye kɛ “Nyamenle kokye a yɛlɛ a” na Gyisɛse Kelaese le Nyamenle soanvolɛ mɔɔ bɛlɛ ɔ nwo aze. (1 Kɔlentema 8:6) Gyisɛse hanle ye wienyi kɛ Nyamenle le kpole tɛla ye na ɔdaye a ɔzoanle ye ɔrale azɛlɛ ye azo a.—Dwɔn 11:41, 42; 14:28.a