Kɛzi Bɛfa Ninyɛne Mɔɔ Bɛgua Mbuluku Zo Bɛdi Daselɛ La

Ninyɛne mɔɔ bɛfa mbuluku bɛgua zo mɔɔ bɛfa bɛdi daselɛ la ɛlɛtwe menli mɔɔ bɛlɛ ahonle kpalɛ la ara nɔhalɛ ne anu. (Dwɔn 6:44) Ɛhye ati, bɛmaa asafo nu mgbanyima anwosesebɛ kɛ bɛyɛ bagua nu daselɛlilɛ ne bie wɔ bɛ azɛlɛsinli ne anu ɛleka mɔɔ menli dɔɔnwo fa la. Kɛmɔ yɛkpɔne a yɛyeye yɛ ninyɛne ne la ati, fane dɔɔnwo ne ala ɔngyia kɛ yɛbabiza sua ne azo mgbanyima adenle kolaa na yɛava yɛazie ɛkɛ. Nwane mɔ a fɛta kɛ bɛmaa bɛnea zo a? Nolobɔlɛma mɔɔ bɛlɛ ndelebɛbo, bɛsiezie bɛ nwo kpalɛ na bɛkola bɛ nee awie mɔ di adwelie la. Ninyɛne mɔɔ ɔwɔ kɛ nolobɔlɛma yɛ nee mɔɔ ɔnle kɛ bɛyɛ la bie mɔ a doɔdoa zo la.

Ɔwɔ kɛ:

Nolobɔlɛma da agɔnwolɛvalɛ subane ali, bɛkola bɛwolo bɛ na bɛboa menli mɔɔ ɛlɛpɛ nu la. Bie mɔ sele kile menli mɔɔ ɛlɛpɛ nu la na bɛbiza bɛ ahye. Saa awie ɛlɛpɛ nu na ɔnea mbuluku ne a, ɛbahola wɔaha kɛ, “Ɛbahola wɔava biala mɔɔ ɛkulo la.”
Ɛgyinla ahane ekyi. Wɔ ɛleka bie mɔ, saa nolobɔlɛma te bɛ nwo ekyii fi mbuluku ne anwo a ɔboa kpalɛ. Bie mɔ ɛnwu ye kɛ saa bɛbikye mbuluku ne a, ɔmaa ɔyɛ se ɔmaa menli mɔɔ bɛlɛpɛ nu la kɛ bɛbara nwolɛ yemɔti bɛgyinla moa ekyi na awie ba nwolɛ a bɛahɔ ɛkɛ. Saa awie ba mbuluku ne anwo a, bɔ mɔdenle kɛ ɛ nee ye bali adwelie, ɛbahola wɔabiza ye kɛ, “Asoo wɔdwenle zɔhane kpuya ne anwo ɛlɛ?”
Ɛfa Baebolo ne ɛdi gyima mekɛ biala.
Ɛkilehile kɛzi yɛ nee awie mɔ sukoa Baebolo ne la anu ɛkile awie biala mɔɔ bava mbuluku le kɛ Baebolo ne Kilehile ne bie la. Ka kile ye kɛ ɛkpondɛ kɛ ɛye Duzu Ati A Ɔwɔ Kɛ Ɛsukoa Baebolo Ne A? video ne ɛkile ye.
Saa ɔbayɛ boɛ a, ɛdie anyelielɛma fonu nɔma nee bɛ adelɛse. Saa ahenle ɛnde wɔ azɛlɛsinli ne anu a, hyehyɛ Please Follow Up (S-43) kɛlata ne bie na fa maa kɛlɛhɛlɛvolɛ ne ndɛndɛ.