Bagua Nu Daselɛlilɛ Adenle Fofolɛ Mɔɔ Yɛ Anyelielɛ
1 Bɛze asafo mɔɔ bɛlɛ ɛleka mɔɔ menli dɔɔnwo fa ɛkɛ wɔ bɛ azɛlɛsinli ne anu la kɛ bɛva mbuluku bɛgua ɛkponle anzɛɛ ehwili zo bɛyɛ bagua nu daselɛlilɛ. Saa bɛfa mbuluku ne bɛgua ehwili zo a, yeanyɛ boɛ fee la ɔwɔ kɛ sonla ko a gyinla anzɛɛ tɛnla nwo a. Noko saa bɛfa bɛgua ɛkponle zo a, ɔwɔ kɛ nolobɔlɛma nwiɔ a gyinla nwo a. Ɔwɔ kɛ menli mɔɔ bɛbamaa bɛagyinla ɛkponle ne anwo la te bɛ nyunlu, da agɔnwolɛvalɛ subane ali na menli kola wolo bɛ. Saa awie ba ɛkponle ne anwo a, nolobɔlɛma ne ko bahola abiza ye kɛ: “Asoo wɔzuzu mɔɔ Baebolo ne ka fane zɔhane edwɛkɛ ne anwo la anwo ɛlɛ?” yeava yeabɔ adawubɔlɛ bo. Nolobɔlɛnli ko anzɛɛ nwiɔ bahola amaa bɛ nye ahɔ mbuluku ne anwo wɔ mekɛ mɔɔ bɛlɛdi daselɛ wɔ ahane ɛkɛ ne la.
2 Ɛhye ɛmaa bɛnyia Baebolo Ɛzukoalɛ fofolɛ dɔɔnwo. Bɛlɛra bie mɔɔ kɔ kɔlegyi la kpale kɛ ɔbayɛ Gyihova Alasevolɛ anwo neɛnleanu na yeahɛlɛ bɛ nwo edwɛkɛ, noko yeannwu Belemgbunlililɛ Asalo biala. Ye dapɛne bieko anu, ɔnwunle kɛ bɛva mbuluku bɛgua ɛkponle zo wɔ ye sukulu ɛkɛ. Bɛ nee bɛlɛra ne bɔle Baebolo ɛzukoalɛ bo, na kɛkala ɔle nolobɔlɛnli mɔɔ bɛzɔne ye mɔɔ ɔdua adenle ɛhye azo ɔdi daselɛ a.
3 Adiema raalɛ ko mɔɔ anye die bagua nu daselɛlilɛ ɛhye anwo la hanle kɛ: “Bie mɔ bafa magazine mɔɔ ɛra fofolɛ la wɔ ɛkponle ne azo. Bie mɔ noko ɛtɛtele Gyihova Alasevolɛ anwo edwɛkɛ ɛlɛ. Mekola menwu ye kɛ ɔlua adenle ɛhye azo, menli dɔɔnwo bahola ade edwɛkɛ ne.” Adiema raalɛ gyɛne noko hanle kɛ: “Ɛhye le daselɛlilɛ adenle fofolɛ mɔɔ yɛ anyelielɛ ɔluakɛ menli ne ba wɔ ɛkɛ, na saa bɛ nye ɛnlie nwolɛ kpalɛ bɔbɔ a bɛbiza kpuyia.”
4 Saa bɛangakyi ɛleka mɔɔ bɛfa mbuluku ne bɛsie, kenle nee mekɛ mɔɔ bɛfa bɛsie ɛkɛ wɔ dapɛne ne anu la a, ɔboa. Ɛhye maa menli nwu mbuluku ne na akee bɛ nye die nwo kɛ bɛbara nwolɛ bɛabiza kpuyia anzɛɛ bɛalie mbuluku ne bie. Wɔ asafo ne yɛ bagua nu daselɛlilɛ ne bie ɔ? Saa bɛyɛ bie a, ɛbahola wɔava ɛ nwo wɔawula gyima ɛhye mɔɔ yɛ anyelielɛ, ɔso ma na ɔmaa bɛbɔ “Nyamenle Belemgbunlililɛ ne nolo” la anu.—Luku 9:60.