Nyamenle Edwɛkɛ Ne Le Kpalɛ Maa Ngilehilelɛ
1. Maanzinli nyianu maa 2014 edwɛkɛtile ne a le duzu, na kpuyia boni a bɛbabua wɔ ɔ bo a?
1 Gyihova, yɛ ‘Kilehilevolɛ Kpole,’ ne le kilehilevolɛ kpalɛ mɔɔ tɛla biala wɔ aleɛabo. (Aye. 30:20, 21) Noko, kɛzi Gyihova kilehile yɛ ɛ? Yemaa yɛ buluku mɔɔ tɛla mbuluku biala—ye Edwɛkɛ ne mɔɔ sunsum ne manle bɛhɛlɛle, Baebolo ne. Kɛ ɔkɛyɛ na anwuma ngilehilelɛ aboa yɛ wɔ nwonane nu, adwenle nu, nganeɛdelɛ nu yɛɛ sunsum nu ɛ? Yɛbazuzu kpuyia ɛhye mualɛ ne anwo wɔ yɛ maanzinli nyianu ne mɔɔ bɛbayɛ ye wɔ 2014 ɛzonlenlɛ ɛvolɛ ne anu la abo. Nyianu edwɛkɛtile ne se, ‘Nyamenle Edwɛkɛ Ne Le Kpalɛ Maa Ngilehilelɛ,’ na ɔgyi 2 Temɔte 3:16 azo.
2. Kpuyia boni mɔ mualɛ a bɛbava bɛahwe adwenle bɛazie edwɛkɛtitile ne mɔ azo a?
2 Nea Kɛ Ɛbanwu Edwɛkɛtitile Ɛhye Mɔ: Bɛbazi edwɛkɛtitile ne mɔ mɔɔ wɔ gyimalilɛ ne anu la azo ɔlua kpuyia ɛhye mɔ mɔɔ bɛbabua la azo:
• Kɛzi anwuma ngilehilelɛ ka yɛ ɛbɛlabɔlɛ ɛ? (Aye. 48:17, 18)
• Saa yɛyɛ nzenzaleɛ wɔ yɛ ɛbɛlabɔlɛ nu na yɛfa yɛ mekɛ kɔsɔɔti yɛsonle Gyihova a, duzu a yɛbanyia anwodozo wɔ nu a? (Mal. 3:10)
• Saa yɛte “ngilehilelɛ ngakyile” bie a, duzu a ɔwɔ kɛ yɛyɛ a? (Hib. 13:9)
• Kɛ ɔkɛyɛ na yɛazukoa Gyisɛse “ngilehilelɛ” ne ɛ? (Mat. 7:28, 29)
• Duzu ati a ɔwɔ kɛ asafo ne anu kilehilevolɛma kilehile bɛ nwo ɛ? (Wulo. 2:21)
• Duzu anwo a Nyamenle Edwɛkɛ ne le kpalɛ a? (2 Tem. 3:16)
• Kɛzi maanle maanle ne ‘ɛkpusulɛ’ ka menli ɛ? (Hag. 2:6, 7)
• Anwodozo boni a Gyihova lɛ wɔ yɛ nu a? (Ɛfɛ. 5:1)
• Kɛmɔti a ɔwɔ kɛ yɛbɔ mɔdenle yɛtɛnla Gyihova ngilehilelɛ ne anu ɛ? (Luku 13:24)
3. Duzu ati a ɔhyia kɛ yɛkɔ na yɛtie nyianu ɛhye mɔɔ le ye mekɛ nu ɛdeɛ la kpalɛ ɛ?
3 Wɔ 2 Temɔte tile 3 ne mɔlebɛbo, Pɔɔlo hanle anwongyelelɛ mɔɔ bahile kɛ yɛwɔ awieleɛ mekɛ ne anu, kolaa na yeahɛlɛ edwɛkɛ ne mɔɔ nyianu edwɛkɛtile ne gyi zo la. Ɔhɛlɛle kɛ: “Amumuyɛma nee adalɛma bahɔ zolɛ amaa bɛ ti ayɛ se kpalɛ, bɛbabɛlɛbɛla awie mɔ na bɛabɛlɛbɛla bɛdabɛ bɛ ngome bɛ nwo.” (2 Tem. 3:13) Amaa bɛambɛlɛbɛla yɛ la, nea kɛzi ɔhyia kɛ yɛtie na yɛfa anwuma ngilehilelɛ yɛbɔ yɛ ɛbɛla a! Ɛhye ati, ɔrɛla ye kɛ yɛbabɔ kpɔkɛ yɛahɔ nyianu ɛhye mɔɔ le ye mekɛ nu ɛdeɛ la bie na yɛadie edwɛkɛ ne kpalɛ.