Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu—Yɛyɛ Bokavolɛ Mɔɔ Boa La

Deɛmɔti Ɔhyia La: Gyisɛse nwunle kɛzi ɔhyia kɛ yɛ nee awie bahɔ daselɛlilɛ la. Yemɔti mekɛ mɔɔ ɔyele ye ɛdoavolɛma 70 kɛ bɛlumua ɔ nyunlu bɛhɔha edwɛkɛ ne la, ɔzoanle bɛ nwiɔ nwiɔ. (Luku 10:1) Bokavolɛ bie bahola aboa wɔ mekɛ mɔɔ ɔ gɔnwo nolobɔlɛnli kɛyia ngyegyelɛ anzɛɛ ɔnnwu kɛzi ɔbua suamenle bie la. (Nolo. 4:9, 10) Ɔbahola yeava ye anwubielɛ yeaboa yɛɛ ɔdwu mekɛ ne bie a ɔbahola yeava nzuzulɛ mɔɔ baboa la yeamaa ahenle mɔɔ ɔ nee ye lua la yeamaa yeayɛ edwɛkpakavolɛ mɔɔ bɔ mɔdenle la. (Mrɛ. 27:17) Bɛlɛkɔ sua fofolɛ nu a, ɔbahola ɔ nee ye ali adwelie mɔɔ maa anwosesebɛ la yeava yeaboa ye.—Fel. 4:8.

Kɛzi Bɛyɛ Ye La:

Saa wɔ bokavolɛ ne ɛlɛdi daselɛ a tie. (Gye. 1:19) Saa bɛlɛkenga ngɛlɛlera a, buke wɔ Baebolo ne di ɔ nzi. Ɛhye bamaa wɔahola wɔaboa wɔ mekɛ mɔɔ hyia la anu.
Nyia adwenle kpalɛ na nwu mekɛ mɔɔ ɔwɔ kɛ ɛka edwɛkɛ ne bie la. (Mrɛ. 25:11) Saa ɛ nee nolobɔlɛnli gyɛne kɔ kɛ bɛkayɛ Baebolo ɛzukoalɛ a, bɛ nye balie edwɛkɛ mɔɔ ɔyɛ a ɛka ɛfa ɛboa la anwo. Saa bɛlɛkɔ azua nu a bie a bokavolɛ mɔɔ ɛ nee ye lua la anye balie nwo kɛ ɔdwu ɔ nwo zo a ɛbamaa yeanyia adenle yeadendɛ. Nɔhalɛ nu, saa ɔle nolobɔlɛnli fofolɛ anzɛɛ ɔngola ɔmbua kpuyia anzɛɛ edwɛkɛ bie a, ɔ nye balie kɛ ɛbaboa ye. Noko saa ɛ nee nolobɔlɛnli bie ɛlɛyɛ azua nu daselɛlilɛ, sia kɔkpɔla, anzɛɛ Baebolo ɛzukoalɛ a, mmapɛ ɔ nloa azo na ɛdie edwɛkɛ ne ɛka anzɛɛ ɛka edwɛkɛ fofolɛ.
Ka anwubielɛ mɔɔ ɛlɛ la kile ye. Saa ɔyɛ na ɛnwu kɛ ɛfa nzuzulɛ bie mɔɔ boa la ɛmaa nolobɔlɛnli ne a ɔbamaa yeabɔ mɔdenle wɔ daselɛlilɛ nu a, mmagyakyi. (Mrɛ. 3:27) Mekɛ mɔɔ fɛta la anu, ɛbahola wɔaha kɛ: “Kɛzi ɛnwunle ye ɛ?” anzɛɛ “Mebahola meahile me adwenle ɔ?” anzɛɛ “Mɔɔ mebɔ mɔdenle meyɛ la ɛne.” Kakye kɛ ɔyɛ a menli nye die kɛ yɛbava yɛ nzuzulɛ bie yɛaboa bɛ noko saa yɛka nvonleɛ biala mɔɔ bɛkɛyɛ la anwo edwɛkɛ a ɔbamaa bɛ abɛ nu abu.

Sɔ Ɛhye Nea Wɔ Siane Ɛhye Anu:

Saa ɛ nee wɔ daselɛlilɛ nu bokavolɛ kɔ daselɛlilɛ na bɛkpɔne a, ka debie mɔɔ ɔhanle anzɛɛ ɔyɛle mɔɔ manle ɔyɛle bokavolɛ mɔɔ boa la kile ye.