Bɛlie Bɛ!
1. Mekɛ boni a maa yɛnyia adenle yɛdi daselɛ kɛnlɛma a, na duzu ati ɔ?
1 Ɛvolɛ biala Ngakyelɛlilɛ ne maa yɛnyia adenle yɛdi daselɛ kɛnlɛma. Dwenle nwolɛ nea: Ɛvolɛ ɛhye, nyɛvolɛ mɔɔ bo mgbe bulu la bara Ngakyelɛlilɛ ne bie na bɛadie ɛlɔlɛ kpole mɔɔ menli nwiɔ luale ɛkpɔnedeɛ ne azo lale ye ali la anwo edwɛkɛ. (Dwɔn 3:16; 15:13) Bɛbazukoa nyilalɛ mɔɔ Gyihova ahyɛlɛdeɛ ne ati bɛbanyia la anwo debie. (Aye. 65:21-23) Noko akee, tɛ tendɛvolɛ ne angomekye a bali daselɛ wɔ mekɛ ɛhye anu a. Menli kɔsɔɔti mɔɔ wɔ ɛkɛ la banyia adenle ali daselɛ kɛnlɛma ɔlua nyɛvolɛ mɔɔ bɛbalie bɛ la azo.—Wulo. 15:7.
2. Kɛ ɔkɛyɛ na yɛahola yɛalie nyɛvolɛ kɛnlɛma ɛ?
2 Kɛ anrɛɛ ɛbadɛnla aze koonwu na wɔahendɛ kɛ bɛbabɔ gyimalilɛ ne abo la, duzu ati a ɛmbɔ wɔ duma ɛngile bɛdabɛ mɔɔ bɛde ɛ nwo ɛkɛ ne la ɛ? Bie a ɛzulolɛ baha nyɛvolɛ ne mɔ yɛɛ bɛnze mɔɔ bahɔ zo a. Saa yɛsele na yɛte yɛ nyunlu yɛsoma bɛ a ɔbamaa ɛzulolɛ mɔɔ bɛlɛ la avi ɛkɛ. Amaa wɔanwu kɛ awie bie ɛlua ɛsalɛdolɛ kɛlata ne azo ɛra ɛkɛ la, ɛbahola wɔabiza ye saa kenle mɔɔ lumua mɔɔ yera yɛ nyianu ne bie a anzɛɛ saa ɔze awie wɔ asafo ne anu a. Ɛbahola wɔamaa yeadɛnla ɛ nwo ɛkɛ na wɔamaa yeanlea wɔ Baebolo ne nee wɔ edwɛne buluku ne anu bie. Saa Belemgbunlililɛ Asalo ɛkɛ a bɛlɛyɛ ye a, ɛbahola wɔava ye wɔakpɔsa ɛkɛ ne ekyii. Bɛmaa ɛdendɛlɛ ne bɛwie a, bɔ mɔdenle kɛ ɛbabua kpuyia mɔɔ ɔlɛ la. Saa ɔwɔ kɛ bɛ asafo ne fi ɛkɛ ne ndɛndɛ na asafo fofolɛ ahola ayɛ bɛ ɛdeɛ a, ɛbahola wɔaha kɛ: “Mekulo kɛ menwu kɛzi ɛnwunle gyimalilɛ ne la. Nienwu a mebanwu wɔ a?” Akee yɛ ngyehyɛleɛ sia kɔkpɔla ye. Mgbanyima ne mɔ bɛamaa bɛ nye ala kɛ bɛbamaa nolobɔlɛma mɔɔ bɛyɛ bɛtɛɛ na bɛrale bie la anwosesebɛ titile.
3. Duzu ati a ɔhyia kɛ yɛbɔ mɔdenle yɛdie nyɛvolɛ mɔɔ bara Ngakyelɛlilɛ ne bie la ɛ?
3 Wɔ nyɛvolɛ dɔɔnwo ne afoa nu, ɛhye a bayɛ mekɛ mɔɔ lumua mɔɔ bɛbanwu anyelielɛ, anzondwolɛ nee koyɛlɛ mɔɔ wɔ sunsum nu paladaese mɔɔ Gyihova menli wɔ nu la a. (Edw. 29:11; Aye. 11:6-9; 65:13, 14) Duzu a nyɛvolɛ mɔɔ bara bie la bahakye a? Dɔɔnwo bagyinla kɛzi yɛbalie bɛ la azo.