Yɛnyia Adenle Yɛsi Nɔhalɛ Ɛzonlenlɛ Azua Na Yɛnea Zolɛ Boɛ

Ɛnee ɔhyia gyima ɛsesebɛ nee ezukoa dɔɔnwo na bɛazi Yizilayɛma ɛzonlenlɛ sua ne. Noko, Yizilayɛma bɔle mɔdenle zile sua ne. (1Ek 29:2-9; 2Ek 6:7, 8) Mɔɔ bɛzile bɛwiele la, kɛzi Yizilayɛma nleanle zolɛ la maa yɛnwu bɛ sunsum nu gyinlabelɛ ne. (2Ar 22:3-6; 2Ek 28:24; 29:3) Ɛnɛ, Kilisienema fa mekɛ dɔɔnwo nee mɔdenlebɔlɛ si azua, bɛsiezie nu na bɛnea Belemgbunlililɛ Asalo nee Nyianu Asalo ne mɔ azo boɛ. Noko akee, ɔle nwolɛ adenle kpole kɛ yɛ nee Gyihova bayɛ gyima wɔ adenle ɛhye azo yɛɛ ɔboka yɛ ɛzonlenlɛ nwuanzanwuanza ne anwo.​—Ed 127:1; Ye 7:15.

YƐBAHOLA YƐABOA ƆLUA . . . 

• 

  Ɛkɛ ne mɔɔ yɛbaziezie wɔ mekɛ mɔɔ yɛkɛkpɔne debiezukoalɛ biala la. Bɔ mɔdenle kɛ ɛbamaa ɛleka mɔɔ ɛde la ayɛ bɔkɔbɔkɔ.

• 

  Belemgbunlililɛ Asalo mɔɔ yɛbakpoa ye dahuu na yɛanlea zolɛ boɛ la. Saa menli dɔɔnwo yɛ bie a, ɔmaa gyima ne yɛ anyelielɛ na ɔnyɛ se.​—lv 92-93 ¶18.

• 

  Ezukoa mɔɔ yɛbava yɛaboa la. “Ɛkpɔsɛba nwiɔ” bɔbɔ mɔɔ yɛbavi ahonle nu yɛava yɛaye ndoboa la sɔ Gyihova anye.​—Mk 12:41-44.

• 

  Yɛ nwo mɔɔ yɛbadu yɛamaa bɛasisi teokelase azua na bɛayɛ ye boɛ, saa yɛ tɛnlabelɛ ne bamaa yɛ adenle a. Saa ɛnze suazilɛ nye zo bɔbɔ a, ɛbahola wɔayɛ bie.