Dua Adenle Mɔɔ Boa La Azo
1. Duzu a yɛkola yɛsukoa yɛfi ndenle ngakyile mɔɔ alumua Keleseɛnema vale lile gyima la anu a?
1 Alumua Keleseɛnema bɔle edwɛkpa ne nolo hilele menli mɔɔ bɛ amaamuo nee bɛ ɛzonlenlɛ le ngakyile la. (Kɔl. 1:23) Bɛhanle Nyamenle Belemgbunlililɛ ne anwo edwɛkɛ ko ne ala ɛdeɛ, noko bɛhanle ye wɔ adenle ngakyile zo. Kɛ neazo la, mekɛ mɔɔ ɛnee Pita ɛlɛtendɛ ahile Dwuuma mɔɔ kulo Ngɛlɛlera ne anu edwɛkɛ la ɔhanle ngapezonli Dwowɛle anwo edwɛkɛ. (Gyi. 2:14-17) Noko, nea kɛzi Pɔɔlo nee Gilikima zuzule edwɛkɛ nwo kɛmɔ bɛhile ye wɔ Gyima ne 17:22-31 la. Ɛnɛ, menli mɔɔ wɔ azɛlɛsinli bie mɔ anu la anye die Ngɛlɛlera ne anwo na yɛbahola yɛaha Baebolo ne anu edwɛkɛ yɛahile bɛ wɔ mekɛ mɔɔ yɛlɛkɔ azua nu la. Noko akee, ɔwɔ kɛ yɛyɛ nrɛlɛbɛvolɛma wɔ mekɛ mɔɔ yɛlɛtendɛ yɛahile menli mɔɔ anye ɛnlie Baebolo ne anwo, bɛngɔ asɔne anzɛɛ bɛnle Keleseɛnema la.
2. Kɛ ɔkɛyɛ na yɛava mbuluku mɔɔ yɛbava yɛamaa la yɛaboa menli mɔɔ anye die Baebolo ne anwo nee menli mɔɔ anye ɛnlie nwo la ɛ?
2 Fa Mbuluku Mɔɔ Yɛbava Yɛamaa La Di Gyima Kpalɛ: Bɛbahakyi mbuluku mɔɔ yɛbava yɛamaa wɔ ɛzonlenlɛ ɛvolɛ ɛhye anu la siane nwiɔ biala, na ɔbaha magazine, trate, nee brohyua nwo edwɛkɛ. Saa menli mɔɔ wɔ yɛ azɛlɛsinli ne anu la anye ɛnlie Baebolo ne anwo bɔbɔ a, yɛbahola yɛaha edwɛkɛ mɔɔ bɛ nye balie nwolɛ la yɛahile bɛ. Bie a yɛnrɛgenga ngɛlɛlera anzɛɛ yɛnrɛha Baebolo ne anwo edwɛkɛ wɔ ɛkpɔlalɛ mɔɔ lumua la anu, noko ɛleka mɔɔ bɛkɛhile nwolɛ anyelielɛ la yɛbahola yɛazia yɛahɔ suamenle ne ɛkɛ na yɛaboa ye yɛamaa yeanyia diedi wɔ Bɔvolɛ ne nee ye Edwɛkɛ ne mɔɔ vi sunsum nu la anu. Noko, saa yɛlɛdi daselɛ wɔ ɛleka mɔɔ menli anye die Baebolo ne anwo la a, yɛbahola yɛamaa bɛ mbuluku na yɛalua adenle mɔɔ baboa la azo. Nɔhalɛ nu, yɛbahola yɛava Baebolo ne Kilehile buluku ne anzɛɛ Tie Nyamenle anzɛɛ Tie Nyamenle Na Nyia Ngoane brohyua ne yɛamaa mekɛ biala, ɔnva nwo buluku mɔɔ yɛbava yɛamaa wɔ siane ne anu la. Mɔɔ hyia la a le kɛ yɛbalua adenle mɔɔ boa la azo.
3. Adenle boni azo a menli mɔɔ wɔ yɛ azɛlɛsinli ne anu la ahonle le kɛ azɛlɛ ɛ?
3 Siezie Azɛlɛ Ne: Sonla ahonle le kɛ azɛlɛ la. (Luku 8:15) Ɔhyia kɛ bɛsiezie azɛlɛ bie kolaa na Baebolo nu nɔhalɛ ne azɔ ndinli wɔ nu. Wɔ Ɛvoya mɔɔ lumua la anu, edwɛkpakavoma guale ma ne wɔ azɛlɛ ngakyile zo, na ɛhye manle bɛ nye liele na bɛlile fɛlɛko. (Gyi. 13:48, 52) Yɛdua adenle ko ne ala azo a yɛ nye bɛalie.