YƐ DASELƐLILƐ GYIMA NE KPALƐ
Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu—Yɛsiezie Edwɛkɛ Mɔɔ Yɛbaha Yɛava Magazine Ne Yɛamaa La
DEƐMƆTI ƆHYIA LA: Ɔwɔ nu kɛ edwɛkɛ mɔɔ yɛbaha la neazo mɔɔ wɔ nyianu buluku ne anu la maa yɛ nzuzulɛ mɔɔ boa yɛ a, noko ɛhye mɔ le neazo ala. Ɔwɔ kɛ ɛfa wɔ edwɛkɛ ɛka. Ɛbahola wɔahakyi edwɛkɛ ne, anzɛɛ ɛbanwu ye kɛ menli nye balie edwɛkɛ bie anwo kpalɛ wɔ bɛ ɛkɛ ne. Yemɔti, saa ɛkenga magazine ne, ɛsuzu edwɛkɛ mɔɔ yɛbaha la neazo ne anwo, na ɛnea yɛkile nwo vidio ne ɛwie a, ɛbahola wɔava nzuzulɛ ɛhye mɔ wɔaziezie edwɛkɛ mɔɔ ɛbaha la.
KƐZI BƐYƐ YE LA:
Biza ɛ nwo kɛ, ‘Asoo mekulo kɛ mefa edwɛkɛ mɔɔ yɛbaha la neazo ne anu ko medi gyima ɔ?’
ƐHƐE
Siezie wɔ mukenye edwɛkɛ ne. Ɛbiza ahye ɛwie a, ka deɛmɔti wɔra ɛkɛ ne la sikalɛ. (Neazo: “Mera ɛke ɔluakɛ . . . ”)
Suzu kɛzi ɛvi kpuya ne anwo a ɛbara ngɛlɛlera ne azo na wɔava wɔamaa la anwo. (Neazo: Saa ɛgenga ngɛlɛlera bie a, ɛbahola wɔaha kɛ, “Ɛbahola wɔanyia kpuya ɛhye anwo mualɛ mɔɔ yɛ ahunlundwolɛ la wɔ ɛke.”)
KYƐKYƐ
Kpondɛ edwɛkɛ mɔɔ ɛ nye die nwo mɔɔ wɔ magazine ne anu na menli anye balie nwo wɔ wɔ azɛlɛsinli ne anu la
Si kpuya mɔɔ maa ɛnwu awie adwenle mɔɔ ndelebɛbo wɔ nu na ɔmaa bɛdi adwelie mɔɔ ɛbabiza la anwo kpɔkɛ na tɛ mɔɔ ɔbayɛ se kɛ suamenle babua la ɔ. (Neazo: Kpuya mɔɔ wɔ magazine ne mukelɛ 2 la.)
Kpondɛ ngɛlɛlera mɔɔ ɛbagenga la. (Saa ɛlɛfa Awake! ne wɔamaa a, ɛkulo a ɛbagenga ngɛlɛlera, ɔluakɛ bɛyɛ magazine ɛhye bɛmaa menli mɔɔ bɛlɛ Baebolo ne anwo ndelebɛbo ekyii mɔɔ bie a bɛnlie asɔne bɛnli la.)
Ka edwɛkɛ ko anzɛɛ nwiɔ mɔɔ ɔbamaa suamenle ne anwu nvasoɛ mɔɔ wɔ zo kɛ ɔbagenga magazine ne la
YE BIALA ANU
Siezie kpuya mɔɔ ɛsia ɛkɔ a ɛbabua la
Yɛ kɛlɛtokɛ amaa yeaboa wɔ yeamaa wɔahakye edwɛkɛ mɔɔ ɛkulo kɛ ɛka kenle fofolɛ la