Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu—Yɛsiezie Yɛ Mukenye Edwɛkɛ Ne

Deɛmɔti Ɔhyia La: Saa yɛ mukenye ne anyɛ anyelielɛ a, suamenle ne bahola apɛ adwelielilɛ ne azo kolaa na yɛali daselɛ. Ɛhye ati, nolobɔlɛma dɔɔnwo bu bɛ mukenye edwɛkɛ ne kɛ yemɔ a hyia kpalɛ wɔ bɛ edwɛkɛhanlɛ ne anu a. Bɛhile edwɛkɛ mɔɔ yɛbaha la neazo wɔ Yɛ Belemgbunlililɛ Gyima ne nee Reasoning buluku ne anu ɛdeɛ, noko tɛ dahuu a mukenye ne maa yɛkola yɛkakyihakyi edwɛkɛ nu kɛmɔ ɔfɛta la. Saa edwɛkɛ mɔɔ yɛbaha la neazo ne maa yɛkola yɛyɛ zɔ bɔbɔ a, nolobɔlɛma bahola ahakyi ye anzɛɛ bɛaziezie bɛ ɛdeɛ. Ɛhye ati, saa yɛbɔ mɔdenle yɛsiezie mukenye edwɛkɛ na yɛanga edwɛkɛ biala mɔɔ bara yɛ ti anu la yɛangile suamenle ne wɔ mekɛ mɔɔ ɔbabuke anlenkɛ ne la a, ɔbamaa yɛabɔ mɔdenle kpalɛ.—Mrɛ. 15:28.

Kɛzi Bɛyɛ Ye La:

Kpondɛ edwɛkɛtile ne. Ɔwɔ kɛ ɔgyinla buluku mɔɔ ɛlɛfa wɔamaa la azo yɛɛ ɔwɔ kɛ menli mɔɔ wɔ azɛlɛsinli ne anu la anye die nwolɛ.
Bɔ mɔdenle siezie edwɛkɛ ko anzɛɛ nwiɔ mɔɔ ɛbiza ahye ɛwie a ɛbaha la. Ɛbahola wɔabɔ ɔ bo wɔaha kɛ: “Mera ɛke ɔluakɛ . . . ,” “Menli dɔɔnwo dwenle kɛ . . . ,” “Mekulo kɛ menwu wɔ adwenle wɔ . . . ,” anzɛɛ debie gyɛne. Edwɛkɛ sikalɛ, mɔɔ le ezinra la ta boa kpalɛ. Nolobɔlɛma bie mɔ kye bɛ mukenye ne gua bɛ ti anu.
Biza kpuyia mɔɔ maa bɛnwu awie adwenle mɔɔ bamaa suamenle ne ava ɔ nwo awula adwelielilɛ ne anu la. (Mat. 17:25) Kakye kɛ bie a ɛnee ɔlɛdwenle ninyɛne gyɛne nwo kolaa na wɔara, yemɔti ɔnle kɛ kpuyia ne yɛ se somaa anzɛɛ ɔmaa ye ahonle tu.

Sɔ Ɛhye Nea Wɔ Siane Ɛhye Anu:

Fa mekɛ bie sie ɛkɛ wɔ abusua ɛzonlenlɛ ne anu fa siezie wɔ mukenye edwɛkɛ ne na sukoa ye ɛyɛlɛ.
Saa ɛkɔ daselɛlilɛ a, ka mɔɔ wɔzuzu kɛ ɛbaha la anwo edwɛkɛ kile nolobɔlɛma gyɛne. (Mrɛ. 27:17) Saa wɔ mukenye edwɛkɛ ne ɛnle kpalɛ a kakyi ye.