Fa Baebolo Ne Kilehile Buluku Ne Anu Edwɛkɛ Ne Kilehile Kpalɛ

Mekɛ mɔɔ sukoavo bie ɛlɛsukoa mɔɔ Baebolo ne kilehile amgba na ɔlɛfa yeali gyima la, ɔbanyi na yeazo sunsum nu ma. (Edw. 1:1-3) Yɛbahola yɛaboa yɛ Baebolo sukoavo bie yɛamaa yeanyia anyuhɔlɛ ɔlua Baebolo ne Kilehile buluku ne anu edwɛkɛ ne mɔɔ yɛ nee ye bazukoa la azo.

Mukenye Kpuya: Kpuya wɔ tile biala mɔlebɛbo mɔɔ bɛbua wɔ ɛzukoalɛdeɛ ne anu. Ɛbahola wɔabiza kpuya ɛhye mɔ mɔɔ ɛmkpondɛ nwolɛ mualɛ la wɔamaa ɔ nye alie mɔɔ bɛbazukoa la anwo. Anzɛɛ ɛbahola wɔamaa yeahile ye adwenle ekyii wɔ kpuya ko biala anwo. Saa ɔkile ye adwenle na ɔfo a, ɔngyia kɛ ɛbaha nwolɛ edwɛkɛ. Ye mualɛ ne bamaa wɔanwu edwɛkɛ mɔɔ ɔwɔ kɛ ɛtwe ye adwenle ɛkɔ zo na ɛsi zolɛ adua la.​—Mrɛ. 16:23; 18:13.

Mokanwo: Saa sukoavo ne te edwɛkɛ ne abo na ɔdie ɔto nu wɔ debiezukoalɛ mumua ne anu a, ɛbahola wɔamaa ye anwosesebɛ kɛ ɔnlea mokanwo ne mɔɔ boka nwo la anu. Wɔ debiezukoalɛ bieko anu, bie a ɛbava mekɛ ekyii wɔanlea wɔanwu ye kɛ ɔte ɔ bo a. Noko akee, saa ɔkɛboa ye a, ɔwɔ kɛ ɛnyia mekɛ ɛ nee ye suzu edwɛkɛ mɔɔ wɔ mokanwo ne anu anzɛɛ ye foa bie la anwo, bɛgenga ɛdendɛkpunli ne na biza ye kpuya mɔɔ wɔlimoa wɔziezie la.

Ndinu Ɛleka: Edwɛkɛ mɔɔ wɔ ndinu ɛleka ne mɔɔ wɔ tile biala awieleɛ la bua mukenye kpuya ne mɔ. Ɛbahola wɔagyinla edwɛkɛ ɛhye azo wɔanwu kɛ wɔ sukoavo ne te ɔ bo na ɔbahola yeahilehile edwɛkɛ titili mɔɔ wɔ nu la anu. Ɛ nee ye bɛgenga edwɛkɛ ne nee nwolɛ ngɛlɛlera ne mɔ amuala. Akee maa ɔva ngɛlɛlera ne mɔ ɔhilehile deɛmɔti edwɛkɛ ne le nɔhalɛ la anu.​—Gyi. 17:2, 3.