Yɛbayɛ Gyima Mɔɔ Tɛla Biala La Wɔ August!
Yɛbava Trate Fofolɛ Bie Yɛamaa Wɔ Ewiade Amuala
1. Nolo titile boni a bɛbabɔ ye wɔ ewiade amuala a?
1 Ɔka ekyii Nyamenle Belemgbunlililɛ ne nyia ɛvolɛ 100. Nea kɛzi ɔle kpalɛ kɛ yɛbalua nolobɔlɛ titile bie azo yɛawula Gyihova anyunlunyia a! Yɛbava trate fofolɛ bie mɔɔ se Nienwu A Yɛbanyia Ɛbɛlabɔlɛ Nu Kpuyia Mɔɔ Anwo Hyia La Anwo Mualɛ A? la yɛamaa wɔ ewiade amuala wɔ August. Trate ɛhye bamaa kengavolɛma anwosesebɛ kɛ bɛkpondɛ bɛ kpuyia ne mɔ anwo mualɛ wɔ Baebolo ne anu na yeahilehile kɛzi jw.org bahola aboa bɛ la anu.
2. Duzu a yɛbahola yɛayɛ yɛava ‘yɛaye Gyihova ayɛlɛ kpole’ wɔ August a?
2 Ayɛlɛyelɛ Kpole: Amaa nolobɔlɛma ayɛ dɔɔnwo la, bɛyɛ ngyehyɛleɛ titile bie mɔɔ baboa bɛdabɛ mɔɔ bɛkulo kɛ bɛyɛ adekpakyelɛ boavolɛ wɔ August la. Wɔ zɔhane siane ne anu, nolobɔlɛma bahola ava dɔnehwele 30 ayɛ adekpakyelɛ boavolɛ. Kɛmɔ August lɛ Yalɛ nnu, Folɛ nnu, nee Molɛ nnu la ati, nolobɔlɛma dɔɔnwo mɔɔ kɔ gyima wɔ dapɛne ne anu la bahola ayɛ adekpakyelɛ boavolɛ. Eza ngakula bahola ava August sukulu adenlemanlɛ ne ali gyima kpalɛ ayɛ adekpakyelɛ boavolɛma. Saa wɔ Baebolo sukoavo bie anzɛɛ ɛ ra bie fɛta kɛ ɔkɔ daselɛlilɛ a, ka nwolɛ edwɛkɛ kile mgbanyima avinli ngitanwodivolɛ ne ndɛndɛ. Nea kɛzi ɔbayɛ anyelielɛ kɛ menli ɛhye mɔ nee yɛ babɔ nu ayɛ gyima wɔ siane titile ɛhye anu a! Ɔwɔ nuhua kɛ adekpakyelɛma bie mɔ mɔɔ bɛdwu bɛ dɔnehwele mɔɔ bɛkpondɛ ye wɔ ɛvolɛ ne anu anwo la ta fa August die bɛ menle ɛdeɛ, noko ɔbayɛ kpalɛ kɛ bɛbayɛ nzenzaleɛ amaa bɛanyia nolobɔlɛ titile ɛhye anu kyɛfoa. Ɛnɛ a le mekɛ mɔɔ ɔwɔ kɛ mbusua suzu mɔɔ bɛbahola bɛayɛ bɛaboa bɛamaa ‘yɛaye Gyihova ayɛlɛ kpole’ wɔ August la anwo a.—Ɛzela 3:11; Mrɛ. 15:22.
3. Anyelazo boni a yɛlɛ ye wɔ nolobɔlɛ titile ɛhye anwo a?
3 Ɔwɔ nuhua kɛ yɛyɛ nolobɔlɛ zɛhae bie ɛlɛ, noko yɛlɛ anyelazo kɛ ɛhye badɛla ɔ muala. Yɛkulo kɛ yɛnyia dɔnehwele, nolobɔlɛma, nee adekpakyelɛ boavolɛma dɔɔnwo wɔ August anu yɛtɛla mekɛ biala mɔɔ ɛze la. Mekɛ mɔɔ 2014 ɛzonlenlɛ ɛvolɛ ne ɛlɛkɔ awieleɛ la, yɛsɛlɛ kɛ Gyihova ɛyila mɔdenle mɔɔ ye menli mɔɔ wɔ ewiade amuala la babɔ amaa yɛali daselɛ kpole mɔɔ tɛla biala wɔ August la azo!—Mat. 24:14.