Tumi Wɔ Nyamenle Edwɛkɛ Ne Anu
1. Kenle ko nyianu titile maa 2014 ɛzonlenlɛ ɛvolɛ ne edwɛkɛtile ne a le duzu?
1 Baebolo ne ɛnle kɛ debie gyɛne mɔɔ sonla mɔɔ tɔ sinli la ɛyɛ la, emomu, ɔlɛ tumi ɔkakyi yɛ, na ɔmaa yɛ nzuzulɛ nee yɛ ndenle nee Gyihova ɛhulolɛdeɛ yia. Tumi boni a wɔ Nyamenle Edwɛkɛ ne anu a? Kɛ ɔkɛyɛ na yɛava tumi mɔɔ wɔ nu la yɛabɔ yɛ ɛbɛla ɛ? Kɛ ɔkɛyɛ na yɛava yɛali gyima kpalɛ yeaboa awie mɔ ɛ? Yɛlɛ anwodozo kɛ yɛ kɔsɔɔti yɛbanyia anwosesebɛ wɔ sunsum nu wɔ mekɛ mɔɔ bɛlɛsuzu edwɛkɛ ɛhye mɔ anwo wɔ kenle ko nyianu titile maa 2014 ɛzonlenlɛ ɛvolɛ ne anu la. Bɛyele edwɛkɛtile ne mɔɔ se, ‘Tumi Wɔ Nyamenle Edwɛkɛ Ne Anu’ la bɛvile Hibuluma 4:12.
2. Kpuyia boni mɔ a ɔwɔ kɛ yɛtie bɛ mualɛ a?
2 Kpondɛ Kpuyia Ɛhye Mɔ Mualɛ: Mekɛ mɔɔ ɛlɛtie gyimalilɛ ne la, yɛ mualɛ ne mɔ nzonlɛ wɔ kpuyia mɔɔ wɔ ɔ bo ɛke la anu.
• Duzu ati a ɔwɔ kɛ yɛnyia Gyihova Edwɛkɛ ne anu anwodozo ɛ? (Edw. 29:4)
• Kɛ ɔkɛyɛ na tumi mɔɔ wɔ Nyamenle Edwɛkɛ ne anu la aha yɛ ɛbɛlabɔlɛ ɛ? (Edw. 34:8)
• Kɛ ɔkɛyɛ na wɔala tumi mɔɔ wɔ Nyamenle Edwɛkɛ ne anu la ali wɔ daselɛlilɛ nu ɛ? (2 Tem. 3:16, 17)
• Duzu a ɔwɔ kɛ yɛyɛ na Seetan ewiade ne ambɛlɛbɛla yɛ ɛ? (1 Dwɔn 5:19)
• Kɛ kpavolɛ anzɛɛ bɛlɛra la, kɛ ɔkɛyɛ na wɔali konim wɔ sunsum nu ɛ? (Gyɛ. 17:7)
• Kɛ ɔkɛyɛ na yɛ nwo ayɛ se wɔ mekɛ mɔɔ yɛkɛyɛ bɛtɛɛ la ɛ? (2 Kɔl. 12:10)
• Saa bɔbɔ subane nee nyɛleɛ bie mɔ ɛzɔ ndinli wɔ yɛ nu a, duzu a baboa amaa yɛahakyi a? (Ɛfɛ. 4:23)
3. Saa yɛye edwɛkɛ ne mɔɔ yɛbadie la yɛsie ahane a, kɛzi kenle ko nyianu titile ne baboa yɛ ɛ?
3 Nea kɛzi edwɛkɛ ɛhye mɔ mɔɔ yɛbade la baboa yɛ a! Bieko, kenle ko nyianu titile ne bamaa yɛanyia adenle yɛabuke yɛ munli nu na yɛ nee mediema mrenya nee mraalɛ mɔɔ bɛwɔ asafo gyɛne nu la anyia agɔnwolɛvalɛ mɔɔ yɛ anyelielɛ la kɛmɔ maanzinli nee maangyeba nyianu ne mɔ de la. (Edw. 133:1-3; 2 Kɔl. 6:11-13) Yemɔti nyia mekɛ maa agɔnwolɛma dɛba, na kpondɛ fofolɛ. Saa tendɛvolɛ mɔɔ bɛkpa ye, le kɛ maangyeba zo neavolɛ anzɛɛ bɛye adiema nrenya mɔɔ wɔ Bɛtɛle la kɛ ɔrɛla bɛ kenle ko nyianu titile ne bie a, duzu ati a ɛnva nwolɛ adenle ne ɛnyɛ ɔ nee ɔ ye akoaba ɛ? Nɔhalɛ nu, yɛlɛ ndelebɛbo dɔɔnwo mɔɔ ɔti ɔwɔ kɛ yɛmaa yɛ nye da kenle ko nyianu titile ne ade a!