Siezie Ɛ Nwo Kpalɛ Maa Ngilehilelɛ
1. Saa yɛlɛyɛ Baebolo ɛzukoalɛ a, duzu ati a ɔwɔ kɛ yɛmaa sukoavo ne anye die nwolɛ ɛ?
1 Saa yɛlɛyɛ Baebolo ɛzukoalɛ a, ɔwɔ kɛ yɛsiezie yɛ nwo kpalɛ amaa yɛ edwɛkɛ ne aha sukoavo ne ahonle na yeazonle Gyihova. Ɔwɔ kɛ yɛbɔ mɔdenle biala yɛmaa sukoavo ne anye die Baebolo ne anu nɔhalɛ ne anwo. Ɛhye bamaa sukoavo ne ayɛ nwolɛ debie. (Mɛla. 6:5; Mrɛ. 4:23; 1 Kɔl. 9:26) Kɛ ɔkɛyɛ na yɛayɛ ɛhye ɛ?
2. Kɛzi asɔneyɛlɛ boa maa yɛsiezie yɛ nwo kpalɛ ɛ?
2 Fa Asɔneyɛlɛ Siezie Ɛ Nwo: Kɛmɔ Gyihova a maa nɔhalɛ ma ne nyi wɔ sukoavo ne ahonle nu la ati, ɔfɛta kɛ yɛfa asɔneyɛlɛ yɛsiezie yɛ nwo na yɛsɛlɛ yɛmaa sukoavo ne nee ye ngyianlɛ titile. (1 Kɔl. 3:6; Gye. 1:5) Asɔneyɛlɛ zɛhae bahola aboa yeamaa yɛanwu kɛzi yɛbahola yɛava Gyihova anwo ‘nɔhalɛ ndelebɛbo’ yɛayi ye ahonle tɛkɛɛ la.—Kɔl. 1:9, 10.
3. Kɛzi yɛbahola yɛazuzu sukoavo ne anwo wɔ mekɛ mɔɔ yɛlɛsiezie yɛ nwo la ɛ?
3 Suzu Sukoavo Ne Anwo: Ɛnee Gyisɛse ze kɛ ngilehilelɛ kpalɛ kile kɛ ɔwɔ kɛ bɛdwenle menli ne anwo. Yeanyɛ boɛ fee la, wɔ mekɛ nwiɔ anu bɛbizale Gyisɛse edwɛkɛ ko ne ala kɛ, “Duzu a menyɛ na meanyia ngoane mɔɔ ɛnlɛ awieleɛ a?” Wɔ ko biala anu, ɔluale adenle gyɛne zo ɔbuale edwɛkɛ ne. (Luku 10:25-28; 18:18-20) Ɔwɔ kɛ yɛsuzu mɔɔ hyia kɛ sukoavo ne nwu ye la anwo wɔ mekɛ mɔɔ yɛlɛsiezie yɛ nwo la. Ngɛlɛlera mɔɔ wɔ nu la boni a yɛbagenga a? Edwɛkɛ dodo nyɛ a yɛbazukoa a? Ɛzukoalɛdeɛ ne anu ninyɛne boni mɔ a ɔbayɛ se kɛ sukoavo ne kɛde ɔ bo a? Saa yɛkola yɛnwu kpuyia mɔɔ sukoavo ne bahola abiza la bie mɔ a, ɔbaboa yeamaa yɛaziezie yɛ nwo na yɛali nwolɛ gyima kpalɛ.
4. Duzu a anwoziezielɛ kpalɛ mɔɔ yɛbayɛ la kile a?
4 Neɛnlea Edwɛkɛ Ne Anu: Ɔnva nwolɛ mekɛ dodo mɔɔ yɛva yɛzukoa edwɛkɛ ne dɛba la, ɛhye a le mekɛ mɔɔ lumua mɔɔ yɛ nee sukoavo ne bazukoa a. Saa ɔbaha ye ahonle a, ɔhyia kɛ yɛsiezie yɛ nwo kpalɛ mekɛ biala. Ɛhye kile kɛ ɔwɔ kɛ yɛyɛ mɔɔ yɛmaa yɛ sukoavoma anwosesebɛ kɛ bɛyɛ la. Neɛnlea edwɛkɛ ne nee ngɛlɛlera ne anu, suzu sukoavo ne anwo na ɔkɛyɛ boɛ a, pepɛ edwɛkɛtitile ne mɔ abo.—Wulo. 2:21, 22.
5. Kɛzi yɛbahola yɛazukoa Gyihova ɛ?
5 Gyihova anye die Baebolo sukoavo ko biala anyuhɔlɛ nwo kpalɛ. (2 Pita 3:9) Saa yɛnyia mekɛ yɛsiezie yɛ nwo yɛmaa Baebolo ɛzukoalɛ biala a, yɛkile kɛ yɛdayɛ noko yɛdwenle sukoavo ne anwo.