Fa Yɛ Intanɛte Gyimalilɛleka Ne Kilehile Ɛ Mra
1. Duzu a le yɛ Intanɛte gyimalilɛleka ne mɔɔ ati se, “Children” la bodane a?
1 Bɛyɛ yɛ Intanɛte gyimalilɛleka ne kɛ bɛmaa menli kɔsɔɔti anye alie nwolɛ. Intanɛte gyimalilɛleka ne mɔɔ ati se, “Children” (kɔ Bible Teachings > Children) la boa ngakula nee bɛ awovolɛ maa bɛbikye bɛ nwo na bɛbikye Gyihova. (Mɛla 6:6, 7) Kɛzi ɛbava ɛleka ɛhye wɔahilehile ɛ mra ɛ?
2. Kɛ ɔkɛyɛ na wɔanwu debie mɔɔ fɛta mɔɔ ɛ nee ɛ mra bazukoa la ɛ?
2 Kakyihakyi Nu: Asolo kakula biala ngyianlɛ. (1 Kɔl. 13:11) Ɛnee kɛ ɔkɛyɛ na wɔanyia debie mɔɔ fɛta mɔɔ ɛ nee ɛ mra bazukoa la ɛ? Biza ɛ nwo kɛ: ‘Duzu a me mra ne mɔ anye balie nwolɛ a? Edwɛkɛ nyɛ a bɛbade ɔ bo a? Mekɛ tendenle nyɛ a bɛ adwenle bɛahɔ edwɛkɛ ne azo a?’ Ngakula mɔɔ bɛli ɛvolɛ nsa anzɛɛ bɛndwu la, ɛbahola ɛ nee bɛ azukoa edwɛkɛ mɔɔ wɔ “My Bible Lessons” abo la. Mbusua gyɛne noko anye die foa ne mɔɔ se, “Teach Your Children” la anwo. Eza suzu ɛhye mɔ noko anwo.
3. Kɛzi awovolɛ bahola ava ɛzukoalɛdeɛ nee gyimayɛlɛ mɔɔ wɔ “Family Worship Projects” abo la ali gyima kpalɛ ɛ?
3 Abusua Ɛzonlenlɛ Gyimayɛlɛ: Ninyɛne ɛhye mɔ boa mbusua tile maa bɛ nee bɛ mra sukoa debie. Amaa wɔanwu mɔɔ ɛbayɛ wɔ ɛzukoalɛdeɛ ne yɛɛ gyimayɛlɛ ne mɔ anwo la, klik deɛ ne mɔɔ bɛhile wɔ nwolɛ la azo, na kenga “Parents’ Guide” mɔɔ wɔ gyimayɛlɛ ko biala anwo la. Fa nvoninli gyimayɛlɛ ne mɔ kile ɛ mra kɛzi bɛbapenti mukelɛ ne mɔ la. Maa ngakula mɔɔ bɛnyi ekyi la ɛzukoa gyimayɛlɛ mɔɔ wɔ ɛkɛ la na bɛyɛ. Gyimayɛlɛ kɔsɔɔti mɔɔ wɔ ɛkɛ la fane Baebolo edwɛkɛ anzɛɛ ɛzukoalɛdeɛ ko ne ala anwo, yemɔti ngakula kɔsɔɔti bahola ayɛ abusua ɛzonlenlɛ gyimayɛlɛ ko ne ala bie.
4. Duzu a yɛbanwu ye wɔ foa ne mɔɔ se, “Bayɛ Gyihova Agɔnwo” la ɛkɛ a?
4 Bayɛ Gyihova Agɔnwo: Video, edwɛne nee gyimayɛlɛ mɔɔ wɔ yɛ Intanɛte ɛleka ɛhye la boa awovolɛ maa bɛfa Nyamenle Edwɛkɛ ne bɛkilehile bɛ mra. (Mɛla 31:12) Video ezinra biala mɔɔ wɔ ɛkɛ la kilehile debie mɔɔ hyia la. Gyimayɛlɛ mɔɔ maa bɛkpondɛ ninyɛne la maa yɛnwu kɛzi ɛzukoalɛdeɛ ne hyia la. Kɛmɔ ngakula kulo edwɛnedolɛ—na edwɛnedolɛ boa maa bɛkakye mɔɔ bɛzukoa la ati—dahuu bɛfa Belemgbunlililɛ edwɛne nee edwɛne mɔɔ bɛyɛ bɛmaa ngakula la bɛgua ɛkɛ ne.
5. Duzu ati a ɔwɔ kɛ awovolɛ sɛlɛ Gyihova kɛ ɔboa bɛ ɔmaa bɛhilehile bɛ mra nɔhalɛ ne ɛ?
5 Awovolɛ, Gyihova kulo kɛ bɛkola bɛyɛ bɛ gyima kɛ mame nee papa. Yemɔti bɛzɛlɛ ye kɛ ɔboa bɛ ɔmaa bɛhilehile bɛ mra nɔhalɛ ne. (Maa. 13:8) Ɔlua Gyihova moalɛ zo, bɛbahola bɛatete bɛ mra bɛamaa bɛanwu ‘nrɛlɛbɛ mɔɔ ɔlua Kelaese Gyisɛse anu diedi zo ɔbamaa bɛanyia ngoanelielɛ la.’—2 Tem. 3:15; Mrɛ. 4:1-4.