Bɔvolɛ Ne Bayila Wɔ Dahuu

Nyamenle bɔle ngapezonli Ebileham ɛwɔkɛ kɛ ɔlua ɔ bo zo amra ne anu ko anwo zo, “azɛlɛ ne azo maanle maanle kɔsɔɔti” banyia nyilalɛ. (Gyɛnɛsese 22:18) Nwane a bayɛ abozonli ɛhye a?

Kɛyɛ ɛvolɛ 2,000 mɔɔ ɛze la, Nyamenle maanle Gyisɛse mɔɔ ɔle Ebileham abozonli la tumi maanle ɔyɛle nwanwane ninyɛne mgbole. Nwanwane ninyɛne ɛhye mɔ di daselɛ kɛ ɛwɔkɛ mɔɔ Nyamenle bɔle Ebileham la balua Gyisɛse anwo zo a ara a.​—Galeehyeama 3:14.

Nwanwane ninyɛne mɔɔ Gyisɛse yɛle la maanle menli nwunle kɛ ɔdaye a Nyamenle ɛkpa ye kɛ ɔrayila alesama a, eza bɛmaa yɛnwu kɛzi Nyamenle balua ɔ nwo zo ayɛ ɛhye la. Nea kɛzi Gyisɛse nwanwane ninyɛne ne da ye subane ngɛnlɛma ne mɔ ali la.

Ahunluyelɛyelalɛ​—Gyisɛse yɛle menli mɔɔ ɛnde kpɔkɛ la ayile.

Mekɛ bie, kokobɛvolɛ bie zɛlɛle Gyisɛse kɛ ɔyɛ ye ayile. Gyisɛse zɔle ye na ɔzele ye kɛ: “Mekulo!” Ɛkɛ ne ala ye kokobɛ ne hɔle.​—Maake 1:40-42.

Ahunlunyele​—Gyisɛse maanle menli aleɛ.

Ɛnee Gyisɛse anye ɛnlie nwo kɛ ɛhɔne bahu menli. Wɔ mekɛ ngakyile nu, ɔluale nwanwane adenle zo ɔvale paano nee fɛlɛ ekyi bie ɔmaanle menli apenle dɔɔnwo aleɛ. (Mateyu 14:17-21; 15:32-38) Bɛ kɔsɔɔti bɛ ko yila na aleɛ dɔɔnwo hale.

Anwunvɔnezelɛ​—Gyisɛse dwazole mowuamra.

Mɔɔ Gyisɛse nwunle kunlavolɛ raalɛ ne mɔɔ ɔ ra kokye ɛwu na ɔnlɛ neavolɛ biala la “ɔ nwo yɛle ye alɔbɔlɛ,” ɔti ɔdwazole ye.​—Luku 7:12-15.