Ɛbazukoa Gyihova Nee Gyisɛse Mɔdenlebɔlɛ Ne Wɔ Ngakyelɛlilɛ Ɛhye Anu Ɔ?

1. Duzu a Gyihova Alasevolɛ bɔ mɔdenle yɛ ye wɔ Ngakyelɛlilɛ mekɛ ne anu a?

¹ Gyihova bɔ mɔdenle di ye bodane nwo gyima. Ayezaya 9:7 ka Nyamenle Belemgbunlililɛ nyilalɛ ne anwo edwɛkɛ kɛ: ‘Gyihova ɛbɔ kpɔkɛ kɛ ɔbayɛ ɛhye.’ Wɔ ye azɛlɛ ye azo gyima ne anu, Nyamenle Ara ne noko bɔle nɔhalɛ ɛzonlenlɛ nwo mɔdenle. (Dwɔn 2:13-17; 4:34) Ɛvolɛ biala, Ngakyelɛlilɛ mekɛ ne dwu zo a, nolobɔlɛma mgbe dɔɔnwo mɔɔ wɔ ewiade la bɔ mɔdenle sukoa Gyihova nee Gyisɛse na bɛyɛ dɔɔnwo wɔ ɛzonlenlɛ gyima ne anu. Ɛbayɛ bie ɔ?

2. Duzu a yɛbabɔ ɔ bo yɛayɛ wɔ March 7 a?

² Ngakyelɛlilɛ Nolobɔlɛ: Ɛvolɛ ɛhye Ngakyelɛlilɛ ne anwo nolobɔlɛ ne babɔ ɔ bo Folɛ, March 7. Toto wɔ ninyɛne boɛ na yɛ dɔɔnwo wɔ daselɛlilɛ nu. Asafo dɔɔnwo bava anyelielɛ ayɛ mɔɔ bɛbahola biala la ayɛ gyima dɔɔnwo wɔ bɛ azɛlɛsinli ne anu. Bɔ mɔdenle dua ɛsalɛdolɛ ngɛlata nee jw.org ne azo to ɛsalɛ fɛlɛ wɔ Baebolo sukoavoma, menli mɔɔ ɛsia ɛkɔkpɔla bɛ, ɛ gɔnwo mɔ gyimayɛvoma, ɛ nwo amra nee wɔ sukuluma.

3. Kɛ ɔkɛyɛ na yɛadɛlɛ yɛ ɛzonlenlɛ gyima ne anu wɔ March nee April ɛ?

³ Adekpakyelɛ Boavolɛ: Yɛbahola yɛabɔ mɔdenle yɛadɛlɛ yɛ ɛzonlenlɛ gyima ne anu. Menli dɔɔnwo bahola ayɛ adekpakyelɛ boavolɛ wɔ March nee April, ɔluakɛ yɛbahola yɛava dɔnehwele 30 yɛabu mgbonda. Saa bɛlɛyɛ abusua ɛzonlenlɛ anzɛɛ ɛ ti anwo debiezukoalɛ a, fa asɔneyɛlɛ suzu kɛzi ɛbahola wɔayɛ ɛhye la anwo. (Mrɛ. 15:22) Saa ɛfa anyelielɛ ɛyɛ ɛsalɛdolɛ gyima ɛhye bie a, ɔbaha awie mɔ yeamaa bɛabɔ mɔdenle. Saa ɛyɛ ngyehyɛleɛ kpalɛ na ɛkola ɛyɛ dɔɔnwo a, ɛbazukoa Gyisɛse mɔdenlebɔlɛ ne.​—Maake 6:31-34.

4. Saa yɛsukoa Gyihova nee Gyisɛse a, duzu a bavi nu ara a?

⁴ Saa yɛsukoa Gyihova nee Gyisɛse na yɛyɛ dɔɔnwo wɔ Ngakyelɛlilɛ mekɛ ɛhye anu a, yɛbanyia nyilalɛ. Ɔbamaa yɛali menli dɔɔnwo mɔɔ bɛwɔ azɛlɛsinli ne anu la daselɛ. Yɛ nye balie kɛ yɛlɛsonle Gyihova na yɛlɛboa awie mɔ la. (Gyi. 20:35) Mɔɔ hyia kpalɛ la, ɔbazɔ Nyamenle nee ɔ Ra ne anye.