Kɛzi Bɛsiezie Mukenye Edwɛkɛ Kpalɛ La
1. Kɛzi mukenye edwɛkɛ kpalɛ nwo hyia ɛ?
1 Kɛmɔ aleɛ bie evuanlɛ maa bɛ ti akunlu ba aleɛ ne azo la, zɔhane ala a mukenye edwɛkɛ kpalɛ maa yɛkola yɛdi Ngɛlɛlera ne anu adwelie kɛnlɛma a. Mukenye edwɛkɛ kpalɛ tendenle nee nuhua edwɛkɛ ne bahola ayɛ ngakyile, noko kɛmɔ aleɛ mɔɔ yɛ fɛ de la, dahuu ɔwɔ kɛ bɛdumua bɛdwenle nwolɛ na bɛayɛ. (Mrɛ. 15:28) Duzu a maa mukenye edwɛkɛ bie yɛ kpalɛ a?
2. Kɛ ɔkɛyɛ na yɛanyia mukenye edwɛkɛ mɔɔ yɛ anyelielɛ la ɛ?
2 Ka Edwɛkɛ Mɔɔ Yɛ Anyelielɛ La: Ɔwɔ kɛ yɛ mukenye edwɛkɛ ne yɛ anyelielɛ na suamenle ne ampɛ adwelielilɛ ne azo. Yemɔti saa ɛlɛsiezie edwɛkɛ ne a, dwenle menli ne anwo. Menli mɔɔ wɔ ɛkɛ la anye die maamulɛ kpalɛ, abusua ɛbɛlabɔlɛ mɔɔ yɛ anyelielɛ anzɛɛ konle mɔɔ bara awieleɛ la anwo ɔ? Menli kulo kɛ bɛkile bɛ adwenle, yemɔti kpondɛ kpuyia mɔɔ maa bɛdwenle la. Ɛbahola wɔava neazo mɔɔ wɔ Yɛ Belemgbunlililɛ Gyima ne anu la ko na wɔamaa yɛafɛta wɔ azɛlɛsinli ne ɔ? Duzu ati a ɔyɛ a bɛnzukoa mukenye edwɛkɛ bie mɔ wɔ bɛ Abusua Ɛzonlenlɛ ne anu ɛ?
3. Kɛ ɔkɛyɛ na yɛamaa yɛ mukenye edwɛkɛ avane amaamuo nee menli mɔɔ wɔ yɛ azɛlɛsinli ne anu la anwo ɛ?
3 Suzu Amaamuo Nee Menli Ne Anwo: Wɔ ɛleka bie mɔ, bɛ nye la kɛ yɛbaha deɛmɔti yɛra ɛkɛ ne la yɛahile bɛ. Ɛleka bie mɔ noko, saa ɛyɛvolɛ bie ambiza suamenle ne ahye nee kɛzi ɔ nwo de la a, bɛbu ye kɛ ɔ nye ɛnzɔ debie. Wɔ ɛleka bie mɔ, asɔne mɔɔ menli kɔ la maa yɛkola yɛka Baebolo ne anwo edwɛkɛ wɔ yɛ mukenye edwɛkɛ ne anu. (Gyi. 2:14-17) Noko, ɛleka mɔɔ menli ne ɛnle Keleseɛnema anzɛɛ bɛngɔ asɔne fee la, ɔbayɛ kpalɛ kɛ yɛbaha Baebolo ne anwo edwɛkɛ wɔ sia kɔkpɔla ne anu, na tɛ mɔlebɛbo ne ala.—Gyi. 17:22-31.
4. Duzu ati a ɔwɔ kɔ yɛdwenle yɛ mukenye edwɛkɛ ne anwo ɛ?
4 Mukenye Edwɛkɛ Ne: Siezie wɔ mukenye edwɛkɛ ne kpalɛ. Fane dɔɔnwo ne ala, edwɛkɛ ezinra mɔɔ le sikalɛ la le kpalɛ. Kɛzi yɛka yɛ mukenye edwɛkɛ ne la noko hyia. Fa anyelielɛ tendɛ. Sele, na maa suamenle ne ɛnwu kɛ ɛ nye die ɔ nwo. Saa yɛfa adehilelɛ ɛhye mɔ yɛdi gyima a, ɔbamaa yɛaziezie mukenye edwɛkɛ mɔɔ bamaa menli mɔɔ wɔ yɛ azɛlɛsinli ne anu arali aleɛ wɔ ‘Gyihova ɛkponle’ ne azo la.—1 Kɔl. 10:21.