Yɛbanyia Adenle Kpole Yɛahanvo Gyihova
1. Ngyehyɛleɛ fofolɛ boni a baboa yeamaa yɛahanvo Gyihova “kpole kpalɛ” a?
1 Ɔvi March siane ne mɔɔ ɛze ɛhɔ la anu, ngyehyɛleɛ fofolɛ bie bɔle ɔ bo, na ɔmanle nolobɔlɛma nyianle adenle kɛ bɛbava dɔnehwele 30 bɛayɛ adekpakyelɛ boavolɛ gyima wɔ March nee April biala anu yɛɛ siane mɔɔ maanzinli zo neavolɛ ne barakpɔla bɛ la anu. Saa maanzinli zo neavolɛ ɛkpɔlalɛ ne bawolo siane gyɛne nu a, nolobɔlɛma mɔɔ bahile kɛ bɛfa dɔnehwele 30 bɛabu mgbonda la bahola ahile siane holɛ ko mɔɔ bɛkulo kɛ bɛfa bɛyɛ adekpakyelɛ boavolɛ la. Adekpakyelɛ boavolɛma kɔsɔɔti bahola ahɔ nyianu ne mɔɔ ɔ nee dahuu nee adekpakyelɛma titile bayɛ la amuala bie. Ɛhye kile kɛ saa yɛnrɛhola yɛnrɛyɛ dɔnehwele 50 a, yɛbahola yɛahɔ zo yɛayɛ Gyihova “mo kpole kpalɛ” kɛ adekpakyelɛ boavolɛma fane nna wɔ ɛvolɛ ko anu na yɛava dɔnehwele 30 yɛamaa!—Edw. 109:30; 119:171.
2. Duzu a menli mɔɔ bayɛ adekpakyelɛ boavolɛ wɔ maanzinli zo neavolɛ ɛkpɔlalɛ ne anu la banyia a?
2 Maanzinli Zo Neavolɛ Bakpɔla Bɛ A: Kɛkala menli dɔɔnwo bahola ayɛ adekpakyelɛ boavolɛ wɔ mekɛ mɔɔ maanzinli zo neavolɛ ne barakpɔla bɛ la na bɛanyia anwosesebɛ bɛavi daselɛlilɛ gyima mɔɔ bɛ nee ye bayɛ la anu. (Wulo. 1:11, 12) Adekpakyelɛ boavolɛma dɔɔnwo bakpondɛ kenle ko wɔ dapɛne ne anu amaa bɛahola bɛ nee maanzinli zo neavolɛ ne alua. Menli mɔɔ yɛ gyima wɔ dapɛne ne anu la bahola abiza ye saa ɔ nee bɛ balua wɔ Folɛ anzɛɛ Molɛ a. Bieko, nea kɛzi ɔbayɛ anyelielɛ kɛ adekpakyelɛ boavolɛma nee dahuu adekpakyelɛma yɛɛ adekpakyelɛma titile babɔ nu ahɔ adekpakyelɛma nyianu ne bie a!
3. Duzu ati a Ngakyelɛlilɛ mekɛ ne le kɛnlɛma maa adekpakyelɛ boavolɛ gyima ɛ?
3 Wɔ March Nee April: Menli mɔɔ lile ngyehyɛleɛ dɛba ne azo vale dɔnehwele 30 yɛle adekpakyelɛ boavolɛ siane ko wɔ Ngakyelɛlilɛ mekɛ ne anu la akee bahola ‘abɔ ayɛlɛyelɛ afɔle’ fane nwiɔ! (Hib. 13:15) March nee April le siane kɛnlɛma mɔɔ yɛbahola yɛava yɛadɛlɛ yɛ ɛzonlenlɛ gyima ne anu kɛ adekpakyelɛ boavolɛma a. Ɛvolɛ biala, yɛto ɛsalɛ yɛfɛlɛ menli yɛmaa bɛkɔ Ngakyelɛlilɛ ne bie wɔ zɔhane siane ne mɔ anu. Bieko, kɛmɔ menli dɔɔnwo tɛlɛ bɛ ɛzonlenlɛ gyima ne anu wɔ Ngakyelɛlilɛ mekɛ ne anu la ati, yɛnyia nolobɔlɛma dɔɔnwo yɛ nee bɛ kɔ daselɛlilɛ. Yɛwie Ngakyelɛlilɛ ne a, yɛkɔkpɔla menli mɔɔ rale bie la na yɛmaa bɛ nye die ɛdendɛlɛ titile ne anwo. Asoo ɛhye baha wɔ ahonle yeamaa wɔava adenle mɔɔ wɔnyia la wɔayɛ adekpakyelɛ boavolɛ?—Luku 6:45.