Kɛzi Bɛfa Nwane Mɔ A Ɛlɛyɛ Gyihova Ɛhulolɛdeɛ Ɛnɛ A? Bɛdi Gyima La
Brohyua Fofolɛ Mɔɔ Baboa Baebolo Sukoavoma Yeamaa Bɛanwu Ahyehyɛdeɛ Ne La
1. Bodane nsa mɔɔ Gyihova Ɛhulolɛdeɛ brohyua ne gyi zo la a le boni?
1 Wɔbɔ ɔ bo kɛ ɛfa brohyua fofolɛ ne mɔɔ se, Nwane Mɔ A Ɛlɛyɛ Gyihova Ɛhulolɛdeɛ Ɛnɛ A? la wɔali gyima ɔ? Ye bodane a le kɛ (1) ɔmaa Baebolo sukoavoma anwu yɛ, (2) ɔboa bɛ yeamaa bɛanwu yɛ gyima ne yɛɛ (3) ɔmaa bɛanwu mɔɔ yɛ ahyehyɛdeɛ ne ɛlɛyɛ la. Gyihova Ɛhulolɛdeɛ brohyua ɛhye ɛzukoalɛdeɛ biala le mukelɛ ko, yemɔti ɔnyɛ se kɛ yɛsukoa debie yɛwie a yɛbava mitini nnu kɔdwu bulu yɛazuzu nwolɛ.
2. Ka kɛzi bɛyɛ brohyua ɛhye nee nuhua ninyɛne la anwo edwɛkɛ.
2 Kɛzi Bɛyɛ Ye La: Bɛyɛ brohyua ne foa nsa, na foa ko biala ka Gyihova ahyehyɛdeɛ ne anwo edwɛkɛ ngakyile kɛmɔ yɛlumua yɛha la. Ɛzukoalɛdeɛ 28 ne biala edwɛkɛtile ne le kpuyia, na edwɛkɛtile ekyi ne mɔɔ bɛyɛ ye bile la bua zɔhane kpuyia ne. Nvoninli mɔɔ wɔ nu la vi maanle mɔɔ bo 50 la anu na ɔkile kɛ yɛ gyima ne bie wɔ maanle ngakyile nu. Ɛzukoalɛdeɛ dɔɔnwo anu, “Kpondɛ Dɔɔnwo” nlɛka wɔ ɛkɛ, na nzuzulɛ mɔɔ ɛbahola wɔaha wɔahile wɔ sukoavo ne kɛ ɔva ɔli gyima la a wɔ nu a.
3. Kɛ ɔkɛyɛ na yɛava Gyihova Ɛhulolɛdeɛ brohyua ne yɛali gyima ɛ?
3 Kɛzi Ɛbava Wɔali Gyima La: Dumua fa ɛzukoalɛdeɛ edwɛkɛtile ne mɔɔ bɛyɛ ye kpuyia la kile ye. Akee saa bɛlɛsukoa a, twe adwenle kɔ edwɛkɛtile ekyi mɔɔ bɛyɛ ye bile la azo. Bɛsukoa bɛwie a, bɛzuzu ndinu kpuyia ne mɔ mɔɔ wɔ mukelɛ ne awieleɛ la anwo. Bɛbahola bɛagenga ɛzukoalɛdeɛ ne amuala anzɛɛ ye foa bie na bɛazuzu nwolɛ. Suzu ngɛlɛlera mɔɔ wɔ nu la anwo kpalɛ na nwu mɔɔ bɛbagenga la. Mmamaa ɛ rɛle fi kɛ ɛbazuzu nvoninli nee “Kpondɛ Dɔɔnwo” nlɛka ne mɔ anwo. Fane dɔɔnwo ne ala, ɔwɔ kɛ bɛsukoa ye kɛmɔ bɛhyehyɛ ye la. Noko akee, ɛbahola wɔawulu wɔahɔ ɛzukoalɛdeɛ mɔɔ ka debie mɔɔ ahenle anye die nwolɛ la. Kɛ neazo la, saa nyianu bie ɛlɛbikye a, ɛbahola wɔawulu wɔahɔ ɛzukoalɛdeɛ 11 ne azo.
4. Duzu ati a ɛ nye ɛlie kɛ wɔnyia brohyua fofolɛ ɛhye a?
4 Saa yɛ nee awie sukoa Baebolo ne a, yɛboa ye yɛmaa ɔnwu yɛ anwuma Selɛ ne. Noko akee, eza ɔwɔ kɛ yɛmaa ɔnwu Gyihova ahyehyɛdeɛ ne. (Mrɛ. 6:20) Nea kɛzi yɛ nye ɛlie kɛ yɛnyia brohyua fofolɛ ɛhye mɔɔ bamaa yɛahola yɛayɛ zɔ la!